2017-08-22 09:34:31 clouds 27o High | Kigali Rwanda

Dukurikire:
 
 

Nyamasheke: Abaturage ntibagifitiye icyizere imiti ya Malariya

Yanditswe na IMVAHO NSHYA

Kuya 2016-06-07 10:05:57

 
Share on:
 
Yasuwe:6
 
Yavuzweho:200
 
10
 
10

Bamwe mu baturage bo mu murenge wa Macuba, mu karere ka Nyamasheke bivuriza ku kigo nderabuzima cya Hanika, baravuga ko bafite impungenge ko imiti ya Malariya bahabwa ishobora kuba itagifite ubushobozi bwo kubavura.

Bavuga ko ngo umuntu asigaye ajya kwa muganga bakamusangamo Malariya bakamuha n’imiti, nyamara hashira iminsi mike cyane akongera agafatwa, bakibaza impamvu bikabayobera.

Iki kibazo aba baturage bakigejeje no ku ntumwa za rubanda mu nteko ishinga amategeko, umutwe w’abadepite, ziherutse kubasura.

Intumwa za rubanda na zo ziyemeje kukigeza kuri Minisiteri y’ubuzima ngo harebwe niba ikibazo ari imiti itagifite ubushobozi koko, cyangwa niba hari izindi mpamvu haherewe ku byo aba baturage bavuga, bamarwe impungenge.

JPEG - 227.5 kb
Aba baturage bagaragaje ko bakemanga imiti ya Malariya basigaye bahabwa (Foto Bahuwiyongera S)

Kwitonda Ezra wo mu mudugudu wa Gitwa, akagari ka Rugali muri uyu murenge wa Macuba, yagize ati:“Nivuriza ku kigo nderabuzima cya Hanika ariko dufite ikibazo gikomeye cyane cyo kuba tujya kwivuza bakadusangamo Malariya, bakaduha ibinini bya coartem, n’utundi tw’umuriro tunywa mu gihe cy’iminsi 3 kuko batayirenza, wabimara ugasa nk’uworohewe, hashira iminsi mike ukongera ukarwara, tukibaza impamvu.”

Yongeyeho ati:“Narwaye Malariya hagati mu kwezi kwa kane ngiye kwa muganga bayinsangamo, bampa n’imiti ndataha, nyirangije mera nk’uworohewe ngira ngo ndakize, ariko ku wa 28 Gicurasi ndongera njya hasi noneho mererwa nabi cyane.
Ngeze kwa muganga nsanga n’abandi bavuga ko bagarutse n’abavuga ko bagaruye abana, ko imiti bahawe ntacyo yabamariye, bituma twibaza byinshi kuri iyi miti ya Malariya duhabwa.Ese iyi miti yarengeje igihe, yaba itakivura, ni hano gusa biri, cyangwa ?”

Ntabana Emmanuel, utuye mu mudugudu wa Bunyamanza muri aka kagari, na we yagize ati:“Tubona rwose iriya miti nta ngufu igifite zo guhangana na Malariya dufite ino kuko yabaye igikatu, dusanga bari bakwiye guhindura bakaduha indi miti ishoboye guhangana n’iyi Malariya, kuko amafaranga agiye kudushiramo twivuza, ubukene bukaba burushaho kudusatira.”

Umuyobozi w’iki kigo nderabuzima Soeur Marie Florence Mukashema, abamara impungenge avuga ko imiti bahabwa nta kibazo ifite, gusa na we akemera ko Malariya ifite ubukana bukaze binatewe n’aho batuye, bikaba bishoboka ko umuntu yivuza, hashira iminsi akongera akarwara bitewe n’imibu avuga ko yabaye myinshi kubera ibishanga baturiye.

Yagize ati:“ Malariya turayivura rwose kuko itavuwe bashira kandi imiti idafite ubushobozi baba bahora barwaye.Imiti yo ntibayigireho impungenge na gato kuko iyo umuntu ayifashe neza imuvura rwose, kandi ntitwigeze tunayibura.

Ahubwo bishoboka ko kubera ko imidugudu myinshi ituriye igishanga, imibu yabaye myinshi cyane nta n’inzitiramibu abaturage bafite kikaba ikibazo, ariko impungenge ku miti zo bazishire.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE