2017-08-22 09:34:31 clouds 27o High | Kigali Rwanda

Dukurikire:
 
 

Iminsi 100 yo Kwibuka irasiga abapfakazi n’incike 2400 bavuwe amaso

Yanditswe na IMVAHO NSHYA

Kuya 2017-05-02 08:39:01

 
Share on:
 
Yasuwe:210
 
Yavuzweho:200
 
10
 
10

Iminsi 100 yo kwibuka ku nshuro ya 23 Jenoside yakorewe Abatutsi irasiga abapfakazi n’inshike za Jenoside yakorewe Abatutsi 2400 bavuwe amaso n’Umuryango mpuzamahanga Vision for a Nation Foundation.

Umuyobozi w’Umuryango wita ku bapfakazi ba Jenoside yakorewe Abatutsi AVEGA AGAHOZO Mukabayire Valerie avuga ko kuva abanyamuryango ba AVEGA AGAHOZO batangira kuvurwa amaso n’Umuryango Vision for a Nation Foundation mu 2015 hamaze kuvurwa abanyamuryango 1800 ndetse uyu mwaka ngo hakaba hazavurwa abandi bapfakazi n’inshike za Jenoside yakorewe Abatutsi bagera kuri 600.

Yagize ati “ Mu mwaka wa 2015 havuwe amaso abapfakazi ba Jenoside yakorewe Abatutsi 1000, mu mwaka wa 2016 havurwa abandi 800 ubu hazavurwa abandi 600. Twizeye ko iki gikorwa kizakorwa neza nk’ibindi byakibanjirije. Iminsi 100 twibuka Jenoside yakorewe Abatutsi ku nshuro ya 23 izarangira hamaze kuvurwa abagera ku 2400.”

JPEG - 131.7 kb
Umuganga wa Vision for a Nation Foundation asuzuma umurwayi amaso

Yakomeje avuga ko igikorwa cyo kuvura abapfakazi ba Jenoside yakorewe Abatutsi amaso cyababereye ingirakamaro cyane.

Ati “ Abapfakazi ba Jenoside yakorewe Abatutsi benshi bari bafite ikibazo cyibakomereye cy’amaso ariko aho abenshi bavuriwe ndetse bagahabwa n’indorerwamo z’amaso, abenshi bibumbiye mu mashyirahamwe batangira gukora imirimo ibafasha kwiteza imbere nko kuboha ibikoresho bimwe na bimwe hifashishijwe amasaro n’ibindi.”

Ubwo hatangizwaga ku mugaragaro igikorwa cyo kuvura amaso abapfakazi n’inshike za Jenoside yakorewe Abatutsi mu mpera z’icyumweru gishize, Umuyobozi wungirije wa Vision for a Nation Foundation mu Rwanda Uwamahoro Pacifique yavuze ko bazavura abapfakazi ndetse n’inshike za Jenoside yakorewe Abatutsi basaga 600 mu gihugu hose ariko igikorwa cyatangijwe cyo kuvura amaso gitandukanye n’ibindi bikorwa byari bisanzwe kuko harimo kwita ku bapfakazi n’inshike barokotse Jenoside yakorewe Abatutsi.

Yagize ati “ Ubundi ibikorwa byo kuvura amaso bikorwa na Vision for a Nation Foundation bikorwa mu gihugu hose ku buryo buhoraho ariko ubu ni igikorwa cy’umwihariko twerekeje amaso yacu ku bapfakazi n’inshike za Jenoside yakorewe Abatutsi nitumara gusoza igikorwa cyo kuvura abantu 600 twiyemeje kuvura, tuzakomeza gutera inkunga igikorwa cyo kuvura amaso. Ntabwo ari ukubavura gusa ahubwo ni n’uburyo bwo kubafata mu mugongo muri iyi minsi twibuka Jenoside yakorewe Abatutsi.”

JPEG - 156.7 kb
Abakeneye indorerwamo z’amaso barazihabwa

Uwamahoro yakomeje avuga ko ibibazo by’amaso bafite bimwe na bimwe ari umwihariko kuko byakomotse ku ngaruka za Jenoside yakorewe Abatutsi ndetse n’bindi bibazo bafite bahuriyeho n’abandi banyarwanda bari mu myaka nk’iyabo y’ubukure.

Umuyobozi wa AVEGA AGAHOZO avuga ko umuryango wa Vision for a Nation Foundation wabemereye ko buri mwaka uzajya uvura abapfakazi runaka amaso. Yagize ati “ Imyaka itatu irashize ibyo badusezeranyije babikora baraza bakadupima indwara z’amaso bakatuvura, abakeneye indorerwamo z’amaso bakazihabwa, abafite uburwayi bukomeye bakeneye kubagwa bagakomeza bakabakurikirana bakabagwa.

Umwe mu bapfakazi ba Jenoside yakorewe Abatutsi Mukashema Esperance wavuwe amaso yavuze ko ubuvuzi yahawe abwishimiye kuko atari kubona ubushobozi bwo kwivuza amaso. Yagize ati “Ntabwo nari kubona ubushobozi bwo kwivuza amaso, nishimiye cyane ubufasha mpawe nkaba mvuwe amaso.”

JPEG - 139 kb
Abamaze kuvurwa bahabwa imiti ndetse n’indorerwamo z’amaso abarembye bagakurikiranwa bakabagwa amaso

Imvaho Nshya yasuye ababyeyi b’inscike za Jenoside yakorewe Abatutsi bari mu nzu y’amasaziro Impinganzima i Kayonza bavuwe amaso bavuga ko bishimiye igikorwa cyo kuvurwa amaso bakorewe. Mukaruziga Virginie w’imyaka 93 yatangarije Imvaho Nshya ko ataravurwa amaso yajyaga amubabaza ariko bikaba byarakize.

Nyirabibanza Athanasie we avuga ko amaso yajyaga amwokera ariko nyuma yo kuvurwa akaba yumva yarakize neza.

Kagoyire Beatrice uba hafi ababyeyi b’incike baba mu nzu y’amasaziro Impinganzima yavuze ko bane muri barindwi baba muri uyu muryango bahoraga bataka amaso ariko kuba bavuwe ngo ni igikorwa bishimiye cyane.

Yagize ati “Abenshi muri bo bahoraga bataka amaso rimwe na rimwe tukabajyana kwa muganga ariko kuba twarabonye abagiraneza bakabavura ni igikorwa cyo kudutabara twarabyishimiye.”

JPEG - 124.7 kb
Kagoyire Beatrice avurwa amaso

Umuyobozi Mukuru ushinzwe ibikorwa by’ubuvuzi n’ubuzima rusange muri Minisiteri y’Ubuzima Dr. Dushime Théophile yavuze ko igikorwa Vision for a Nation Foundation yatangiye ari cyiza cyane kuko cyunganira Leta mu kwita ku bapfakazi n’inshike za Jenoside yakorewe Abatutsi.

Dr. Dushime yakomeje avuga ko uburwayi bw’amaso buriho mu Rwanda cyane cyane ku bantu bageze mu myaka y’ubukure ariko ngo hashyizweho uburyo bwo kuvura amaso aho abaganga benshi bamaze guhugurwa bahereye ku bigo nderabuzima mu gihugu hose.

Vision for a Nation Foundation ni Umuryango ufite ubuzima gatozi bwo mu gihugu cy’u Bwongereza akaba ari Umuryango washinzwe mu 2010 na rwiyemezamirimo ukunda gufasha mu bijyanye n’ imibereho myiza y’ abaturage batishoboye James Chen. Kuva Umuryango Vision for a Nation wagera mu Rwanda mu 2012 ukorana bya hafi na Minisiteri y’Ubuzima (MINISANTE), mu bikorwa byo kuvura amaso.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE