Advertisement
 
 
 
 
 
 
 
 

Ubukungu

Yatangije ibihumbi 200, ubu ni umunyemari utunze za miliyari   

  Yanditswe na MUGISHA BENIGNE
 16 May

 
 

Niyibaho Berthilde, ni umubyeyi w’imyaka 56 atangira imishinga ye yatangiranye igishoro cy’amafaranga y’u Rwanda ibihumbi 200, none ubu akorera mu nzu ya Miliyoni zisaga 800, hatarimo n’indi mitungo itimukanwa n’amafaranga ku makonti.

Niyibaho washakanye na Maniraho Francois, bakaba bafitanye abana 7, atuye mu Karere ka Gasabo, Umurenge wa Kacyiru. Mu kiganiro kirambuye yagiranye n’Imvaho Nshya ku mishinga y’ubuhinzi n’ubucuruzi akora, yayitangarije ko yahereye ku cyo we yita ubusa busa none ubu ageze ku ntera ifatika, akaba abikesha kureba kure no kudacika intege n’ubwo biba bitoroshye.

Ati “ Nyuma ya Jenoside natangiranye igishoro cy’amafaranga 200 000, aho natangiye ncuruza imyaka igizwe n’ibirayi, urwagwa rw’ibitoki na butiki y’utuntu tutari twinshi.”

Akomeza avuga ko nyuma yo kubona ko urwagwa yengaga rukunzwe cyane, rukagurwa na benshi nubwo icupa rya rwo ryaguraga amafaranga 700 y’u Rwanda, yaje kwigira inama yo kurwongerera agaciro.

JPEG - 147.1 kb
Niyibaho Berthilde, Rwiyemezamirimo wakoze uruganda ahereye ku mafaranga make

Ni muri urwo rwego Niyibaho yatangiye kurushyira mu macupa no kurupfundikira, bituma arushaho kugira abakiriya benshi, ndetse hakaba n’abantu bafite utubare dukomeye bazaga kururangura kuko abatugana barukundaga cyane.

Muri ibyo byose Niyibaho yakundaga gusaba inama abamurusha ubumenyi n’ubushobozi, ari nako inama zabo zigenda zimufasha mu bucuruzi bwe.

Kwagura uruganda kwa Niyibaho byajyanaga no kongera abakozi kugira ngo ashobore kugera ku nzozi ze zo kuzakora uruganda rukomeye. Muri abo bakozi yagiye yongeramo harimo n’umucungamutungo kuko yabonaga ugenda wiyongera.

Yaje kubaka urwina n’urwengero rwa kijyambere, bityo atangira gutara ibitoki bigashya mu minsi itatu gusa, akenga umutobe nawe akawutara mu gihe cy’iminsi itatu kuko byose yabikoraga mu buryo bwa kijyambere.

Urwina ataramo rugira impombo acanamo ikajyana ubushyuhe mu cyumba ataramo ibitoki, ndetse kinashyirwaho n’igipimo cy’ubushyuhe kugira ngo butaba bwinshi bukababura ibitoki.

Kuri ubu uyu rwiyemezamirimo yenga urwagwa yise “Intego” na Vino yitwa “Imena”. Intego ishyirwa mu macupa ya cl 75, icupa rimwe rikagurwa amafaranga 2500, naho Imena ari yo Vino y’ibitoki igura amafaranga 2000 ku icupa rimwe rya cl 75.

JPEG - 93.9 kb
Iyi ni Vino y’ibitoki yitwa Imena ikorerwa mu ruganda BN Producers

Yaguriye umushinga we mu buhinzi bw’ibihumyo

Nyuma y’aho, Niyibaho yatekereje indi mishinga yamubyarira inyungu, asanga ari ngombwa ko agura aho akorera he bwite, mu gihe mbere yakoreraga mu nzu akodesha amafaranga ibihumbi 20 ku kwezi.

Ati “ Naje kugura iyo nzu nakoreragamo n’ikibanza yari yubatsemo ku mafaranga miliyoni 8, ntangira kwagura inyubako zayo mbijyanishije n’umushinga w’ubuhinzi bw’ibihumyo nari maze gutekereza kwerekezamo.”

Uyu mubyeyi avuga ko agitangira umushinga w’ubuhinzi bw’ibihumyo, haje kubaho imurikagurisha ry’ubuhinzi mu mwaka wa 2006, abasha kuryitabira n’ubwo bwose atari bwagere ku ntera ifatika mu guhinga ibihumyo.

Ati “ N’ubwo ari bwo nari ngitangira umushinga w’ubuhinzi bw’ibihumyo ndetse ukiri mu igerageza, muri iryo murikagurisha nagiyemo nitwaje amashyiga n’ibihumyo, nkajya nteka potaje ya byo, isosi n’ibindi biryo bivanzemo ibihumyo, abantu benshi bakaza bagana ihema nakoreragamo baje kurya, ndetse bose bakambwira ko biryoshye.”
Nyuma y’imurikagurisha, Niyibaho yatunguwe no guhamagarwa n’Ikigo cy’ubuhinzi cyitwaga RADA, kimumenyesha ko kigiye kumwohereza mu rugendoshuri mu gihugu cy’u Bushinwa.

Ati “ Nyuma gato y’imurikagurisha, natunguwe no guhamagarwa n’ubuyobozi bwa RADA, bumbaza niba mfite urupapuro rw’inzira Pasiporo, n’uko mbabwira ko ndufite, bambwira ko bagiye kunyohereza mu gihugu cy’u Bushinwa mu rugendoshuri rw’ubuhinzi bw’ibihumyo.”

Niyibaho nk’umugore utarize amashuri menshi, dore ko afite atatu yisumbuye, yibajije uburyo azajya mu Bushinwa kwiga uko bahinga ibihumyo nta Cyongereza azi namba.

Ati “ Maze kubwirwa ko nzajya mu Bushinwa kwiga ibijyanye n’ubuhinzi bw’ibihumyo, nibajije uko bizagenda kandi ntazi ururimi rw’Icyongereza kandi ari rwo bakoresha, ariko nkomeza kwihagararaho nti nzagenda gusa kandi nzabyumva.”

Uyu rwiyemezamirimo avuga ko yaje gucibwa intege n’umugabo we, amubwira ko bitashoboka ko ajya kwiga iby’ubwo buhinzi mu Bushinwa kandi atazi Icyongereza atanacyumva.

Ariko ngo ibyo ntibayamuciye intege , kuko yaje kujyayo ajyana n’abandi bana 2 bari barangije mu ishuri ry’ubuhinzi, bakajya bamusobanurira bageze aho bari bacumbitse, ariko aza kwiha gahunda ko amasomo y’ubumenyi narangira azakora ibishoboka agakurikirana ubumenyi ngiro akaba ariho azumvira neza ibyo yigishwaga.

Avuye mu Bushinwa, yazanye ubumenyi butari buke ku bijyanye n’ubuhinzi bw’ibihumyo, akaba yaratashye afite intego yo gukora ifuru izajya yumisha ibihumyo kugira ngo bikurwemo ifu nk’uko yabibonye muri ayo mahanga.

Yongeraho ko amahugurwa yo mu Bushinwa yamufashije guhugura abandi ari nako akomeza kugira ibyo yiyungura mu mushinga we, aho yatangiye gukora imigina mu buryo buciriritse.

Gusa ngo n’ubwo yifuzaga kubaka ifuru, nta mafaranga yari afite, ariko agumana icyizere cyo kuzabigeraho.

Ngo bidatinze rero Niyibaho yabashije guhembwa n’ishyirahamwe ry’Abagore ryitwa Reseau des Femmes, aho yahawe sheki y’ibihumbi 100, bityo inzozi ze zo kubaka ifuru ziba zigezweho.

Nyuma ngo yaje kujya mu gihugu cy’u Buholandi na bwo mu rugendoshuri, ahugurwa ku buhinzi bw’ibihumyo mu buryo bwa kijyambere n’uburyo bakora umurama wabyo n’imigina.

Muri ayo mahugurwa yamenye ko ari ngombwa gutubura imbuto y’ibihumyo ariko bikaba bikeneye laboratwari bikorerwamo.
Yagize amahirwe abasha kubaka iyo laboratwari afatanyije n’umugabo we na we ukora umurimo w’ubwubatsi, bityo laboratwari iba irabonetse.

Kuri ubu uyu rwiyemezamirimo atubura imbuto y’ibihumyo, akora umurama wa byo ndetse agakora imigina yayo, bityo abayikeneye bakabasha kuyibona.

Nanone Niyibaho ibihumyo bye abikoramo ifu, avuga ko ifasha mu kugaburira abana no kubarinda indwara zikomoka ku mirire mibi.

Ibihumyo bye abigurisha mu buryo bw’imigina, ari bibisi cyangwa se ari ifu.

Ati “ Kuri ubu ibihumyo byanjye mbigurisha mu buryo butatu, ari bibisi, ari imigina ari n’ifu, ifu yabyo igura amafaranga 1500 igikombe cya garama 200.”

Yaguriye ubucuruzi ku mushinga wo kongerera agaciro amafi n’indagara

Niyibaho ntiyarekeye aho gutekereza, yaje kwagurira ubucuruzi bwe mu mushinga wo gutunganya amafi n’indagara, abyongerera agaciro kugira ngo bibashe kuryohera no kunogera benshi.
Uyu mushinga yawutekereje ubwo yitabiraga imurikagurisha rya Dar-es-lam mu gihugu cya Tanzaniya.

Ati “ Natekereje ku mushinga w’amafi n’indagara ubwo nari nitabiriye imurikagurisha muri Tanzaniya, nza kubona umuzungukazi ufite ibyuzi by’amafi uburyo atunganya izo fi n’indagara mu buryo bw’isuku rikomeye, bintera gutekereza gukorana nawe, ndetse ndanabimubwira.”

Amaze kugera mu Rwanda umuzungukazi ngo yaje kumuhamagara amusaba ko banoza uwo mushinga wo gukorana, aho uyu mworozi w’amafi yagombaga kuyamugezaho, undi akayagura akayakoramo ibyo ashaka.

Ati “ Nyuma yo kunoza umushinga, yatangiye kumpa amafi, nanjye nkayumisha, nkayasyamo ifu, nkayigurisha, kandi abantu benshi barashimye, ari nako ngenda nongera ingano y’amafi.”

Ifu ituruka muri aya mafi yayise “Impamba”, iba ifunze mu gikombe cya garama 250, ikagura amafaranga 2000 y’u Rwanda.

Avuga ko afite abakiriya benshi, kandi ko bayishimira cyane, iyi fu icururizwa ku ruganda nyir’izina aho ruherereye i Karuruma, ubundi igacururizwa mu maduka na butiki zinyuranye.

JPEG - 268.4 kb
Uyu ni umukozi w’uruganda ukurikirana ubuhinzi bw’ibihumyo

Gukunda Rayon Sport, byatumye ahabwa akabyiniriro ka Mama Gikundiro

Niyibaho mu byo akunda harimo imikino n’imyidagaduro, akaba yarahawe akabyiniriro ka Mama Gikundiro kubera uburyo akunda ikipe ya Rayon Sport.

Abajijwe icyo akunda mu bijyanye n’imikino n’imyidagaduro, Niyibaho yavuze ko akunda kubona aho bakina umupira w’amaguru, agakunda cyane cyane ikipe ya Rayon Sport.

Ati “ N’ubwo ntajya kureba umupira kuko nta mwanya ngira, ndawukunda ariko cyane cyane ngakunda ikipe ya Rayon Sport, ndetse iyo ngeze i Nyabugogo usanga abana baza bansanga bavuga ngo dore Mama Gikundiro.”

Uyu mubyeyi avuga ko akunda kuririmba, akaba ari no muri Korali Rugamba iririmba mu Kiliziya, ngo ibyo bikamuha ibyishimo, bikamuvanamo ibitekerezo byinshi aba yiriwemo kandi bikamuha umutuzo muri we.

Mu bijyanye n’amafunguro, uyu rwiyemezamirimo ngo akunda ibiryo bya Kinyarwanda, ntakunda inyama, aho mu mwanya wa zo yirira isosi y’ifu y’indagara n’iy’ibihumyo.

Icyamubabaje mu buzima bwe atabasha kwibagirwa

Umubyeyi Niyibaho avuga ko ikintu cyamubabaje kurusha ibindi ni ugupfusha imfura ye y’umuhungu mu gihe cya Jenoside, akaba ataramenye urupfu yapfuye ntabashe no kumushyingura kugeza ubu.

Ati “ Ubu undeba nababajwe cyane no gupfusha imfura yanjye mu buryo ntamenye iby’urupfu rwe ndetse sinamushyingure kugeza ubu, iyo mbitekereje birambabaza cyane.’

Yongeyeho ko ikindi cyamubabaje ari igihombo gikabakaba miliyoni 5 yigeze kugira mu buhinzi bw’ibihumyo, aho ibingana na toni yose byangiritse bikomeye kugeza abijugunye, bikaba byaratewe n’umuyobozi wa Banki imwe wakomeje kumurerega ko amuha inguzanyo kandi ko ibisabwa byose yarabyujuje, biza kura ngira atayihawe, ibihumyo bye birangirika.

Niyibaho avuga ko atagumye mu gahinda gusa, ko ahubwo hari n’ibyamushimishije.

Kimwe mu byamushimishije ni ukubyara abana b’abahungu babiri nyuma yo kubura imfura ye agasigarana abakobwa gusa.

Ati “ Nashimishijwe n’uburyo Imana yanshumbushije abana 2 b’abahungu nyuma yo kubura imfura yanjye, ngasigarana abakobwa gusa.”

Ngo ikindi kimushimisha ni ugukundwa n’abana, ndetse akaba yaribonye umwana w’umuhungu umwita mama, agasanga ari ishema rirenze kuri we ndetse akabona ari Imana ikomeje kumwongerera umugisha w’abahungu.

Ati “Uwo nawe mufata nk’umwana wanjye, amfata nk’umubyeyi we kandi najye ndabyishimira, ntashobora kurara atambajije uko niriwe, cyangwa ngo ambaze uko naramutse.”

Nyuma y’ibi byose, uyu mubyeyi yifuza kuzagera ku ruganda rukomeye, rukoresha imashini mu mirimo yose n’ikorabuhanga muri byose, ku buryo bizaba ari umurage mwiza azaba asigiye abana be n’iyo yaba atakiri kuri iyi si.

 

Comments

Who are you?
Your post
  • To create paragraphs, just leave blank lines.

 
 
U Rwanda mu nzira zo kuvumburwamo amabuye ya Nickel n’Amabengeza
U Rwanda mu nzira zo kuvumburwamo amabuye ya Nickel n’Amabengeza

Ihuriro nyarwanda ry’Abacukuzi b’Amabuye y’Agaciro ryatangaje ko mu Rwanda hagaragaye ibimenyetso by’amabuye y’agaciro yitwa Nickel n’amabengeza. Mu muhango wo kwizihiza umunsi mpuzamahanga (...)

Abacukuzi  b’amabuye y’agaciro bafite imbogamizi zo kubona inguzanyo
Abacukuzi b’amabuye y’agaciro bafite imbogamizi zo kubona inguzanyo

Abacukuzi b’amabuye y’agaciro mu Rwanda bavuga ko bafite imbogamizi zo kubona inguzanyo z’amabanki muri uwo murimo ngo babashe kuwukora neza. Ibi babitangarije mu muhango wo kwizihiza umunsi (...)

Hafashwe toni 7 za caguwa zinjizwaga mu Rwanda ari magendu
Hafashwe toni 7 za caguwa zinjizwaga mu Rwanda ari magendu

Ishami rya Polisi y’u Rwanda rishinzwe kurwanya magendu n’inyerezwa ry’imisoro (RPU), rifatanyije n’ikigo cy’igihugu cy’imisoro n’amahooro (RRA), bataye muri yombi abantu 3 bakekwaho kwinjiza ibiro (...)

Abavuzi gakondo bagiye gushinga uruganda rw’imiti na banki
Abavuzi gakondo bagiye gushinga uruganda rw’imiti na banki

Abavuzi bo mu Rwanda no mu bindi bihugu bya Afurika y’Uburasirazuba, bibumbiye mu Muryango Mugari w’Abavuzi Gakondo, UMUAGA, batangiye kwiga ku mishinga ikomeye y’igihe kirekire irimo ibitaro (...)

Nyamagabe: Umudozi yasabiwe guhuzwa n’Abashinwa bakora imyenda
Nyamagabe: Umudozi yasabiwe guhuzwa n’Abashinwa bakora imyenda

Minisitiri w’Abakozi ba Leta n’Umurimo Uwizeye Judith, yasabye ubuyobozi bw’Akarere ka Nyamagabe gukorana na Minisiteri y’Ubucuruzi n’Inganda gufasha umudozi wahangiye imirimo abaturage benshi muri (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.