2017-10-18 18:43:44 clouds 27o High | Kigali Rwanda

Dukurikire:
 
 

Ibimenyetso bishya bigaragaza ko u Bufaransa bwahaye intwaro abakoze Jenoside

Yanditswe na IMVAHO NSHYA

Kuya 2017-06-28 07:58:54

 
Share on:
 
Yasuwe:237
 
Yavuzweho:200
 
10
 
10

U Bufaransa bushinjwa uruhare rwagize muri Jenoside cyane cyane guha imyitozo abakoze Jenoside ndetse no gushyigikira Leta yayikoze. Ibi ntibikiri ibanga kuko mu myaka 23 ishize raporo zitandukanye zabigaragaje.

Mu gihe hashize imyaka 23 hibukwa uburyo ingabo z’Abafaransa zatereranye Abasesero, hasohotse ibimenyetso bishyashya bigaragaza ko Leta y’u Bufaransa yahaye intwaro abakoze Jenoside bari bahungiye hanze y’u Rwanda kugira ngo batere u Rwanda.

Ibi byakusanyijwe n’umunyamakuru w’umufaransa Patrick de Saint Exupéry. Tariki ya 26 Kamena 2017 yahaye ikiganiro kirambuye France Inter yavuze ko ashingiye ku bimenyetso bifatika byavuye mu nyandiko zashyinguwe ariko zikaza gushyirwa ahagaragara muri Mata 2015 zibigaragaza. Ibi bigaragaza ko uwari inyuma ya byose yari umunyamabanga muri Perezidansi y’u Bufaransa Hubert Vedrine. Bivugwa ko yakoraga ibyabaga byahawe umugisha na Perezida François Mitterand.

Leta y’u Bufaransa ntiyigeze yifuza ko FPR-Inkotanyi yahagaritse Jenoside ifata ubutegetsi, Operation Turquoise yatekerejwe kuko babonaga FPR-Inkotanyi irusha Leta ya Habyarimana imbaraga ku rugamba, ikindi nkuko byatangajwe n’abari bayigize, ubutumwa bwa mbere bwa Operation Turquoise kwari ukubuza FPR gufata Kigali.

JPEG - 83.9 kb
Abasirikare b’Abafaransa bashinjwa uruhare muri Jenoside yakorewe Abatutsi mu 1994

Ni yo mpamvu Leta y’u Bufaransa yakoze iyo bwabaga ngo Operation Turquoise yemezwe n’Akanama k’Umuryango w’Abibumbye gashinzwe amahoro ku isi. Nyuma yo kuyishyigikira, Leta yateguraga Jenoside igatsindwa, bigaragara ko intambara y’abacengezi nyuma ya Jenoside ari Leta y’u Bufaransa yari iyiri inyuma. Ibi kandi ni nyuma yo gukingira ikibaba abakoze Jenoside bidegembya muri icyo gihugu.

Iminsi itatu itazibagirana mu mateka ya Jenoside mu Bisesero; ingabo z’Abafaransa zibasigira Interahamwe

Kuva Jenoside yakorewe Abatutsi mu Rwanda itangira tariki ya 7 Mata 1994, mu karere k’imisozi ka Bisesero ahahoze ari Perefegitura ya Kibuye ubu akaba ari mu karere ka Karongi, kari gatuwe ahanini n’Abatutsi hari hakiri umutekano, kuko abicanyi batinyaga ako karere bitewe ahanini n’amateka yaho.

Abatutsi bo mu Bisesero bazwi nk’Abasesero bahanganye n’ubwicanyi bwakorewe Abatutsi mu gihe cy’ubutegetsi bwa Kayibanda na Habyarimana. Muri Kibuye mu kwezi kwa kane 1994, ubwicanyi bwabereye ahantu hatandukanye nko muri Stade Gatwaro, Home Saint Jean, ku Mugonero ndetse n’ahandi. Abarokokaga ubwo bwicanyi bose bahitaga bahungira mu Bisesero, aho Abasesero bari bishyize hamwe bagasubizayo ibitero by’interahamwe.

Ku ruhande rw’abicanyi imbaraga zashyizwe hamwe ngo bakemure “ikibazo” cyo mu Bisesero, ubuyobozi bwa Perefegitura nabwo bwiyambaza ubuyobozi ku rwego rw’igihugu. Tariki ya 13 Mata 1994, Abasesero batewe n’interahamwe n’abasirikare baturutse mu byahoze ari Perefegitura ya Cyangugu na Gisenyi bafatanyije n’interahamwe zo ku Kibuye.

Abarenze ibihumbi 30 000 bishwe uwo munsi mu barenga ibihumbi 50 000 bari bahungiye mu Bisesero. Abishwe cyane ni abagore n’abana batabashije kwiruka no kwihisha mu misozi ya Bisesero.

Igihe Abafaransa batangizaga “Operation Turquoise” yari igamije kurengera Leta y’Abatabazi yakoraga Jenoside tariki ya 23 Kamena 1994, Abasesero bari bakiri benshi nubwo bicwaga umunsi ku munsi.

Tariki ya 26, Abanyamakuru Mpuzamahanga bari ku Kibuye batabarije Abasesero ari bo Sam Kiley wakoreraga ikinyamakuru Times na Vincent Hugeux wakoreraga L’Express babibwira ingabo z’abafaransa ariko ntibyagira icyo bitanga.

Iminsi itatu itazibagirana mu mateka yo mu Bisesero cyane cyane abayirokotse yabaye hagati ya 27-30 Kamena 1994 ubwo ingabo z’Abafaransa zahageraga ziyobowe n’Interahamwe, mu buhamya Abasesero bakunda gutanga, bavuga ko iyo tariki yageze hakiri Abatutsi barengaga ibihumbi bitanu.

Abari mu buhungiro mu misozi ya Bisesero bakibona ingabo z’abazungu bavuye aho bari bihishe bihuriza hamwe interahamwe zirababona zimenya umubare w’abasigaye. Abafaransa barabasize, bababwira ko bazagaruka mu minsi itatu, abari bizeye ubutabazi basigara mu menyo y’interahamwe.

Iminsi itatu yakurikiyeho batewe umunsi ku munsi n’interahamwe kuko zari zamenye abasigaye kandi bangana iki! Iyo abafaransa batabara Abasesero tariki ya 27 Kamena 1994, ubu abarenga ibihumbi bitanu baba bararokotse Jenoside yakorewe Abatutsi mu Bisesero. Imibare igaragaza ko mu bihumbi birenga 50 000 byari mu Bisesero mu minsi ya mbere ya Jenoside, abatarenga igihumbi na maganabiri ari bo barokotse.

KAMBANDA NOEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE