2017-07-21 15:15:02 clouds 27o High | Kigali Rwanda

Dukurikire:
 
 

Nyamasheke: Kolera yishe umuntu abandi bajyanwa mu bitaro

Yanditswe na IMVAHO NSHYA

Kuya 2016-04-20 08:55:13

 
Share on:
 
Yasuwe:45
 
Yavuzweho:200
 
10
 
10

Icyorezo cya Kolera cyibasiye imirenge ya Kagano na Bushekeri mu karere ka Nyamasheke cyahitanye umuntu umwe naho abandi 22 bajyanwa kwa muganga.

Umuyobozi w’ako karere wungirije ushinzwe imibereho myiza y’abaturage, Mukamana Claudette, yahamirije Imvaho Nshya ko umuntu umwe yamaze gupfa.

Avuga ko witabye Imana ari uwitwaga Nkuyamubiri Jean wo mu kigero cy’imyaka 50, wo mu mudugudu wa Nyabageni, mu kagari ka Rwesero, mu murenge wa Kagano , waguye iwe mu rugo yari avuye ku kigo nderabuzima cya Nyamasheke.

Iyo kolera yiganje cyane mu midugudu ya Cyeshero na Rugeregere yegereye ikiyaga cya Kivu iri mu kagari ka Ngoma, hari n’abandi bake bagaragaje ibimenyetso byayo mu kagari ka Mpumbu, mu murenge wa Bushekeri, muri aka karere.

JPEG - 92.3 kb
Isambaza zimwe ziba zifite umwanda zitumaho isazi, bikekwa koa ri zo zateje kolera

Umuyobozi w’ikigo nderabuzima cya Gisakura, Gahungu Jonas, avuga ko iyo ndwara yagaragaye bwa mbere mu cyumweru gishize iturutse ku barobyi 3 bayizanye bakanayikwirakwiza mu bandi baturage.

Abafashwe batangiye kujyanwa kwa muganga bamwe barimo umugore wo mu murenge wa Kagano banegekaye, bahita bajyanwa mu bitaro bya Kibogora. Gahungu avuga ko kuri ubu batangiye gutaha.

Mukamana avuga ko icyo cyorezo giterwa n’umwanda uturuka mu kudatunya isambaza.

Ati’’ iki cyorezo kiraterwa n’umwanda uturuka ku kurya isambaza zo mu kivu zidatunganye zuzuye isazi, kubera n’imvura nyinshi zikaba zitanikwa, bagapfa kuzirya.”

Yakomeje agira ati ”Dushobora gufata umwanzuro wo gufunga Ikivu igihe cy’ukwezi kugira ngo turebe ko yagabanuka, twatangiye no gukora ubukangurambaga urugo ku rundi tubakangurira kugira isuku ihagije, cyane cyane tureba ko abaturage bose bafite ubwiherero, uwo dusanze atabufite akabwubakirwa byihuse , turi no kubasaba kutarya ibisheke mu isoko n’ibindi biribwa bidahiye.’’

JPEG - 152.2 kb
Mukamana Claudette avuga ko ikiyaga cya Kivu gishobora gufungwa ukwezi kose kubera iki cyorezo

Yasabye abaturage kumenya ibimenyetso bya Kolera birimo nko kubabara mu nda cyane, guhitwa, kuruka n’ibindi , uwo bigaragayeho bakihutira kumujyana kwa muganga.

Abaturage banasabwe kwita ku isuku kuri buri rugo, cyane cyane gukaraba intoki umuntu avuye mu bwiherero cyangwa mbere yo kugira icyo ashyira mu kanwa n’ubundi buryo bwose bw’isuku.

Umwaka ushize kolera nanone yavuzwe mu mirenge ya Gihombo na Mahembe; aho naho yahitanye umuntu umwe.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE