2017-10-16 07:05:01 clouds 27o High | Kigali Rwanda

Dukurikire:
 
 

Imirire mibi ishobora kuba amateka mu Rwanda-MINISANTE

Yanditswe na IMVAHO NSHYA

Kuya 2017-03-19 09:10:38

 
Share on:
 
Yasuwe:191
 
Yavuzweho:200
 
10
 
10

Minisitiri w’Ubuzima Dr. Diane Gashumba yagaragaragaje uburyo imirire mibi ishaobora gucika burundu mu Rwanda nubwo ubushakashatsi bwakozwe mu mwaka wa 2014 bwagaragaje ko indwara ziyikomokaho ziri mu 10 za mbere zivuzwa cyane mu gihugu.

Guhera mu mwaka wa 2009, Guverinoma y’u Rwanda yashyize imbaraga mu gufasha rubanda guhindura imyumvire ku imirire cyane cyane abakiri bato, abagore batwite n’abonsa binyuze mu mahugurwa n’inama zitandukanye.

Ibi byatanze umusaruro ufatika kuko imibare y’abana bagwingira bakiri munsi y’imyaka 5 y’amavuko bavuye kuri 44% yabarwaga icyo gihe mu gihugu hose kuri ubu ikaba igeze kuri 38% .

JPEG - 283.3 kb
Ibiribwa byose byafasha mu guhangana n’imirire mibi byoroshye kuboneka mu Rwanda

Mu muhango wo gusoza icyumweru cyahariwe kwita ku buzima kuri uyu wa 18 Werurwe 2017, Minisitiri w’Ubuzima Dr Diane Gashumba yahamije ko imirire mibi izacika burundu igihe buri wese azaba yakoze icyo asabwa ngo icike.

Yashimangiye ko kuba mu Rwanda hakirangwa indwara zikomoka ku mirire mibi bishingiye ku myumvire kurusha uko byaba bituruka ku kubura ibiribwa.

Yagize ati “Kurya neza bisaba ibiryo birimo intungamubiri zuzuye (imboga, imbuto, ibishyimbo, ibijumba…), umuturage akagira akarima k’igikoni ntabwo ari ikintu kigoye. Twese dufatanyirije hamwe, ababyeyi bose bakabyumva ntibagurishe imboga kugira ngo babone amafaranga yo kujya kujywa urwagwa, abajyanama bagakomeza gushyiramo imbaraga, imirire mibi yacika mu gihugu.”

JPEG - 358.6 kb
Muri iki cyumweru abaturage bapimwe indwara zitandura ku buntu

Yakomeje ashimangira ko kurya neza atari ukurya ibihenze ahubwo bisaba kugira imyumvire yagutse, kugira isuku no gukurikiza gahunda zo kwita ku buzima ziteganywa na muganga.

Yanashimiye Minisiteri y’Ubuzima (MINISANTE), iy’Ubuhinzi (MINAGRI), iy’Uburezi (MINEDUC), iy’Ubutegetsi bw’Igihugu (MINALOC), n’iy’Uburinganire n’iterambere ry’Umuryango (MIGEPROF) zahuje imbaraga mu guhashya iki kibazo.

Guverinoma y’u Rwanda yashyizeho gahunda ya Shisha Kibondo yunganira imiryango itishoboye mu kugaburira abana n’ababyeyi batwite n’abonsa, ikaba yitezweho kugira uruhare rukomeye mu guhashya imirire mibi aho ikirangwa mu gihugu.

Abenshi bamaze gusobanukirwa ko kuba bakirwaza indwara zikomoka ku mirire mibi biterwa n’imyuvire. Umwe mu bavuganye n’Imvaho nshya mu murenge wa Gahunga, Akarere ka musanze, yagize ati “Ni imyumvire mibi kurwaza umwana bwaki. Umubyeyi abyuka ajya mu kazi ku mugoroba, yataha agafata ibishyimbo akagerakaho ibijumba akabigaburira wa mwana w’imyaka ibiri kandi urumva ntaba abishoboye.”

Bavuga ko ibyo kurya bahinga n’ibyo basanga ku isoko byujuje intungamubiri zose ariko ikibazo kikiri mu kubitegura mu buryo bunogeye buri wese.

JPEG - 332.3 kb
Hasozwa icyumweru cyahariwe ubuzima mu karere ka Kicumbi, hashimiwe abajyanama b’ubuzimabahabwa n’ibikoresho
JPEG - 287.6 kb
Ibitaro by’icyitegererezo na byo byahawe ibihembo
atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE