2017-06-24 09:49:51 clouds 27o High | Kigali Rwanda

Dukurikire:
 
 

Rubavu:Isuku y’amaresitora n’utubari iracyari hasi

Yanditswe na IMVAHO NSHYA

Kuya 2017-04-02 08:22:43

 
Share on:
 
Yasuwe:184
 
Yavuzweho:200
 
10
 
10

Amwe mu maresitora ndetse n’utubari byo mu karere ka Rubavu biranengwa kugira isuku nke muri serivisi zihatangirwa.

Ubushakashatsi bwakozwe n’ikigo cy’Igihugu cy’imiyoborere (RGB) mu mwaka wa 2016 ku miyoborere n’imitangire ya serivisi mu nzego zegereye abaturage, bugaragaza ko isuku mu maresitora n’utubari iri ku gipimo cya 56%.

Ubuyobozi bw’akarere buvuga ko ingamba bugiye gufata zizashingira mu gushyira imbaraga mu bukangurambaga ku isuku ndetse no guhana abazajya bafatwa bagaragayeho isuku nke, aho bemeza ko izi ngamba zizatuma indwara ziterwa n’isuku nke zigabanyuka.

JPEG - 269.2 kb
Ibyo resitora zimwe zitegura biba birangwamo umwanda ukabije

Ubushakashatsi buherutse gushyirwa ahagaragara na RGB, bwerekanye ko muri kano karere igipimo cy’isuku kiri hasi m’utubari n’amaresitora, abakoze ubushakashatsi bakaba barasabye akarere ka Rubavu gufata ingamba zikarishye hakiri kare.

Kayigire Prince, umukozi wa RGB amurika ubushakashatsi mu karere ka Rubavu yagize ati “Ni byiza kugira ngo ubuyobozi bw’akarere bugaragarizwe aho bigeze noneho hafatwe ingamba, kuri iyi nyigo yakozwe hagiye haganirizwa abaturage bagaragaza uko babyumva mu bushakashatsi, icyo dusaba akarere ni ukumenya aho bahagaze noneho bagafata ingamba mu kugira ibyo bahindura.”

Kayigire yerekanye kandi ko mu rwego rw’ubuzima, ubushakashatsi bwagaragaje ko isuku mu ngo z’abaturage no ku mubiri ikiri hasi muri kano karere, aho igeze ku kigero cya 49.6%, mu masoko ahahurira abantu benshi isuku iri ku kigero cya 49.8%, ku mavuriro iri 10.7%.

Iki kibazo gisa n’icyatunguye bamwe mu bayobozi b’inzego z’ibanze muri kano karere ka Rubavu, ubwo bagezwagaho iyi ibyavuye muri ubu bushakashatsi, ndetse bamwe ntibatinye kuvuga ko byabateye ipfunwe n’ubwo hari icyo bagiye kubikoraho.

Umwe yagize ati “Harimo ikibazo gikomeye cyane cyane nko mu maresitora hajya abantu benshi bagiye kurya, ubuzima bwabo babujyana ahantu hameze nabi, bene ayo maresitora bakwiye kugira ibyo bakora, hakongerwa isuku kandi hagafatwa ingamba aho byananiranye.”

Umuyobozi w’akarere ka Rubavu Sinamenye Jeremie, ashimangira ko ubufatanye mu bukangurambaga buzatanga umusaruro ku isuku, mu rwego rwo kurengera ubuzima bw’abaturage.

Aragira ati “Icyifuzo cya twese nk’abayobozi ni uko umuturage abaho yishimiye serivisi ahabwa, ubu rero ibijyanye n’amaresitora tugiye gukaza ingamba dusuzuma kandi aho bizajya bigaragara ko ari ikibazo bazajya babihanirwa.”

Ubu bushakashatsi ku ishusho y’uko abaturage babona imiyoborere n’imitangire ya serivisi, bukorwa n’ikigo cy’igihugu cy’imiyoborere (RGB), bukaba bugira uruhare mu kwesa imihigo aho ibyabuvuyemo bigira uruhare rwa 10% by’amanota akarere kabona.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE