2017-12-12 14:14:08 clouds 27o High | Kigali Rwanda

Dukurikire:
 
 

Ibigo mbonezamikurire byakemuye ibibazo by’imirire mibi n’ihohoterwa mu bana

Yanditswe na IMVAHO NSHYA

Kuya 2017-06-02 09:13:47

 
Share on:
 
Yasuwe:81
 
Yavuzweho:200
 
10
 
10

Minisitiri w’Uburinganire n’Iterambere ry’Umuryango, Nyirasafari Esperance, arasaba ababyeyi kwitabira kujyana abana mu bigo mbonezamikurire kuko bifasha kurinda abana ibibazo by’imirire mibi n’ihohoterwa bikanafasha ababyeyi kubona aho basiga abana kandi hizewe.

Ibi Minisitiri Nyirasafari yabishimangiye mu nama nyunguranabitekerezo ku ruhare rw’imikino mu bana bato n’ibigo mbonezamikurire mu kurera umwana mu gihagararo no mu mitekerereze, inama yahuje inzego zinyuranye zifite aho zihurira n’umwana muto, yabereye i Kigali kuri uyu wa Kane, tariki ya 01 Kanama 2017.

Afungura iyi nama ku mugaragaro, Minisitiri w’Uburinganire n’Iterambere ry’Umuryango, Nyirasafari Esperance, yagarutse kuri gahunda y’imbonezamikurire y’abana bato ifite uruhare mu kubategurira kwiga no gutekereza hakiri kare, bagakura mu bwenge no mu gihagararo.

Ati “Gahunda y’imbonezamikurire ni urusobe rwa serivisi zinyuranye zihabwa abana bakivuka kugera ku myaka 6. Iyi gahunda ituma umwana akura mu gihagararo no mu bwenge akanagira umutekano aho ari.”

JPEG - 257.6 kb
Nyirasafari Esperance, Minisitiri w’Uburinganire n’Iterambere ry’Umuryango na Tedy Maly, Umuyobozi wa UNICEF mu Rwanda (Foto James R.)

Ashimangira kandi ko iyi gahunda ifasha gukemura ibibazo by’imirire mibi ku bana bajyanwayo kuko hari abajyanama b’ubuzima bayirimo bahita bamenya niba umwana afite imikurire myiza ijyana n’imirire cyangwa itari myiza.

Ati “Iyi gahunda irimo abajyanama b’ubuzima batari bake, iyo babonye rero umwana ufite imikurire mibi, bamukorera ubuvugizi akajyanwa kwa muganga agatangira gukurikiranwa anahabwa ibimufasha kuzamura intungamubiri, bityo ikibazo cy’imirire mibi kigakemuka gutyo.”

Muri iyi gahunda kandi, ngo ababyeyi bagira umwanya wo gusobanurirwa uburyo bwiza bwo kwita ku bana nko kwigisha umwana gusoma, gukina n’isuku.

Nyirasafari yaboneyeho akanya ko gushishikariza ababyeyi kuyitabira, yongeraho ko intego ya Leta kuri iyi gahunda ari uko haboneka ikigo mbonezamikurire kuri buri kagali.

Umuyobozi w’Ishami ry’Umuryango w’Abibumbye ryita ku bana (UNICEF), Tedy Maly, na we yashimye cyane iyi nama yateguwe n’Umuryango Umuhuza igamije kwibutsa ababyeyi n’abarezi akamaro k’imikino ku bana n’uburyo buri wese akwiye kugira uruhare mu mikino y’abana.

Yagize ati “Imikino ifitiye abana akamaro kanini kuko ibafasha kuvumbura imbamutima zabo, kwisanzura no gusabana hagati yabo ubwabo cyangwa hagati yabo n’ababyeyi ndetse n’abarezi.”

Tedy yasabye ababyeyi kugira uruhare runini mu mikino y’abana babashakira ibikinisho bijyanye n’umuco, kuko iteza imbere imibanire y’abana, ikabongerera ubwenge.

Ati “Uruhare rw’ababyeyi ni ingenzi mu mikino y’abana kuko gukina kw’abana n’ababyeyi bizana ubusabane hagati yabo, bakabagirira icyizere kandi bakababonamo urukundo.”

Yasoje ashimira Leta y’u Rwanda yashyize imbere gahunda mbonezamikurire kandi ikayikangurira ababyeyi n’abandi bafatanyabikorwa, ikaba igenda itanga umusaruro mu mikurire y’abana bato.

Umuyobozi w’Umuryango Umuhuza, Kayitesi Mathilde, na we yagarutse cyane ku ruhare rw’ibikinisho mu mikurire n’imyigire y’abana, aho avuga ko umwana muto agomba gufashwa gukina, yanagera igihe cyo kwiga amasomo ye agahuzwa n’imikino kugira ngo arusheho kuyafata.

Yanenze ababyeyi badafasha abana babo gukina, kuko asanga hari amahirwe baba babavutsa, aho agaruka kuri siyansi yemeza ko mu myaka 3 umwana avutse agomba kuhabwa ibimufasha gukangura ubwonko bwe, bikaba birimo imikino, ibikinisho bijyanye n’imyaka ye no kumutoza ibintu bimufasha gukangura imbamutima ze.

Inama nyunguranabitekerezo kuri gahunda mbonezamikurire yateguwe n’Umuryango Umuhuza ku bufatanye na UNICEF, ikaba yaritabiriwe n’abayobozi b’uturere bungirije bashinzwe imibereho myiza y’abaturage, abafite amashuri y’inshuke, Minisiteri y’Uburinganire n’Iterambere ry’Umuryango n’abandi bafatanyabikorwa, nka kimwe mu bikorwa bijyanye n’imyiteguro yo kwizihiza umunsi w’umwana w’umunyafurika.

MUGISHA BENIGNE

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE