2017-09-24 09:25:05 clouds 27o High | Kigali Rwanda

Dukurikire:
 
 

Minisitiri w’Intebe yasabye ibihugu bya Afurika kwigira ku byo u Rwanda rwagezeho mu rwego rw’ubuzima

Yanditswe na IMVAHO NSHYA

Kuya 2017-06-27 10:18:41

 
Share on:
 
Yasuwe:57
 
Yavuzweho:200
 
10
 
10

Minisitiri w’Intebe, Anastase Murekezi yavuze ko gahunda zo kubungabunga imibereho myiza y’Abanyarwanda, nk’ubudehe n’ubwisungane mu kwivuza zikwiye kubera isomo ibihugu bya Afurika mu kuvugurura urwego rw’ubuzima.

Mu nama yahuje impuguke n’abayobozi mu rwego rw’ubuzima bo ku mugabane wa Afurika yabereye i Kigali, kuri uyu wa 27 Kamena 2017, Minisitiri Murekezi yavuze ko ibihugu byo kuri uyu mugabane byihaye intego y’uko muri 2063 buri munyafurika azaba agerwaho na serivisi z’ubuzima bimworoheye.

Yasabye ibihugu gukorana ndetse bikungurana ubumenyi kugira ngo iyo ntego igerweho, atanga urugero ku Rwanda rwahanze ibisubizo ku bibazo byihariye byari bibangamiye ubuzima bw’abaturage nyuma ya Jenoside yakorewe Abatutsi mu 1994.

Ati “ Kuva mu 1994, u Rwanda rwakoze amavugurura mu rwego rw’ubuzima, hazamo ibisubizo bitari bisanzwe nk’ubudehe n’ubwisungane mu kwivuza. Guverinoma yashyizemo ingufu n’amafaranga kugira ngo abanyarwanda babone serivisi zo kwivuza zigera hose ku buryo bungana.”

JPEG - 69.3 kb
Minisitiri Murekezi ageza ijambo ku bitabiriye inama yiga ku buzima muri Afurika

Yongeyeho ko u Rwanda rwabaye icyitegererezo mu mahanga kubera gushyira mu bikorwa intego z’ikinyagihumbi ku rugerio rushimishije.

Ati “Izo mbaraga zose zatumye u Rwanda ruba kimwe mu bihugu bya Afurika bifite abaturage 90% bakingiye indwara kandi babona aho bivuriza. Ubwisungane mu kwivuza bwatangijwe mu 2004 none 84.6% barabukoresha.”

Minisitiri w’Intebe yasabye ibihugu bya Afurika gushyira hamwe bigafata imyanzuro ikomeye izahindura ubuzima bw’abatuye umugabane.

Inama yiga ku buzima bw’abatuye umugabane wa Afurika yateguwe n’ishami rya Loni ryita ku buzima, WHO, ibaye ku nshuro ya mbere. Ifite intego yo gukemura ibibazo bigitume bamwe mu baturage batabona serivisi z’ubuzima ahanini bitewe n’ubukene.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE