2017-09-25 08:13:20 clouds 27o High | Kigali Rwanda

Dukurikire:
 
 

U Rwanda rwiteze imodoka zigenda ku migozi hejuru ya Kalisimbi

Yanditswe na IMVAHO NSHYA

Kuya 2016-11-10 13:03:00

 
Share on:
 
Yasuwe:187
 
Yavuzweho:200
 
10
 
10

Imodoka zigendera ku migozi mu kirere ziri mu mushinga wagutse wa Kalisimbi ugamije guteza imbere ubukerarugendo bukorerwa ku kuri iki kirunga cya Kalisimbi no gukorerwaho igenzura ry’Iteganyagihe mu muryango w’ubucuruzi w’ibihugu by’iburasirazuba n’amajyepfo y’Afurika (COMESA).

Ikigo cy’Igihugu cy’Iterambere gitangaza ko uyu mushinga wabonywemo andi mahirwe yo kuzamura ubukerarugendo ariko hashize igihe bivugwa ko habuze umushoramari wo gushoramo amafaranga y’u Rwanda asaga miliyari 30 (miliyoni 38 z’amadolari ya Amerika) kugira ngo ukorwe neza.

Kusa kuri ubu hari amakuru yatangiye gucicikana mu bitangazamakuru ko ikompanyi yo mu Butaliyani yitwa Leitner Group, yemeye gushora imari muri uyu mushinga uboneka mu bihugu by’imisozi ariko byateye imbere nka Switzerland, ukaba ugira uruhare mu guhuza imisozi n’imibande cyangwa iteganye, cyane cyane ikorerwaho ubukerarugendo.

Byitezwe ko mu mushinga wa Kalisimbi hazubakwa ibikorwa remezo by’itumanaho (iminara ya radio na televiziyo) ku kirunga cya Kalisimbi n’ibyuma bifata imigozi igenderwaho n’ubu buryo bw’ubwikorezi butamenyerewe henshi muri Afurika, n’icyanya cyahariwe abihera ijisho ibyiza by’u Rwanda gifatanye n’ahagenzurirwa iteganyagihe.

JPEG - 118 kb
Imodoka zigendera ku migozi hejuru ya kalisimbi zitezweho kwinjiza amafaranga atubutse

Nk’uko bigaragara ku rubuga rwa RDB uyu mushinga watekerejwe nyuma y’aho mu mwaka wa 2007 u Rwanda rwagaragajwe nk’igihugu cya COMESA kigomba gukurikirana iby’imihindagurikire y’ibihe mu karere.

Itsinda ry’Impuguke riturutse muri Kaminuza y’Ikoranabuhanga ya Massachusetts (Massachusetts Institute of Technology/MIT) ryasuye u Rwanda mu mwaka wa 2009 zisanga Umusozi wa Mugongo n’Ikirunga cya Kalisimbi ari two duce turi mu majyaruguru y’igihugu twaberaho ibikorwa byo kugenzura imihindagurikire y’ibihe.

Ikirunga cya Kalisimbi gifite metero 4,507 z’ubutumburuke kandi ubushorishori bwacyo bugerwaho n’abakoze urugendo rw’amasaha ane kuzamuka n’andi abiri kumanuka, cyangwa se ababishoboye bakagenda n’indege ya kajugujugu.

RDB yasanze gahunda yo kugenzura itakoroha hatabayeho imodoka zigendera ku migozi zikura cyangwa zitwara abantu ku gasongero ka Kalisimbi. Umushinga wasanzwe ukeneye akayabo ka miliyari zirenga 30 kuko ugomba guhuza agasongero n’indiba y’umusozi byose bikeneye ibikorwa remezo bihamye.

Iki kigo gisanga uyu mushinga niwuzura utazaharirwa iteganyagihe gusa ahubwo uzaba wiyongereye ku mishinga y’ubukerarugendo ibyara inyungu, cyane ko biteganyijwe ko kugenda muri iyi modoka bizajya bisaba amafaranga y’u Rwanda arenga ibihumbi 24 kuri buri rugendo.

Bivugwa ko u Rwanda rubaye igihugu cya kabiri cya Afurika kigiye gushyira uyu mushinga mu bikorwa nyuma ya Afurika y’Epfo yamaze kuwutangiza i Cape Town mu mwaka wa 2013.

Amakuru y’Umushoramari yatangiye kuvugwa, mu gihe RDB iteganya guharira uyu mushinga Ikigo cy’Igihugu gishinzwe iteganyagihe (Meteo Rwanda) kuko watangiye ugamije gushyira mu bikorwa icyicaro cy’igenzurwa ry’iteganyagihe mu bihugu bya COMESA.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE