Advertisement
 
 
 
 
 
 
 
 

Uko Mbibona

EAC ntikwiye kwemera ko u Burundi buyibera kanseri iyimunga   

  Yanditswe na Kayumba Casmiry
 August 2016

 
 

Igihugu cy’u Burundi kiri mu bibazo ariko uko bigaragara n’uko ubutegetsi buriho muri icyo gihugu bushaka gukoresha ibyo bibazo mu kubangamira imikorere isanzwe ya EAC.

Ibyo bibazo mu Burundi byatangiye muri Mata 2015 aho ishyaka riri ku butegetsi, CNDD-FDD, ryatangaje ko Petero Nkurunziza azaribera kandida Perezida mu matora yari ateganyijwe kuba muri Nyakanga muri uwo mwaka ushize.

Ibi byateye imvururu, zigikomeje, kuko itegeko nshinga kimwe n’amasezerano ya Arusha atemereraga Nkurunziza kwiyamamariza manda ya gatatu. Izo mvururu zatumye abantu batari bake bicwa ku mpamvu za politiki naho abasaga ibihumbi 300 batoroka igihugu.

Leta y’u Burundi yakomeje kwingingwa n’amahanga ngo igirane imishyikirano n’abatavuga rumwe nayo, inasabwa ko muri icyo gihugu hakoherezwayo ingabo nyafurika zo kubungabunga umutekano ariko ntibyagira icyo bitanga.

AU yagaragaje imbaraga n’ubushake buke mu kugerageza gukemura ibibazo byo mu Burundi. EAC nayo ntizabe uko kuko u Burundi bumaze kuyibera ikibazo gikomeye. EAC yashyizeho Benjamin Mkapa wahoze ayobora Tanzania ngo abe umuhuza muri ibyo bibazo ariko ugasanga Bujumbura ikomeza guseta ibirenge mu bijyanye n’imishyikirano.

Kugeza ubu yemera ko izashyikirana na buri wese bwacya iti “ntabwo twakwicarana n’abashatse gukora kudeta cyangwa abari bishimiye ko iyo kudeta iba “! EAC rero ntizabe nka AU ubutegetsi bwa Nkurunziza bwanze kwitabira inama yayo ngo ni uko yabereye i Kigali, igaceceka.

JPEG - 58.1 kb
Perezida w’u Burundi Pierre Nkurunziza

Igihugu cy’u Burundi ni kimwe mu bihugu bitandatu bigize umuryango w’ibihugu by’uburasirazuba bwa Afurika (EAC). Iyo igihugu kigiye kwinjira muri uyu muryango kibanza gusinya ko kizubahiriza umurongo ngenderwaho wawo.

Impamvu zituma uyu muryango uriho ni uko ibihugu biwugize byifuje guhuriza imbaraga hamwe ngo zibe zabibera umusemburo w’iterambere mu bintu bitandukanye kandi bifitiye akamaro ababituye, bibona nk’abavandimwe bafite icyerekezo kimwe.

Uko u Burundi ubu bwitwara muri uyu muryango wa EAC biteye ikibazo kandi bigomba gukurikiranirwa hafi. Nkurunziza ntabwo yigeze ahezwa ariko ntabwo yitabira inama z’abakuru b’ibihugu bigize EAC.

Urwitwazo ni uko ngo atasohoka hanze igihugu kiri mu mvururu, ariko na none kudasohoka kwe nta n’ubwo kumara izo mvururu. Uru ni urwitwazo rudafite ishingiro kuko na Sudan y’Epfo iri mu bibazo nyamara Perezida Salva Kir ntasiba inama nkizo.

Ariko Nkurunziza nashaka akomeze areke kujya aho abandi bari mu gufasha mu iterambere rya EAC kuko umuntu umwe muri batandatu atatuma ibintu bihagarara. Ikibazo n’uko ibibazo bye bwite ashaka kubirohamo igihugu cyose, kandi muri za nzira zitajyanye n’amahame ya EAC.

Rimwe mu mahame, risa nk’irigenga ayandi, muri EAC ni uko abagize uwo muryango bahahirana nta nkomyi kandi hakabaho urujya n’uruza mu baturage b’ibihugu bigize uwo muryango.

Vuba aha ariko ubutegetsi mu Burundi bwashyizeho itegeko ribuza abaturage b’icyo gihugu gukomeza guhahirana n’Abanyarwanda. Nkaho ibyo babonye bidahagije bahagarika n’imodoka zatwaraga abagenzi hagati ya Kigali na Bujumbura.

Iyi myifatire y’ubutegetsi mu Burundi ni nka kanseri ibibwa muri uwo muryango. EAC rero igomba kubwira u Burundi ko bitemewe, bwaseta ibirenge bugafatirwa ibyemezo birimo no kuba bwawuhagarikwamo by’agateganyo.

Ibikubiye muri iyi nkuru ni ibitekerezo bwite by’uwayanditse

 

Comments

 
 
Icyo u Burundi bukurikiranye muri SADC gishobora kutazaboneka
Icyo u Burundi bukurikiranye muri SADC gishobora kutazaboneka

Mu muryango w’ubukungu w’ibihugu byo mu majyepfo ya Afurika (SADC) hamaze igihe hari ubusabe bw’ibihugu bibiri byifuza kuba abanyamuryango bashya ariko ubwo busabe ntibwangwe cyangwa ngo bwemerwe. (...)

Tanzania: Kwirukana bamwe mu ishyaka rya CCM bishobora kuzarisigamo imvune
Tanzania: Kwirukana bamwe mu ishyaka rya CCM bishobora kuzarisigamo imvune

Ishyaka riri ku butegetsi muri Tanzania, Chama Cha Mapinduzi(CCM), riherutse gufata ibyemezo bishobora kuzayisigamo imvune ariko nta kundi byagenda kuko aribyo bigomba kurifasha ngo rigumane (...)

FERWAFA ikwiye gusohoza ibyo yemereye Abanyarwanda
FERWAFA ikwiye gusohoza ibyo yemereye Abanyarwanda

Ishyirahamwe ry’umupira w’amaguru mu Rwanda “FERWAFA” riyobowe na Nzamwita Vincent De Gaule rikwiye gusohoza ibyo ryemereye abanyarwanda byo gutangiza shampiyona y’amakipe y’ingimbi (Junior) nk’uko (...)

Igihugu gishakishe  impamvu nyazo zituma abantu bishora mu busambanyi
Igihugu gishakishe impamvu nyazo zituma abantu bishora mu busambanyi

Umuryango w’abanyamakuru biyemeje kurwanya SIDA no guharanira ubuzima buzira umuze (ABASIRWA), umaze iminsi wohereza abanyamakuru hirya no hino mu gihugu kureba uko icyorezo cya SIDA gihagaze (...)

Uburozi si ikibazo ariko Rayon Sports yabyitwayemo nabi
Uburozi si ikibazo ariko Rayon Sports yabyitwayemo nabi

U Rwanda rumaze amezi abiri rwarahagurukiye ikibazo cy’uburozi buvugwa mu mupira w’u Rwanda ndetse runafata ibihano bikarishye byo kubuca burundu. Gusa kugeza n’uyu munsi biracyavugwa mu makipe (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.