2017-07-28 06:05:39 clouds 27o High | Kigali Rwanda

Dukurikire:
 
 

Umujyi wa Kibungo ugeze he mu iterambere?

Yanditswe na IMVAHO NSHYA

Kuya 2017-07-07 07:19:22

 
Share on:
 
Yasuwe:433
 
Yavuzweho:200
 
10
 
10

Umuyobozi w’akarere ka Ngoma Nambaje Aphrodise, avuga ko iterambere ry’umujyi wa Ngoma ku bijyanye n’ubwiyongere bw’ibikorwaremezo n’inyubako zijyanye n’igihe rigenda neza, gusa akagaragaza ko hari ahakiri imbogamizi no kugenda buhoro ku bijyanye no kuvugurura inyubako z’ubucuruzi.

Umujyi wa Ngoma wubatswe mu murenge wa Kibungo, icyakora bamwe mu batuye i Ngoma n’abahatembera bagaragaza ko uyu mujyi udatera imbere ahanini bitewe no kuhabura bimwe mu biranga imijyi nk’amahoteli, imihanda myinshi, abantu benshi, bizinesi ziteye imbere, ahantu hakomeye ho kwidagadurira nk’ibibuga n’ibindi.

Avuga ku iterambere ry’umujyi wa Ngoma muri rusange rigenda buhoro, ndetse n’ibyemezo byo gusaba abikorera bafite ibikorwa muri uyu mujyi kuvugurura inyubako bakoreramo, bakazubaka ku buryo bugezweho byagiye bifatwa n’akarere, ariko kakabisubika, uyu muyobozi yavuze ko ibikorwa byo kuvugurura umujyi wa Ngoma byabanje kudindizwa nuko nta gishushanyombonera cy’uyu mujyi cyari cyagakozwe.

JPEG - 254.6 kb
Iterambere ry’umujyi wa Kibungo ryagiye rihura n’imbogamizi zitandukanye

Agaragaza ko guhera mu myaka ya za 2013 ubwo hari hategerejwe igishushanyombonera cyasohotse mu mwaka wa 2014, akarere kafashe ingamba zirimo kubuza abantu gukomeza kubaka inzu nto (bita ama annex) zubakishije rukarakara, ndetse n’ingamba avuga ko zikarishye zo kutemerera abantu kubaka mu buryo bw’akajagari.

Ku kijyanye no kuvugurura inyubako z’ubucuruzi mu mujyi wa Kibungo, Meya Nambaje avuga ko hari abantu bamwe bakomeje kugenda bagaragaza intege nkeya, n’ibibazo by’ubushobozi buke, bikaba ngombwa ko bihanganirwa.

Ati “Mu maduka agera kuri 14 yo mu mujyi wa Kibungo; dufite abantu bafite intege nkeya b’abacuruzi, bafite ibibanza n’amaduka yubatswe kera, ariko bagenda biguru ntege mu bijyanye no kuvugurura inyubako.”

Akomeza agira ati “Twigeze gushyiraho gahunda twicarana nabo, tubasaba kuvugurura, yewe dufatana nabo n’ingendoshuri tujyana Musanze, Rubavu n’ahandi, tunasinya amasezerano y’uko bagiye kuvugurura, ariko bamwe baratubwiye ngo nta bushobozi bafite, abandi bagatinya kurekura ifaranga.

JPEG - 57.2 kb
Amazu y’ubucuruzi mu mujyi wa Kibungo, amenshi ni uko yubatse ( Ifoto Manishimwe N)

Ubwo rero, twaravuze ngo abaturage nta bwo usunika; iyo bakubwiye ngo ba uretse gatoya, twihanganire , urabumva.”

Nambaje Aphrodise avuga ko kuba haragiye hatangwa amatangazo asaba kuvugurura umujyi, ariko ntibyubahirizwe mu gihe cyagenwe kandi abarebwa nayo bakihanganirwa, byagiye biterwa nuko hari bamwe mu bafite amazu atajyanye n’igihe n’ibibanza bagiye bagaragariza akarere ko bafashe inguzanyo (credits) muri za banki, bagasaba kongererwa igihe cyo kuba bashaka amafaranga ahagije.

Nubwo hari abakomeje kungenda biguru ntege mu gushyira mu bikorwa gahunda yo kubaka inyubako zijyanye n’igihe mu mujyi wa Ngoma, ubuyobozi bw’akarere bushimira umwe mu batuye Kibungo wumvise vuba gahunda yo kuvugurura umujyi, ubu akaba ageze kure yubaka inzu igezweho (igeretse 1) rwagati mu mujyi wa Kibungo.

JPEG - 78.9 kb
Inzu zo mu isoko ry’akarere ka Ngoma ziherutse kubakwa ( Ifoto Manishimwe N)

Ikindi cyumvikana nk’igitanga icyizere cy’uko umujyi wa Ngoma waba uri hafi kuvugururwa, ni uko ubuyobozi bw’akarere buvugana kenshi n’abarabu bafite inzu nyinshi zishaje mu mujyi wa Ngoma, kandi ngo bemeye ko bari hafi kuza kuzubaka ku buryo bujyanye n’igihe.

Icyo ubuyobozi bw’akarere ka Ngoma bwishimira ngo ni uko muri rusange abaturage, abikorera, ibigo by’amashuri, n’abihaye Imana…, bakomeje kubaka inyubako zijyanye n’igihe zihesha isura nziza umujyi wa Ngoma.

JPEG - 170 kb
Imirimo yo kubaka Hoteli y’akarere ka Ngoma igeze kuri 98% (Ifoto Manishimwe N)

MANISHIMWE NOËL

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE