2017-06-23 06:25:07 clouds 27o High | Kigali Rwanda

Dukurikire:
 
 

U Budage bwifuza ko u Rwanda ruba urwa 1 muri Afurika rufite urubyiruko rw’inzobere mu myuga

Yanditswe na IMVAHO NSHYA

Kuya 2016-08-11 13:59:04

 
Share on:
 
Yasuwe:3
 
Yavuzweho:200
 
10
 
10

Minisitiri w’ubufatanye mu Bukungu n’Iterambere mu Budage, Dr Gerd Muller yatangaje ko igihugu cye giterwa ishema na gahunda ya Leta y’u Rwanda yo gushyira imbaraga mu burezi bw’ubumenyingiro kandi ko kiyemeje gufasha urubyiruko rw’u Rwanda kugira icyo rwimarira.

Ibi Dr Gerd Muller yabitangaje ubwo yasuraga ishuri rikuru rya IPRC-Kicukiro kigisha imyuga itandukanye irimo n’iy’igihugu cy’u Budage gisanzwe gitera inkunga.

Dr Gerd yagize ati “Turashaka kunoza imikorere n’igihugu cy’u Rwanda by’umwihariko mu burezi bw’ubumenyi ngiro, tukagira icyo dufasha urubyiruko. Dufitanye imikoranire myiza n’u Rwanda kuva mu myaka makumyabiri ishize aho twibanze cyane mu bintu by’ingenzi nk’uburezi , turifuza gukomeza umubano dufitanye n’u Rwanda, tukaba twanabasha guhamagara ibigo byo mu Budage bikora ubumenyingiro bikaza gushora imari mu Rwanda.”

JPEG - 212.7 kb
Minisitiri w’Uburezi mu Rwanda Dr. Musafiri Malimba Papias asobanurira Minisitiri Dr. Gerd Muller imikorere y’uburezi bw’ubumenyingiro mu Rwanda (Foto: Niyonsenga S)

Yakomeje agira ati “Dushyigikiye imigambi ya Perezida Kagame yo kutareba gusa ko urubyiruko rwiga muri za kaminuza n’amashuri y’ubumenyingiro ahubwo akanita ku kureba ko nibura urubyiruko 50% ruhabwa amahugurwa mu myuga ishobora kubabeshaho ndetse no kubashakira akazi nyuma yo kubigisha”

Igihugu cy’u Budage gitewe ishema n’intera u Rwanda rwateye mu guteza imbere amashuri y’igisha ubumenyingiro mu rwego rwo guhangana n’ikibazo cy’ubushomeri.

Minisitiri w’ubufatanye mu bukungu w’u Budage yemeza ko u Rwanda ruramutse rukomeje gahunda yo guteza imbere ubumenyingiro ku bakiri bato rushobora kuzaba kimwe mu bihugu bifite inganda zikomeye muri Afurika.

U Budage kandi burateganya kurenga gutera inkunga uburezi bwo mu Rwanda bukagera no mu ikoranabuhanga.

Minisitiri w’Uburezi mu Rwanda, Dr Musafiri avuga ko inkunga itangwa n’u Budage mu burezi yibanda cyane mu guhugura abarimu bigisha ubumenyingiro ariko hakaba ubwo banatera inkunga indi mishanga y’uburezi nk’uko bafashije mu gushyira ibikoresho muri IPRC-Kicukiro.

Kuri ubu MINEDUC irimo guteganya ko 60% by’abanyeshuri muri za kaminuza bagomba kuzaba biga ubumenyingiro kubera ko ari bwo buryo bwafasha abanyeshuri kugira icyo bikorera barangije amasomo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE