2017-07-26 14:51:34 clouds 27o High | Kigali Rwanda

Dukurikire:
 
 

Rusizi: NAEB yahosheje urugomo rw’abanyeganda batunganya kawa

Yanditswe na IMVAHO NSHYA

Kuya 2016-04-25 15:58:20

 
Share on:
 
Yasuwe:1
 
Yavuzweho:200
 
10
 
10

Ikigo cy’igihugu gishinzwe iterambere ry’ibikomoka ku buhinzi byoherezwa mu mahanga (NAEB) cyakemuye ikibazo cy’abanyenganda batunganya kawa bajyaga kurangurira abaturage mu gicuku bitwaje intwaro za gakondo, bakwepa gahunda ya Leta yitwa “Zoning”.

Zoning ni gahunda ya Leta yashyizweho hagamijwe guca akajagari mu banyenganda zitonora zikanatunganya kawa, ikaba iri mu gihugu hose, igamije kurushaho guhuza aba banyenganda, amakoperative y’abahinzi ba kawa n’abandi bahinzi ba kawa ubwabo, ntibahurire ku musaruro gusa ahubwo bagafatanya no kuwushaka.

Iyi gahunda iteganya ko inganda zigomba gufatanya n’aba bahinzi mu buhinzi bwa kawa, bityo umusaruro mu bwinshi no bwiza ukarushaho kwiyongera.

JPEG - 180.9 kb
Abanyenganda n’abahinzi ba kawa basabwe gutahiriza umugozi umwe (Foto Bahuwiyongera S)

Kugira ngo ibyo bishoboke abanyenganda bahuriye hamwe bashyiraho amazone, aho buri wese agira zone ye irimo abahinzi ba kawa, akaba agomba kuba ari bo agurira bonyine ntajarajare mu bandi, akabafasha kuzamura umusaruro kugira ngo na bo babone icyo bamuha.

Ibi rero bamwe mu banyenganda zitonora zikanatunganya kawa mu karere ka Rusizi ntibabyakiriye neza, kuko ngo bumvaga iyi gahunda igamije kubakuraho abakiliya babo.

Bamwe bumvise ko bazahahombera kuko banifashishaga abamamyi babahaga kawa baguze bahenze abaturage bakoresheje iminzani ipfuye, maze biyemeza kurwanya iyi gahunda ya Leta, batangira kujya bagura kawa mu masaha y’ijoro mu gicuku, banifashishije intwaro za gakondo kugira ngo bahangane n’uwo bahura wese.

Ubuyobozi bw’akarere ka Rusizi bufatanyije n’ubuyobozi bwa NAEB mu ntara y’uburengerazuba, bwakoranye inama na bo bubasobanurira neza icyo Leta yari igamije ishyiraho iyi gahunda n’akamaro kayo, umuyobozi w’aka karere wungirije ushinzwe iterambere ry’ubukungu, Kankindi Léoncie yihanangiriza abashaka gukurura umutekeno muke bitwaza intwaro za gakondo mu bucuruzi ko batazihanganirwa.

Yagize ati:“Kwitwaza amacumu n’izindi ntwaro muri ubu bucuruzi ntibishobora kwihanganirwa.Zoning ni gahunda ya Leta, ushaka kuyirwanya abivuge ariko ntidushaka kongera kumva intwaro za gakondo n’abakurura umutekano muke mu karere bitwaje ubucuruzi bwa kawa.Uzongera gufatwa yavogereye zone atashyizwemo azahanwa bikomeye bibere isomo n’abandi bagitekereza gukinisha umutekano muri iki gihugu.”

Umwe mu banyenganda washyirwaga mu majwi mu kuvogera abandi Habimana Japhet, umucungamutungo w’uruganda rwa COCAGI, yahise asaba imbabazi ku mugaragaro avuga ko uru ruganda rugiye kubahiriza gahunda ya Leta, rukareka urugomo.

Bizimana Albert, umuhuzabikorwa wa NAEB mu ntara y’Uburengerazuba, avuga ko Leta ishyiraho gahunda yamaze kubona akamaro izagirira abaturage, iyi na yo ikaba yibitsemo ibyiza byinshi ku nganda n’abahinzi ba kawa.

Yagize ati:“Igiye guca akajagari muri aba bombi, yongere ifaranga mu bahinzi, yongere ubwinshi n’uburyohe bwa kawa, yongere ubusabane n’imikorere inoze hagati y’inganda n’abahinzi ba kawa n’ibindi byinshi, bakaba bagomba kuyishyigikira aho kuyirwanya.”

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE