2017-12-11 14:03:29 clouds 27o High | Kigali Rwanda

Dukurikire:
 
 

Sobanukirwa uburyo bushya bwo gusaba akazi ukoresheje ikoranabuhanga

Yanditswe na IMVAHO NSHYA

Kuya 2017-07-06 11:18:06

 
Share on:
 
Yasuwe:1263
 
Yavuzweho:200
 
10
 
10

U Rwanda rwashyizeho uburyo bwo gusaba akazi mu nzego za Leta hakoreshejwe ikoranabuhanga (E-Recruitment), kugira ngo serivisi zo muri uru rwego zitangwe mu buryo bunoze, kandi burinde abashaka akazi guhora mu ngendo bajya gutanga amadosiye y’abo aho bashaka gusaba akazi.

Kuva ku itariki ya 01/05/2017 mu igazeti ya Leta hasotse Iteka rya Perezida n°144/01 ryo ku wa 13/04/2017 rigena uburyo bwo gushaka, gushyiraho no gushyira mu myanya Abakozi ba Leta, r igaragaramo n’uburyo bushya bwo gushaka akazi mu Nzego za Leta hakoreshejwe ikoranabuhanga.

Gushaka akazi mu nzego z’ imirimo ya Leta byakorwaga hifashishijwe Iteka rya Perezida nº46/01 ryo ku wa 29/07/2011 rigena uburyo bwo gushaka no gushyira mu myanya abakozi bakora mu Nzego z’imirimo ya Leta.

Nk’uko bisobanurwa na Komisiyo ishinzwe Abakozi ba Leta ( PSC), zimwe mu ngingo zigaragaza impinduka ku byerekeranye n’ibyo umukandida usaba akazi asabwa harimo ingingo ya 8 ivuga uburyo bwo gusaba akazi. Iyi ngingo isobanura ko umuntu usaba akazi ku mwanya watangajwe agomba kuzuza akanohereza ifishi ikoze mu buryo bw’ikoranabuhanga akoresheje inzira y’ikoranabuhanga mu itumanaho mu gushaka abakozi.

JPEG - 71.9 kb
Urubuga www.recruitment.mifotra.gov.rw nirwo ruzajya rutangirwaho akazi kose ka Leta

Umuntu usaba akazi agomba kandi gufotoza mu buryo bubika kopi y’ikoranabuhanga kandi akohereza indangamuntu ye y’umwimerere cyangwa ikiyisimbura na kopi y’impamyabumenyi ku rwego rushaka umukozi hifashishijwe inzira y’ikoranabuhanga mu itumanaho mu gushaka abakozi.

Iyo usaba akazi afite ubumuga, kandi akaba akwiye umwihariko mu gukoreshwa ikizamini, agomba kubigaragaraza muri dosiye ye isaba akazi, yandika ahabugenewe ubwoko bw’ubumuga afite.

Gutangaza amanota

Ku bijyanye n’itangazwa ry’amanota y’ibizamini byanditse, ingiyo ya 14 y’iri Teka isobanura ko amanota y’abakoze ibizamini byanditse agomba gutangazwa mu gihe kitarenze iminsi icumi (10) y’akazi ibarwa uhereye ku munsi amapiganwa yarangiriyeho.

Amanota abakandida babonye atangazwa hifashishijwe inzira y’ikoranabuhanga mu itumanaho mu gushaka abakozi kandi abakandida bakamenyeshwa hifashishijwe uburyo bwo kuboherereza ubutwamwa kuri E- mails n’ubutumwa bugufi kuri telefoni.

Itangazwa ry’amanota y’ibizamini bikorwa mu buryo bw’ikiganiro (Interview)

Ingingo ya 16 y’iri Teka ivuga ko amanota y’abakoze ibizamini bikorwa mu buryo bw’ikiganiro atangazwa mu gihe kitarenze umunsi umwe w’akazi uhereye umunsi amapiganwa yarangiriyeho.

Amanota abakandida babonye atangazwa hifashishijwe inzira y’ikoranabuhanga mu itumanaho mu gushaka abakozi kandi abakandida bakamenyeshwa hifashishijwe E-mails n’ubutumwa bugufi kuri telefoni.

Nyuma yo gusobanura uburyo umukandida usaba akazi yakoresha, mu ngingo ya 18 y’iri Teka hasobanurwa n’uburyo ashobora kujurira igihe atishimiye uburyo igikorwa cyo gushaka abakozi cyagenze.

Umukandida wumva ko yarenganyijwe mu gihe cyo gushaka akazi ashobora kujuririra ku rwego rwa mbere mu rwego rushaka umukozi mu gihe kitarenze iminsi itatu (3) y’akazi uhereye ku munsi w’igikorwa cyangwa icyemezo ajuririra.

Ubujurire butangwa hakoreshejwe inzira y’ikoranabuhanga mu itumanaho mu gushaka abakozi. Iyo bigaragaye ko hakozwe ikosa mu guteranya amanota, bikosorwa ako kanya n’abakoresheje ibizamini.

Iyo ikosa ryakozwe rishingiye ku mikosorere, urwego rushaka umukozi rusaba uwateguye akanakosora ibizamini gusubiramo itangwa ry’amanota uko bikwiye. Gukosorwa bikorwa ku bakandida bose bakoze ikizamini kuri uwo mwanya.

Urwego rwajuririwe rugomba gutanga igisubizo ku bujurire mu gihe cy’iminsi itatu (3) y’akazi ibarwa uhereye ku munsi ubujurire bwakiriweho.

Iyo umukandida atanyuzwe n’icyemezo cyafashwe, ajurira ku rwego rwa kabiri muri Komisiyo mu gihe cy’iminsi ibiri (2) y’akazi uhereye itariki yaboneyeho igisubizo cy’urwego rwakoresheje ibizamini. Komisiyo ifata icyemezo ku kibazo yajuririwe mu gihe kitarenze iminsi itanu (5) yʼakazi uhereye ku munsi yakiriyeho ubujurire.

Izi ni zo ngingo z’ingenzi zahindutse muri iri Teka zigaragaza uruhare rw’umukandida usaba akazi mu nzego za Leta.

Tumukunde Georgine

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE