2017-12-12 14:14:08 clouds 27o High | Kigali Rwanda

Dukurikire:
 
 

Kigali: Imikoreshereze y’amakarita y’ingendo ikwiye kuvugururwa

Yanditswe na IMVAHO NSHYA

Kuya 2016-11-16 14:28:38

 
Share on:
 
Yasuwe:18
 
Yavuzweho:200
 
10
 
10

Hashize igihe gito zimwe muri za sosiyete zifite imodoka zitwara abagenzi mu mugi wa Kigali zishyizeho gahunda yo gutwara abantu hakoreshejwe amakarita. Ayo ma karita iyo witegereje, usanga afatiye runini abatuye umugi wa Kigali akamaro kuko bibafasha kuzigama amafaranga y’ingendo.

Ikindi zibafasha umutekano wo kugendana mu ntoki kuko babanza kuyabika kuri ayo makarita. Ikindi ni uburyo bwiza bw’ikoranabuhanga butuma ari umugenzi cyangwa utwara abagenzi aba afite umutuzo muri we kuko aba adakeka ko hari uwamwiba amafaranga.

Aya makarita rero yabashije gukemura ikibazo cy’abantu bamwe na bamwe cyane cyane abantu bakunda gutega imodoka buri munsi. Aha umuntu yavuga abantu bafite akazi gahoraho ka buri munsi , abakorera leta n’abikorera.

Aba usanga bashobora kubara amafaranga ashoboka bazakoresha mu ngendo bajya mu kazi bakayabika ku makarita yabo. Bityo ntabe agihangayikishijwe n’amatike. Akabasha kujya mukazi ke ntakibazo afite kandi akagakora neza.

JPEG - 144.1 kb
Amakarita y’ingendo yakemuye ibibazo yongeraho ibindi

Nyamara abantu batega rimwe na rimwe ntibigeze bishimira ubu buryo bwo gukoresha ayo makarita kuko bavugako ntangendo bagira za buri munsi. Abandi bantu babangamirwa n’ikoreshwa ry’aya makarita ni abantu baba baturutse mu ntara baje mu mujyi wa Kigali. Abo nabo usanga batabasha kugenda muri izo modoka kuberako udafite ukarita zitamutwara.

Ubwo nabo bagasabwa kugura iyo karita kugirango babashe kugira aho batembera mu mujyi wa Kigali. Mu byukuri rero aya makarita urebye arahendutse, kuko ikarita imwe igurwa amafaranga igihumbi (1000FRW) hanyuma ugasangaho amafaranga magana atanu (500FRW)y’urugendo. Iyo urebye usanga ahubwo igiciro cy’iyo karita ari amafaranga magana atanu kuko andi uyasubizwa.

Nkaba mbona ikoreshwa ry’aya makarita ari ryiza kandi rikwiye gushyigikirwa ariko hakabaho ivugrurwa mu mikoreshereze yazo. Impamvu bagomba kuvugurura ikoreshwa ry’amakarita ni uko akenshi izi karita zagize ikibazo cyo gutakaza amafaranga cyane cyane iyo uyikoresha yegereye imodoka ikorana nayo.

Ikindi abazikoresha bazinenga ni uko usanga uyifite adashobora kurihira undi.ugasanga umugabo ari kumwe n’umugore cyangwa umwana we ntabe yakwishyura amafaranga y’umuryangowe. Aha nkaba mbona hari imbogamizi, baramutse bakemuye iki kibazo abatuye umujyi wa Kigali baba bashyizwe igorora.

Kandi na wawundi utarabasha kugura iyo karita uyifite yamufasha bityo urugendo rwe akarukomeza mu mahoro. Bene ayo masosiyete rero nimugerageze mworohereze abagenda mu modoka zanyu, ibibazo bahura nabyo mubikemure mu maguru mashya.

Ikindi mukore ubukangurambaga musobanurire abaturage iby’ikoreshwa ry’ayo makarita, mubumvishe ibyiza byayo kandi munabashe kumva ibibazo bafite mubisubize. Ibi bishobora gukorwa kandi neza muri za gare aho abagenzi bategereje imodoka baba bari ndetse no kuri biro by’izo sosiyete.

Abaturage baramutse basobanukiwe ubu buryo bushya bwo gutwara abagenzi babyitabira kandi bakabyishimira. Ikindi n’izo sosiyete zakunguka kuko iyo urebye usanga imodoka zabo zisigaye zitwara abantu bake kuberako hajemo izo nzitizi.

Ugasanga nk’ imodoka yajyaga ihaguruka kanombe igana mu mujyi yuzuye isigaye igenda itwaye abantu batagera no muri kimwe cya kabiri cy’abo isanzwe itwara. Ariko iyo haza kubaho gusobanurira abaturage wenda byari kumvwa kurushaho. Abwirwa benshi akumvwa na beneyo kandi umurimo unoze ni isoko y’iterambere.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE