2017-06-26 13:56:47 clouds 27o High | Kigali Rwanda

Dukurikire:
 
 

Nyamasheke:Bifuza umuti wo kongera mu ‘dushwambagara’ tw’inzitiramibu bararamo

Yanditswe na IMVAHO NSHYA

Kuya 2016-08-05 08:52:53

 
Share on:
 
Yasuwe:1
 
Yavuzweho:200
 
10
 
10

Abaturage bo mu murenge wa Macuba mu karere ka Nyamasheke, baravuga ko bakomeje kwizezwa n’ubuyobozi bw’akarere kabo igihe kirekire ko bazahabwa inzitiramibu, ubwo buyobozi burinda bucyura igihe batazibonye, none izo batunze zabasaziyeho nta na karishya bafite ngo bongeremo.

Bavuga ko amafaranga bakomeje gutanga bivuza malariya arenze urugero kandi bafite na mituweli, kuko n’uwivuje ngo hashira iminsi malariya ikongera ikamukubita hasi, bakavuga ko n’izo nzitiramibu zishaje bafite ntacyo zibamariye kuko hari n’abafatanya inzitiramibu 2 bakaziraramo ariko imibu ikanga ikinjira.

Mu kiganiro bagiranye n’Imvaho Nshya kandi bagaragaje ko inzitiramubu bafite ziheruka umuti mu myaka 4 ishize kandi nta n’aho bawugura, bakabona igihe nibura haboneka umuti cyangwa ubundi buryo iyi mibu yapfa byabarinda ubukene no guhora hasi kuko ngo bikabije.

Iki ni kimwe mu bibazo bikomeye batuye intumwa za rubanda ziherutse kubasura, aho babagaragarije ko uyu muti uramutse ubonetse nibura hari icyo baramura ku mafaranga yo kwivuza malariya bakanaryama bagasinzira kuko n’iduhira ry’iyi mibu ribabuza gusinzira, bamwe ngo bakarara bakanuye bugacya.

JPEG - 236.3 kb
Aba baturage bifuza ko niba inzitiramibu nshya zarabuze bahabwa karishya bagatera mu zishaje bafite (Foto Bahuwiyongera S)

Nzaramba Joseph utuye mu kagari ka Nyakabingo yagize ati“Hashize imyaka 3 ubuyobozi butwizeza inzitiramibu malariya ikomeza kuturembya twizeye ngo zizaza none amaso yaheze mu kirere.

None ba nyakubahwa ntumwa zacu, ko hari udushwambagara tw’inzitiramibu tugifite, ntimwatubonera karishya tugapfa kuba dushyizemo ahari ko uwo muti wakwirukana imwe mu mibu irara ituduhira mu matwi, bikaba byagabanya n’iyi malariya imaze kutubikamo umuze. Izo nzitiramibu twijejwe igihe kirekire zikazajya kuza nibura zisanga tutarazahaye.”

Bavuga ko ibindi byose basabwe babikoze, harimo gukuraho ibihuru, ibigunda n’ibizenga byegereye ingo zabo, isuku n’ibindi, ariko ko kutagira umuti mu nzitiramibu zishaje, zifite n’ibyenge binini bafite bikomeje kubabera ikibazo.

Mu gihe intumwa za rubanda zabijeje ubuvugizi kuko zavuze ko iki kibazo cyumvikana kandi na zo zitumva impamvu mu gihe inzitiramibu nshyashya zibuze nibura hataboneka iyo karishya bagapfa kuba bashyize mu zo bafite ku bakizifite, Guverineri w’Intara y’Uburengerazuba, Mukandasira Caritas, avuga ko iki ari ikibazo kiri hose gikwiye ubuvugizi bwihariye.

Yagize ati“Ikibazo cy’inzitaramibu, zaba ari shyashya, yaba ari n’iyo karishya kiri hose mu ntara, tukaba dukomeje gukora ubuvugizi ngo turebe ko cyakemuka na malariya igabanuke abaturage bareke guhora hasi, bahaguruke bakore ibibateza imbere.”

Abaturage bo mu karere ka Nyamasheke cyane cyane abatuye mu mirenge ikora ku kibaya cya Bugarama bamwe mu bakunze kwibasirwa cyane n’indwara ya Malaria yongereye ubukana kuva mu mpera z’umwaka ushize, nyuma y’igihe kirekire malariya isa n’iyacitse mu Rwanda.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE