2017-10-18 18:43:44 clouds 27o High | Kigali Rwanda

Dukurikire:
 
 

Uburyo bushya bwo korora amafi mu kiyaga cya Kivu bwongereye umusaruro

Yanditswe na IMVAHO NSHYA

Kuya 2017-07-25 14:12:23

 
Share on:
 
Yasuwe:75
 
Yavuzweho:200
 
10
 
10

Mu kiyaga cya Kivu ku ruhande rw’umurenge wa Nyamyumba mu karere ka Rubavu, harakorerwa umushinga mushya wo korora amafi mu buryo bwa kareremba hifashishijwe icyitwa ‘ibikaje’.

Abaturage baturiye ahakorerwa uyu mushinga baremeza ko uyu mushinga ugiye kuzajya utanga amafi meza kandi menshi, ndetse bagahamya ko uzafasha u Rwanda kugera ku ntego rwiyemeje yo kwihaza k’umusaruro w’amafi atumizwa hanze agahagarara.

Abarobyi n’abakora ubworozi bw’amafi muri ubu buryo, bahamya ko hari itandukaniro n’uburyo bwari busanzwe bukoreshwa mu korora amafi, ndetse bakanemeza ko umusaruro w’aya mafi ari mwinshi ugereranyije n’umusaruro watangwaga n’ubworozi bwa gakondo.

PNG - 1.1 Mb
Korora amafi muri ubu buryo byongereye umusaruro

Innocent Bamporiki, umukozi uhagarariye abandi mu mushinga Fine Fish ukorera uburobyi mu kiyaga cya Kivu, avuga ko amafi yorowe muri ubu buryo bwitwa ‘ibikaje’ akurira mu gihe kingana n’amezi umunani, mu gihe ayo mu kiyaga asanzwe yo akurira igihe kingana n’umwaka ndetse ngo mu ‘gikaje’ kimwe haba harimo amafi ibihumbi bitanu, basarura bagakuramo hagati ya toni imwe n’igice n’ebyiri.

Mu kiganiro yagiranye n’Imvaho Nshya, yagize ati “Buriya ubu buryo tutarabutangira twashakaga amafi ahantu tutazi, gupfa kuroba mu kiyaga cyose wagira amahirwe ukabona amafi ariko kuri ubu tuba tuzi neza aho ari, ndetse tunakurikirana imikurire yayo umunsi ku munsi, zagira ikibazo tukagikemura kuko tuba dutegereje umusaruro.”

Abakozi bakorera uyu mushinga bemeza ko kuba uriho babikesha imiyoborere myiza iriho mu Rwanda, inatanga umutekano ku buryo no mu kiyaga bahakorera nta cyo bikanga.

Hagenimana Epa, umwe mu borozi b’amafi, yagize ati “Twagejejweho umutekano, ubu turaroba, turabyaza umusaruro impano twahawe n’Imana mu buryo bwose, tubikesha umutekano kuko nta ba rushimusi bashobora kwirara mu mafi uko biboneye ngo byorohe, tushimira Leta y’ubumwe idufasha uko bikwiye.”

Abaturage bo muri uyu murenge kandi bashimangira ko uyu mushinga wahaye akazi abatari bake, bakabasha kwikemurira ibibazo bahura nabyo mu buzima bwa buri munsi.

Aba baturage kandi bishimira ko uko iminsi igenda ishira indi igataha iki kiyaga kirushaho kubabera igisubizo, aho kubabera ikibazo nk’uko mbere byahoze.

Ubu iki kiyaga gitanga ingufu z’amashanyarazi aturuka kuri gaze metane, kigatanga amafi atunga abatari bake ndetse kikanabyara izindi nyungu zifitanye isano n’ubukerarugendo.
IYAREMYE YVES

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE