2017-06-28 15:02:12 clouds 27o High | Kigali Rwanda

Dukurikire:
 
 

Abanyarwanda bafite ubunararibonye mu gutora batuje

Yanditswe na IMVAHO NSHYA

Kuya 2017-06-13 08:57:02

 
Share on:
 
Yasuwe:255
 
Yavuzweho:200
 
10
 
10

Akarere k’Ibiyaga bigari ndetse n’ibice bimwe bya Afurika bizwiho imvururu zikabije mu gihe cy’amatora ya Perezida wa Repubulika; mu Burundi yasize amagana bishwe ndetse abarenga 400,000 bahungira mu bihugu by’abaturanyi, muri Repubulika iharanira Demokarasi ya Kongo bikomeje gututumba, muri Kenya, mu gihe abiyamamaza bakomeje kuzenguruka igihugu birinda kugera aho bageze mu mwaka wa 2007, nta bwo icyizere kiragaruka neza.

Rimwe na rimwe abiyita inzobere bashaka gufata imiyoborere y’ibihugu by’Afurika byose ko ari imwe, bagafata Afurika nk’Igihugu. Bakumva ko Politiki ari imwe kandi igakorwa kimwe.

Ni byo koko hari abaperezida babi baba bashaka kugundira ubutegetsi ariko hari n’abaperezida beza bakorera abaturage bakifuza ko bakomezanya urugendo.

JPEG - 84.5 kb
Ku biro by’amatora usanga Abanyarwanda bari ku mirongo mu mutuzo

Igihugu cya Singapore cyari mu bukene bukabije mu myaka 60 ishize, nta bwo kiba kigeze aho kiri iyo kitaza kugira Harry Lee Kuan Yew wabaye Minisitiri w’Intebe kuva muri 1959-1990. Amaze gutanga uwo mwanya yahawe umwanya wo kuba “Minisitiri Mukuru” aho yakomeje kuba inararibonye no kugira inama Guverinoma.

Mu Rwanda, kuva Jenoside yakorewe Abatutsi yahagarikwa n’Ingabo zari iza FPR-Inkotanyi, Abanyarwanda bamaze gutegura amatora anyuranye arimo aya Perezida wa Repubulika, ay’abagize Inteko ishinga Amategeko ndetse n’ayemeza Itegeko Nshinga.

Amatora ya Perezida wa Repubulika amaze gukorwa inshuro ebyiri muri 2003 na 2010. Muri uyu mwaka wa 2017 azaba abaye ku nshuro ya gatatu kandi mu mutuzo. Ibi byose akaba ari isomo rikomeye Abanyarwanda bavomye nyuma ya Jenoside yakorewe Abatutsi aho babonye icyo ubuyobozi bubi bushobora gukoresha abaturage.

Mu matora y’umukuru w’igihugu akenshi akorwa hagendewe ku bahagarariye amashyaka, nyuma yo kubona ibyo FPR-Inkotanyi imaze kugeza ku Banyarwanda, amashyaka atandukanye hano mu Rwanda yashyigikiye umukandida Paul Kagame.

Ishyaka Riharanira Demokarasi n’Imibereho Myiza y’Abaturage (P.S.D) ndetse n’Ishyaka riharanira Ukwishyira Ukizana (PL) muri Kongere y’ayo mashyaka yabaye mu bihe bitandukanye muri uku kwezi kwa Kamena, bemeje ko bazashyigira Paul Kagame nk’umukandida mu matora ya Perezida wa Repubulika.

Twibukiranye ko abayoboke b’aya mashyaka nabo bari muri ¾ by’abemerewe gutora bandikiye Inteko ishinga Amategeko basaba ko Ingingo ya 101 ivugururwa mu myaka ibiri ishize kugira ngo Perezida Kagame azashobore kongera kwiyamamariza kuyobora Abanyarwanda. Byaremejwe binyuze muri Referendum yabaye tariki ya 28 Ukuboza 2016.

Ugiye mu mateka ya PSD na PL, usanga yaraharaniye iterambere n’ubwisanzure bw’Abanyarwanda. Ayo mashyaka PSD na PL yavutse mu 1993, akaba yarahanganye n’amashyaka yari ashyigikiye politiki y’urwango, ironda bwoko, ironda karere n’ibindi ari yo MRND na CDR ndetse bamwe mu bayoboke bayo batari no mu bwoko bwahigwaga bahasiga ubuzima.

Politiki mbi ya MRND na CDR ya Hutu Power yari ishyigikiwe kandi inigishwa n’uwari uhagarariye u Bufaransa mu Rwanda icyo gihe Georges Martre, yasize ishegeshe aya mashyaka kuko bamwe bagiye ku ruhande rwa MRND nka Pawa abamaganye ku mugaragaro iyo politiki mbi nabo barabizira.

Nyuma ya Jenoside aya mashyaka yafatanyije na FPR-Inkotanyi kubaka igihugu cyari cyasenyutse ku mugaragaro, ibyagezweho kubera politiki yumvikanyweho n’amashyaka yari agize guverinoma byabereye urugero Afurika ndetse n’isi muri rusange.

Kuba PL na PSD bifatanya na FPR mu gushyigikira umukandida uzaganisha heza, yaba ari amahitamo meza kuko ayo mashyaka meza azi itandukaniro rya politiki mbi na politiki nziza cyane ko yazinyuzemo.

U Rwanda ni igihugu kidasanzwe cyanyuze mu bihe bidasanzwe, bityo rero na Politiki yarwo igomba kuba idasanzwe. Nyuma ya Jenoside inama zabaye nyinshi kugira ngo amahoro agaruke burundu harimo no guca burundu mu ndangamuntu amoko yashyizweho yatandukanyaga Abanyarwanda, maze ivanguramoko, uturere n’ibindi bikurwaho.

Ibi byose ariko Abanyarwanda babifashijwe n’ubuyobozi bwiza bateye imbere barenga ibibazo by’ingutu byari byugarijwe u Rwanda. Ibihe byashize ni byo byari bikomeye. Imbere ni heza.

KAMBANDA NOEL

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE