2017-06-28 08:00:46 clouds 27o High | Kigali Rwanda

Dukurikire:
 
 

Abagana ibitaro bya Kabgayi batakiye Mgr Mbonyintege kubera serivisi mbi bahabwa

Yanditswe na IMVAHO NSHYA

Kuya 2017-04-05 05:41:06

 
Share on:
 
Yasuwe:386
 
Yavuzweho:200
 
10
 
10

Ubwo hizihizwaga umunsi w’abarwayi ku bitaro bya Kabgayi, abivuriza kuri ibi bitaro bagaragarije Musenyeri wa Diyosezi ya Kabgayi, ari nayo icunga ibyo bitaro ko batoroherezwa kubonana na muganga iyo boherejwe n’ibigo nderabuzima kugira ngo bahabwe ubufasha ku rwego rw’ibitaro.

Bamwe muri aba barwayi bafashe ijambo babwira ubuyobozi bw’ibitaro bya Kabgayi ko nta serivisi nziza bahabwa n’abakozi, kuko iyo bahageze bamara igihe kinini bashaka muganga ariko ntibamubone bitewe no kutoroherezwa, bagasaba ko iki kibazo cyakemuka kuko kibatakariza umwanya ndetse n’amafaranga abatunga muri ibi bitaro.

Mbuguye Wellars, umurwayi uhagarariye bagenzi be muri ibi bitaro, avuga ko ikibazo cyo gusiragizwa kimaze igihe kivugwa muri ibi bitaro kandi ko badahwema kukigaragaza ariko ntigikemuke, ahubwo bakamuha gahunda batubahiriza ku buryo bimaze kubarambira we n’abandi barwayi bari kumwe.

Yagize ati “Twebwe abarwayi bivuriza muri ibi bitaro turasaba ubuyobozi bw’ibitaro gukosora no kwita ku kibazo cy’abagana ibitaro kuko kiduhangayikishije cyane, kuko duhabwa igihe cyo kubonana na muganga ariko nticyubahirizwe.»

JPEG - 336.9 kb
Bamwe mu bawayi barwariye mu bitaro bya Kabgayi bifuza kujya bahabwa serivise zinoze

Uyu murwayi yongeyeho ko benshi muri bagenzi be usanga basiragizwa kandi badafite amikoro ahagije yo kuguma mu bitaro cyangwa kugaruka inshuro nyinshi bitewe na gahunda zitubahirizwa baba bagenderaho, akavuga ko icyifuzo ari uko gahunda bahabwa yajya igenderwaho kandi igakurikizwa uko bikwiye.

Umushumba wa Diyoseze ya Kabgayi ibi bitaro bibarizwamo Musenyeri Smaragde Mbonyintege, avuga ko kudaha abarwayi serivisi nziza bifuza biterwa n’’umubare udahagije w’abaganga kandi ko abagana ibi bitaro ari benshi ugereranyije n’abagomba kubavura.

Yakomeje agaragaza ko imiterere y’ibitaro n’aho bibarizwa ari hafi y’umuhanda ku buryo usanga biba impamvu yo kuganwa n’abarwayi benshi.

Yagize ati:«Ni byo koko ibyo abarwayi bavuga ni ukuri ntabwo bituruka kuri serivisi mbi bahabwa n’abakozi, ahubwo biterwa n’umubare muto w’abaganga dufite, kubera ko haburaho abagera kuri batanu.»

Kamana Sostene, Umuyobozi w’ishami ry’ubuzima mu Karere ka Muhanga, avuga ko iki kibazo kibareba nk’Akarere ku buryo cyanashyizwe mu ngengo y’imari y’uyu mwaka, bityo ngo hari gukorwa ubuvugizi kuri Minisiteri y’ubuzima kugira ngo abaganga babura muri ibi bitaro bya Kabgayi baboneke mu rwego rwo guha ibitaro ubushobozi bwo kwakira umubare munini w’abarwayi babigana.

Umunsi mukuru w’abarwayi, ukaba warashyizweho na Nyirubutungane Papa Yohani Pawulo wa Kabiri, mu mwaka wa 1992, ibi bikaba byari mu rwego rwo kwita ku barwayi batishoboye baba bari hirya no hino mu bitaro bitandukanye batagira ubushobozi bwo kwivuza.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE