2017-05-24 10:43:15 clouds 27o High | Kigali Rwanda

Dukurikire:
 
 

U Rwanda rwiyemeje gukosora ahakirwaye mu korohereza abashoramari

Yanditswe na Claude Ntawitonda

Kuya 2016-11-07 13:51:08

 
Share on:
 
Yasuwe:1
 
Yavuzweho:200
 
10
 
10

Guverinoma y’u Rwanda yatangaje ko igiye gushyira imbaraga zishoboka mu kunoza ibitagenda neza mu nzego zahawe amanota make mu koroshya ishoramari kugira ngo mu mwaka utaha rugaruke mu myanya y’imbere ku rwego rw’Isi.

Minisitiri w’ubucuruzi n’inganda n’ibikorwa by’umuryango wa Afurika y’Iburasirazuba (MINEACOM) Kanimba Francois, yabwiye Abanyamakuru ko u Rwanda rugiye gukora ibishoboka rukava ku mwanya wa 52 ku isi rukagaruka munsi y’umwaka wa 37 rwariho mu mwaka ushize.

Mu kiganiro n’Abanyamakuru kuri uyu wa Mbere tariki ya 7 Ugushyingo Minisitiri Kanimba yahamije ko u Rwanda rwabonye ahari ibibazo mu korohereza abashoramari, hakaba harimo gushakwa ingamba zo kubikemura ku buryo mu mwaka utaha hazaba hakemutse byinshi.

Ati “Iyo urebye mu bipimo ngenderwaho hari igipimo kimwe cy’uburyo tworoshya ibijyanye no gutanga ibyemezo byo kubaka. Aha ngaha u Rwanda umwaka ushize twari ku mwanya wa 37 ubu twaramanutse tugera ku mwanya wa 158. Turacyahafite kubisobanukirwa neza mu byo tuganira wa Banki y’isi ariko ndahamya ntashidikanya ko kugaruka ku mwanya wa 37 cyangwa hasi yawo bishoboka.”

Ibindi Kanimba yasanze byarahaye u Rwanda amanota make birimo gufasha abashoramari kubona umuriro biri ku mwanya wa 117 bitewe no guhora ucukagrika, asaba abo bireba kugaragaza aho ingamba z’ikibazo cy’umuriro ucikagurika zigeze.

Ati “Iki kintu twakiganiriyeho umwaka ushize n’ibigo bishinzwe gucunga ibijyanye no kugeza umuriro ku baturage, batwereka ko ibituma tudahagaze neza bizwi kandi bari kubikoraho ku buryo ntekereza ko mu gihe kitari kirekire bagombye kutwereka uburyo amanota dutakaza ku bipimo bigenderwaho twayagarura ku bryo budatinze.”

Hari kandi ibyerekeranye amategeko yo kurinda abanyamigabane bato mu bigo by’ishoramari biri ku mwanya wa 102; Minisitiri Kanimba avuga ko Leta ibizi kandi yatangiye gutekereza uburyo itegeko ryabyo ryasubirwamo kugira ngo bijyane n’imikorere myiza mu bihe biri imbere.

Yongeyeho ko mu cyumweru gitaha ingenzo zose za Guverinoma zirebwa mu koroshya ishoramari zigiye guhura kugira ngo ziyemeze ibyo zigomba gukora mu gihe kigufi kugira ngo igihe hazaba hakorwa irindi sesengura u Rwada ruzabe rufite ibindi byatuma intego yo kuba urwa mbere muri Afurika bigerwaho.

Raporo y’ishoramari ku isi ‘Doing Business’ mu 2017 ishyira u Rwanda ku mwanya wa 52 mu bihugu 190 byakoreweho ubushakashatsi, rukaza ku mwanya wa kabiri inyuma y’Ibirwa bya Maurice muri Afurika no ku mwanya wa mbere mu bihugu by’umuryango wa Afurika y’Uburasirazuba (EAC).

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE