2017-07-21 15:15:02 clouds 27o High | Kigali Rwanda

Dukurikire:
 
 

Ngoma:Abarenga ibihumbi 18 bivurizaga kure begerejwe ikigo nderabuzima

Yanditswe na IMVAHO NSHYA

Kuya 2017-07-11 11:24:12

 
Share on:
 
Yasuwe:3
 
Yavuzweho:200
 
10
 
10

Abaturage basaga ibihumbi 18 batuye umurenge wa Gashanda, mu karere ka Ngoma, baravuga ko bashimira Leta y’u Rwanda yashyize imbagara mu kwegera abaturage no kubegereza serivise.

Babishingira no ku kigo nderabuzima kiri kubakwa, kizaba cyuzuye muri uyu mwaka w’ingengo y’imari wa 2017-2018.

Ahari kubakwa ikigo nderabuzima cya Gashanda, hahoze hari ‘Poste de santé’, nyuma ubuyobozi bushingiye ku busabe bw’abaturage, bagaragaza ko bagorwa n’ingendo ndende bokora, bajya kwivuriza i Kibungo, hahindurwa ikigo nderabuzima.

Kuri ubu ibikorwa byo kubaka inyubako zitangirwamo serivise zo ku rwego rw’ikigo nderabuzima, birarimbanyije.

JPEG - 508.6 kb
Inyubako abagore bazajya babyariramo ku kigo nderabuzima cya Gashanda

Amakuru dukesha ubuyobozi bw’umurenge wa Gashanda, avuga ko utuwe n’abaturage basaga ibihumbi 18. Ni umurenge ugizwe n’utugari twa Mutsindo, Giseri, Cyerwa na Munege. Nta kigo nderabuzima cyahabaga.

Icyo batuye hano i Gashanda, batangarije Imvaho Nshya ni uko bafite akanyamuneza baterwa nuko ubuyobozi bwabumvise, ubu bakaba bagiye kujya bavurirwa hafi, batabanje kugorwa no gutanga amafaranga y’ingendo, cyangwa kurushwa no kuzamuka imisozi no kumanuka indi.

Ibyishimo by’abatuye Gashanda, byumvikana cyane mu buhamya bw’abagore bavuga ko bashimira Perezida wa Repubulika y’u Rwanda wabahaye agaciro, by’umwihariko akaba ari kubegereza aho bazajya babyarira, hafi yabo.

Mukayoboka Olive, utuye mu mudugudu wa Rwanyamigono, mu kagari ka Giseri, yagize ati “Ubu iri vuriro icyo rizatumarira ni ku bijyanye no kuza kubyara. Ubundi tujya i Kibungo, iyo ari nijoro dutega moto ikaguca ibihumbi 6, yaba ari ku manywa ni ibihumbi 2 ugiye kubyara, urumva ko ayo mafaranga ari menshi. Ariko ubu hano tugiye kuhabona ivuriro, aho tuzajya tubyarira, ikibazo kizaba gikemutse.”

Niyonsenga Elianna, na we yagize ati “Kujya kwipimisha inda, tujya Kibungo, byatuvunaga cyane. Iyo udafite amafaranga ni ukuzamuka ubusozi, kandi nta n’imodoka wabona, ku buryo byari ibibazo nko ku muntu ufite inda nkuru, akaba yanagirira ibindi bibazo mu nzira.
Kuba rero hano hari kubakwa ikigo nderabuzima, turabibonamo igisubizo kinini, kandi turabishimira ubuyobozi cyane cyane Perezida wacu Paul Kagame.Hano ho ni hafi cyane, mvuye mu rugo nza nakoresha nk’iminota 30, nteze nka moto banca amafaranga 300 gusa.”

Nambaje Aphrodise, Umuyobozi w’akarere ka Ngoma, atangaza ko imirimo yo kubaka inyubako zizatangirwamo serivise zo ku rwego rw’ikigo nderabuzima, kuri poste de santé ya Gashanda igeze kure.

Agaragaza ko muri uyu mwaka wa 2017-2018, imirimo ya nyuma izakomeza. Yagize ati “Muri Gashanda mu mwaka ushize (2016-2017) hari inyubako twahubatse zizakorerwamo n’ikigo nderabuzima. N’uyu mwaka (2017-2018), tugiye gushyiraho n’inzu y’abarwayi, kugira ngo byemerwe neza ko tuyigize ikigo nderabuzima.”

Imirimo yo kubaka inzu y’abarwayi, izakorerwamo ku kigo nderabuzima cya Gashanda izatwara amafaranga y’u Rwanda agera kuri miliyoni 50.
Umurenge wa Gashanda numara kubona ikigo nderabuzima, mu murenge 14 igize akarere ka Ngoma, hazaba hasigaye indi mirenge 2 uwa Kazo na Karembo, idafite ibigo nderabuzima.

Ni mu gihe gahunda ya Leta y’u Rwanda, ibinyujije muri Minisiteri y’ubuzima, iteganya ko buri murenge ugomba kugira ikigo nderabuzima.

MANISHIMWE NOËL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE