Advertisement
 
 
 
 
 
 
 
 

Ubukungu

U Rwanda rugiye gushyigikirwa mu bucuruzi bukoresha ikoranabuhanga   

  Yanditswe na GATETE JEAN BOSCO
 1 week ago

 
 

Minisitiri w’Ubucuruzi n’Inganda n’ibikorwa by’Umuryango wa Afurika y’Iburasirazuba Kanimba François, yavuze ko Rwanda rugiye guterwa inkunga muri gahunda igamije gukora ubucuruzi hifashishijwe ikoranabuhanga, uburyo bwa “E- Commerce”.

Yabitangaje mu gihe i Kigali harimo kubera inama inama y’ubutegetsi y’ikigega EIF igamije gushimangira ubufatanye hagati y’ibihugu bikiri mu nzira y’amajyambere,

EIF (Enhanced Integrated Frame work) ni ikigega gihuriweho n’abaterankunga benshi, gitanga inkunga yo mu rwego rw’imari na tekiniki hubakwa ubushobozi mu bucuruzi mu bihugu 48 biri mu nzira y’amajyambere n’ibihugu bitatu bitakiri ku rutonde rw’ibifashwa.

Minisitiri Kanimba yavuze ko u Rwanda ari igihugu cya 38 mu bihugu bishyigikirwa muri iriya gahunda, ati “U Rwanda rufite gahunda n’ingamba zihamye zo guteza imbere ubwo bucuruzi binyuze mu kubaka ubucuruzi bwambukiranya imipaka. Ni yo mpamvu badufasha muri iyo gahunda nini cyane igamije kubaka ubushobozi bwo kubaka amasoko ku mupaka wa Karongi na Cyanika kimwe no kubaka ubushobozi bw’abacuruzi, ibi bikorwa bimaze gutwara agera kuri miliyoni 3 z’amadolari.”

Yongeyeho ko kuba iyi nama ibereye mu Rwanda, bishingira ku cyizere u Rwanda rwagaragaje mu kwihutisha umuvuduko w’ubukungu binyuze mu nzira zirimo n’ubucuruzi bwambukiranya imipaka, ati “Iyi nama igamije kurebera hamwe ingamba z’ibihugu mu kunoza ubucuruzi mpuzamahanga binyuze mu guteza imbere ubucuruzi bwambukiranya imipaka.”



Asanga kandi kuba ubucuruzi bwambukiranya imipaka bwaravuguruwe, byatumye u Rwanda rwinjiza miliyoni 110 z’ amadolari ya Amerika wakongeraho n’ibyoherezwa hanze bikagera hafi miliyoni 300 ku mwaka.

Yavuze ko bukunze gukomwa mu nkokora n’umutekano muke mu Karere ati “ U Burundi butarinjira mu bibazo by’umutekano ubucuruzi bwakorwaga hagati y’ibihugu byombi bwinjizaga miliyoni 25 z’amadolari ku mwaka, ubu hafi 50% byaragabanutse kubera ibyo bibazo.”

Kato Kimbugwe ukorera ikigega cy’u Bwongereza gishinzwe iterambere mpuzamahanga (DFID) avuga ko u Rwanda kuva mu myaka 20 ishize rwerekanye umuvuduko mu iterambere, ashimangira ko nk’abaterankunga bazakomeza gushyigikira ingamba na gahunda bigamije guteza imbere ubucuruzi bwambukiranya imipaka.
Yagize ati “Tuzanatera inkunga urwego rw’ubuhinzi kuko utavuga kurwanya ubukene hagamijwe gufasha abakene kubwivanamo udashyigikiye uru rwego, tuzanateza imbere urwego rw’amabuye y’agaciro mu ntangiriro z’uyu mwaka tuzashyira hanze gahunda ijyanye na byo.”

Umuyobozi ku rwego rw’isi w’iyo gahunda yo gushyigikira ibihugu bikiri mu nzira y’amajyambere kwiyubaka mu bukungu Dr Ratnakar Adhikari we avuga ko bazakorera hamwe nk’ijwi rimwe kugira ngo umuhate n’umurava Leta y’uRwanda igaragaza mu kubaka ubukungu bikomeze gushyigikirwa.

Yashimangiye kandi ko muri gahunda zabo bazanibanda ku iterambere ry’umugore yagize ati “Gahunda zo kubaka ubushobozi bw’umugore ni gahunda duha agaciro cyane ku murongo wa gahunda zacu kuko kumuteza imbere bifasha mu kugera ku ntego z’iterambere.”

Yashimiye u Rwanda ku bw’umuhate n’imikorere myiza mu rwego rwo kubaka ubukungu kugera n’aho ibindi bihugu nka Liberiya biza kurwigiraho.

 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Rubavu:Abavunjayi barataka igihombo baterwa n’abamamyi
Rubavu:Abavunjayi barataka igihombo baterwa n’abamamyi

Amashyirahamwe y’abakora akazi ko kuvunja amafaranga y’amanyarwanda n’amanyamahanga mu karere ka Rubavu, barataka ko baterwa igihombo n’abakora uyu murimo mu buryo butemewe n’amategeko, bita (...)

U Rwanda mu nzira zo kuvumburwamo amabuye ya Nickel n’Amabengeza
U Rwanda mu nzira zo kuvumburwamo amabuye ya Nickel n’Amabengeza

Ihuriro nyarwanda ry’Abacukuzi b’Amabuye y’Agaciro ryatangaje ko mu Rwanda hagaragaye ibimenyetso by’amabuye y’agaciro yitwa Nickel n’amabengeza. Mu muhango wo kwizihiza umunsi mpuzamahanga (...)

Abacukuzi  b’amabuye y’agaciro bafite imbogamizi zo kubona inguzanyo
Abacukuzi b’amabuye y’agaciro bafite imbogamizi zo kubona inguzanyo

Abacukuzi b’amabuye y’agaciro mu Rwanda bavuga ko bafite imbogamizi zo kubona inguzanyo z’amabanki muri uwo murimo ngo babashe kuwukora neza. Ibi babitangarije mu muhango wo kwizihiza umunsi (...)

Hafashwe toni 7 za caguwa zinjizwaga mu Rwanda ari magendu
Hafashwe toni 7 za caguwa zinjizwaga mu Rwanda ari magendu

Ishami rya Polisi y’u Rwanda rishinzwe kurwanya magendu n’inyerezwa ry’imisoro (RPU), rifatanyije n’ikigo cy’igihugu cy’imisoro n’amahooro (RRA), bataye muri yombi abantu 3 bakekwaho kwinjiza ibiro (...)

Abavuzi gakondo bagiye gushinga uruganda rw’imiti na banki
Abavuzi gakondo bagiye gushinga uruganda rw’imiti na banki

Abavuzi bo mu Rwanda no mu bindi bihugu bya Afurika y’Uburasirazuba, bibumbiye mu Muryango Mugari w’Abavuzi Gakondo, UMUAGA, batangiye kwiga ku mishinga ikomeye y’igihe kirekire irimo ibitaro (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.