2017-10-16 07:05:01 clouds 27o High | Kigali Rwanda

Dukurikire:
 
 

Guverineri Munyantwari yashimiye akagari kesheje umuhigo wa mituweli 100%

Yanditswe na IMVAHO NSHYA

Kuya 2017-03-24 07:33:22

 
Share on:
 
Yasuwe:174
 
Yavuzweho:200
 
10
 
10

Guverineri w’intara y’Uburengerazuba Munyantwari Alphonse, yashimiye akagari ka Karambo ko mu murenge wa Kanama ho mu karere ka Rubavukesheje umuhigo wo kwitabita ubwisungane mu kwivuza, mituweli ku kigero cya 100%.

Uyu muyobozi asaba ko n’utundi tugari tugize intara y’Uburengerazuba cyane mu karere ka Rubavu twakwigira kuri ako kagari.

Umunyamabanga nshingwabikorwa w’aka kagari kabaye indashyikirwa mu kwitabira ubwisungane mu kwivuza, avuga ko kugira ngo bagere kuri iyi ntego byatewe no gukorera hamwe no kwihuriza abaturage mu matsinda, kandi byose bigakorwa mu bwumvikane, buri muturage yumva neza ko ari we bifitiye akamaro.

Rugatinya Vianney, umunyamabanga nshingwabikorwa w’akagari ka Karambo avuga ko kugeza ubu ubwitabire bw’abaturage ayoboye bugeze ku kigero cya 100%, aho buri muturage yamaze kuyatanga ndetse ubu igikurikiyeho akaba ari ugutangirea gukusanya ay’umwaka ukurikiyeho.

JPEG - 286 kb
Guverineri Munyantwari asaba abaturage kwitabira ubwisungane mu kwivuza (Foto Iyaremye Y)

Yemeza ko kugira ngo bigerweho byatewe n’imyumvire yazamutse mu baturage, kumenya umumaro wo gushingana ubuzima, by’umwihariko ibanga ryo gukusanya aya mafaranga binyuze mu matsinda naryo rikaba ryarabafashije cyane.

Aragira ati “Ubu twe mu kagari nta kibazo cy’ubuzima dufite buri muturage yarishinganye, twakoze ubukangurambaga bwimbitse abaturage barabyumva, ubu natwe turashishikariza abandi batuye mu tundi tugari kubyitabira bose bakatureberaho.Ikindi ubu twatangiye no kuzigamira umwaka utaha ku buryo tuzakomeza kuza imbere.”

Guverineri w’intara y’Uburengerazuba Munyantwari Alphonse, yashimiye cyane abaturage n’abayobozi b’aka kagari, avuga ko n’ubundi nta muturage wari ukwiye kubaho atagira ubwisungane mu kwivuza.

Guverineri Munyantwari yaboneyeho n’umwanya wo gusaba n’abandi banyamabanga nshingwabikorwa kugera ikirenge mu cy’aka kagari, kugira ngo ibibazo bijyanye n’abaturage batagira mituweli bikemuke burundu.

Aragira ati “Aka kagari gakwiye kwigirwaho, abaturage bakwiye gutanga mituweli bibavuyemo bazi akamaro kayo, kugeza ubu ntibyari bikwiye kubaho ko hagira umuturage ubaho adasobanukiwe n’akamaro ka mituweli ari nayo mpamvu dusaba buri wese kubigira ibye.”

Guverineri Munyantwari akomeza asaba abayobozi b’inzego z’ibanze guhozaho mu gukangurira abaturage kwitabira ubwisungane mu kwivuza, ndetse no kwibumbira mu matsinda azigamira ubwisungane mu kwivuza.

Umuhigo wo gukangurira abaturage kwitabira mituweli ni umwe mu yakunze guhesha amanota mabi akarere ka Rubavu, bikanatuma kaza mu myanya ya nyuma mu kwesa imihigo muri rusange. Mu gihe n’utundi tugari twose two muri aka karere twagera ikirenge mu cy’aka, byafasha aka karere kugera ku ntego kihaye wo kuza mu turere twa mbere mu kwesa imihigo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE