Advertisement
 
 
 
 
 
 
 
 

Ubukungu

U Rwanda rwagurijwe miliyari 76 zo kuzamura abatishoboye   

  Yanditswe na MUTUNGIREHE SAMUEL
 3 months ago

 
 

Leta y’u Rwanda yashyize umukono ku masezerano y’inguzanyo ya miliyoni 95 z’amadorali y’Amerika angana n’asaga miliyari 76 z’amafaranga y’u Rwanda yatanzwe n’ikigega cya Banki y’Isi gishinzwe iterambere mpuzamahanga (IDA) yo kuzamura abatishoboye binyuze mu mishinga igamije kuzamura abari mu bukene bukabije.

Aya masezerano yashyizweho umukono kuri uyu wa 3 Ugushyingo 2016 i Kigali hagati ya Minisitiri w’Imari n’Igenamigambi (MINECOFIN), Amb. Gatete Claver ku ruhande rw’u Rwanda na Yasser Gammal uhagarariye Banki y’Isi mu Rwanda.

Amb. Gatete yavuze ko uwo mwenda ari uw’imyaka 40, ugamije gufasha gahunda za Leta zigamije kwita ku bakene nka VUP, n’izindi gahunda zigamije gukura abaturage mu bukene bukabije ku buryo nta Munyarwanda uzaba akiri mu bukene bukabije mu 2020.

Yagize ati “Ni amafaranga asanzwe atangwa kuko mu myaka itatu ishize tumaze kubona amadolari agera kuri miliyoni 260 z’amadorali y’amerika, (asaga miliyari 208 z’amafaranga y’u Rwanda) kugira ngo turebe uko twafasha ibyiciro bitandukanye by’Abanyarwanda kwivana mu bukene.”

Raporo y’izamuka ry’imibereho myiza y’abaturage yo muri 2015 yerekana ko kuva mu myaka 5 ishize abakene bagabanutse bakava kuri 24% bangana na miliyoni 2 ubu bakaba bageze kuri 16,3% bangana na milyoni 1,350.

Amb. Gatete yasobanuye ko mu myaka itatu ishize u Rwanda rwari rwemerewe n’iki kigega kubona amadorali y’Amerika miliyoni 230, akaba azongerwa bitewe n’uko amafaranga u Rwanda rwagiye ruhabwa rwagiye ruyakoresha neza.

Gammal Yasser uhagarariye Banki y’Isi yavuze ko iyo nguzanyo ari iyo gufasha Leta y’u Rwanda kugera ku ntego ya za gahunda yihaye.

Ati “Mu buryo butatu izashyigikira ishyirwa mu bikorwa by’izo gahunda mu kuzamura imibereho myiza y’abaturage no guhuza ibikorwa byazo, izafasha mu guteza imbere kugenzura ibikorwa by’inkunga zagenewe abaturage no gutera inkunga gahunda ya VUP iri kugira impinduka mu gihugu cy’u Rwanda.”

Umunyamabanga wa Leta muri Minisiteri y’Ubutegetsi bw’igihugu ushinzwe imbereho myiza no kurengera abaturage, Dr. Mukabaramba Alvera yavuze ayo mafaranga agiye kongera uburyo VUP yakorwaga abayikoramo bakunguka biruseho.
Ati “Iminsi umuntu yakoraga iziyongera ive kuri 47 yari ihari mu mwaka igere kuri 70.”

Mu bindi iyo nguzanyo izafasha muri VUP harimo gushyiraho amafaranga azunganira umuturage ukora muri VUP agahembwa, akongererwaho n’ibindi bintu bituma azagira icyo ageraho birimo amatungo magufi yaba ashoboye gukora umushinga akawukora.

Iyo nguzanyo izakoreshwa kandi mu kwita ku mishinga iteza imbere abagore bakennye bafite abana bato hagamijwe kwita ku bibazo byugarije abo bana mu gihe ababyeyi babo batabasha gukora mu mirimo y’amaboko nka VUP, bagahabwa amatungo n’igishoro cyo gukora ibindi bashobye hafi yabo.

Amasezerano y’uwo mwenda yemejwe na MINECOFIN tariki ya 31 Ukwakira 2016, akazatangira kwishyurwa nyuma y’imyaka 10 ku kiguzi cy’inyungu ya 0,75% buri mwaka.

IDA yahaye u Rwanda iyo nguzanyo ni rumwe mu nzego eshanu za Banki y’Isi zitanga inguzanyo ku buryo butandukanye, IDA ikaba itanga inguzanyo ku bihugu bikennye ikishyurwa ku nguzanyo nto cyane kandi mu gihe kirekire bigamije ko icyo gihugu kizamuka mu yindi ntera.

 

Comments

 
 
Rubavu: Barishimira ko karoti zari zabahombanye zabonye isoko mu mahanga
Rubavu: Barishimira ko karoti zari zabahombanye zabonye isoko mu mahanga

Abahinzi ba karoti bo mu murenge wa Kanzenze mu karere ka Rubavu barishimira ko umusaruro wabo ubu noneho wabonye isoko, nyuma y’uko karoti zabo zari zarabahombanye, aho umufuka waguraga ibihumbi (...)

Ngoma: Umusaruro w’ibishyimbo n’ibigori waragabanutse
Ngoma: Umusaruro w’ibishyimbo n’ibigori waragabanutse

Ubuyobozi bwa Koperative Rebakure Munyamurama_KOREMU, ikorera ubuhinzi bw’ibigori n’ibishyimbo kuri hegitari 400 mu murenge wa Murama buratangaza ko igihembwe cy’ihinga cya 2017A kitababereye kiza, (...)

 RAB irasaba abahinzi gucika ku birayi bya ’Peko’ bagahinga ibiryoshye
RAB irasaba abahinzi gucika ku birayi bya ’Peko’ bagahinga ibiryoshye

Abacuruzi bacuruza ibirayi mu masoko atandukanye yo mu karere ka Rubavu bavuga ko babangamiwe n’ikibazo cy’ibirayi byitwa Peko bikomeje kubatera igihombo, kuko abakiriya babigura nyuma (...)

Kicukiro: Hatangiye kubakwa  umudugudu ufite agaciro kagera kuri Miliyari 5
Kicukiro: Hatangiye kubakwa umudugudu ufite agaciro kagera kuri Miliyari 5

Akarere ka Kicukiro katangije ku mugaragaro igikorwa cyo kubaka umudugudu w’icyitegererezo (IDP Model Village) uzatuzwamo abakuwe mu manegeka ufite agaciro kagera kuri miliyari eshanu z’amafaranga (...)

Yatangiriye ku cyarahani none agiye gushinga uruganda rw’imyenda
Yatangiriye ku cyarahani none agiye gushinga uruganda rw’imyenda

Mukantwari Alvéra wo mu murenge wa Kagano mu karere ka Nyamasheke, ukorera imirimo y’ubudozi n’ububoshyi bw’imyenda n’imitako kuri site ya Rwesero ho mu karere ka Nyarugenge mu mujyi wa Kigali (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.