Advertisement
 
 
 
 
 
 
 
 

Ubukungu

Rusizi:Ihagarikwa rya Sotra Tours ryasize urujijo   

  Yanditswe na BAHUWIYONGERA SYLVESTRE
 May 2016

 
 

Nyuma y’aho ikigo cy’igihugu gishinzwe imirimo imwe n’imwe ifitiye igihugu akamaro (RURA)gihagaritse ibikorwa byo gutwara abagenzi byakorwaga na sosiyete Sotra Tours & Travel Agency ltd, bamwe mu bagenzi n’abakozi bayo mu karere ka Rusizi bagaragaje ko uku guhagarikwa byabatunguye ndetse bikabasigira urujijo.

Nk’uko abaganiriye n’Imvaho Nshya babitangaje, ngo hari bamwe mu bagenzi bari baguze amatike bazi ko ari Sotra Tours ibatwara, nyamara bageze aho bategera imodoka i Rusizi babwirwa ko sosiyete yahindutse, ko iyo bagendamo yitwa Alpha Express, kandi basabwa kubyakira gutyo nta kindi bongeyeho.

Gakunzi Déo, uvuga ko yari umwe mu bakiliya b’imena ba Sotra Tours yagize ati:“Njye ndatunguwe cyane kuko nje nshaka Sotra nkabona nta modoka n’imwe yayo mbona nkagira ngo nakererewe, ariko baza kumbwira ko itagikora yahagarirswe na RURA kubera amakosa yavugwagaho.

JPEG - 161.6 kb
Sosiyete Alpha Express ni yo yahawe gutwara abagenzi mu mihanda Sotra Tours yakoragamo (Foto Bahuwiyongera S)

Nta kundi nabyakiriye ntyo, ngiye gukomeza urugendo, icyakora nkaba nasaba ko iyi ‘agence’ nshya yakwirinda kugwa mu makosa nk’ayo iyi yahagaritswe yaguyemo kuko bayihagaritse babanje kubigenzura, abagenzi tukaba twayobotse iyo twahawe kandi twabyakiriye gutyo kuko tutazi impamvu yabyo neza.”

Umwe mu bakozi ba Sotra Tours mu mujyi wa Rusizi, nawe yabwiye Imvaho Nshya ko batunguwe no kumva ko iyi sosiyete yahagaritswe, bakaba bakiri mu rujijo rwo kumenya niba batakaje akazi cyangwa bazakorana na sosiyete nshya.

Yagize ati:“Twe ubu turi mu gihirahiro ntituramenya uko bimeze, gusa batubwiye ko hahindutse izina gusa ibindi imikorere ari ya yindi, ko nta mukozi uzapfa kwirukanwa kandi ko tuzakomeza guhembwa umushahara wacu.

Gusa turi mu gihirahiro kuko batatubwira neza ibyo ari byo, ariko twizeye neza ko igihirahiro turimo bagomba kukidukuramo tugakora dutekanye.”

Tuyizere Jean Bosco ushinzwe kohereza no kwakira ubutumwa muri iyi sosiyete yahagaritswe, ku ruhande rwa Rusizi, yavuze ko abakozi bagomba kuba bihanganye bagategereza amabwiriza mashya, bakarushaho gukora neza.

Imvaho Nshya yagerageje kuvugana na Kivuranga Jérémie bivugwa ko ari we muyobozi wa Alpha Express, ariko nomero ye ya telefoni igendanwa ntiyashobora kuboneka ngo agire icyo atangariza abanyarusizi bakiri muri urwo rujijo.

RURA yatangaje ko Sotra Tours yahagaritswe kubera kutubahiriza amabwiriza agenga umurimo wo gutwara abantu.

Iyi sosiyete yatwaraga abagenzi bagana Kigali-Rusizi na Kigali-Huye, izi ngendo zayo zose zikaba zeguriwe sosiyete nshya ya Alpha Express.

 

Comments

 
 
Musanze:Ibigori bari bitezeho umusaruro ushimishije byibasiwe na Nkongwa
Musanze:Ibigori bari bitezeho umusaruro ushimishije byibasiwe na Nkongwa

Abaturage bakora umwuga w’ubuhinzi bo mu mirenge imwe n’imwe yo mu karere ka Musanze, baravuga ko bahangayikishijwe n’uko batazabona umusaruro uhagije w’ibigori muri iki gihembwe cy’ihinga A 2017, (...)

Mukahigiro yubatse inzu ebyiri z’ubucuruzi abikesheje kudoda inkweto
Mukahigiro yubatse inzu ebyiri z’ubucuruzi abikesheje kudoda inkweto

Mukahigiro Pascasie utuye mu kagari ka Gasovu, mu murenge wa Karambi mu karere ka Nyamasheke, avuga ko amaze kugera kuri byinshi abikesheje ubudozi bw’inkweto. Uyu mugore w’imyaka 45 avuga ko (...)

 Akarere ka Musanze  kazakoresha miliyoni 18 ku muyoboro w’amazi wa Rukore
Akarere ka Musanze kazakoresha miliyoni 18 ku muyoboro w’amazi wa Rukore

Ubuyobozi bw’Akarere ka Musanze buravuga ko bwateganyije amafaranga miliyoni 18, azifashishwa mu mushinga wo gusana umuyoboro w’amazi wa Rukore uri mu murenge wa Muko na Nkotsi, umaze imyaka 2 (...)

Abanyenganda b’i Huye baracyafite imbogamizi mu kwimukira muri zone yagenewe inganda
Abanyenganda b’i Huye baracyafite imbogamizi mu kwimukira muri zone yagenewe inganda

Mu gace kagenewe inganda mu kagari ka Sovu mu murenge wa Huye mu karere ka Huye, usanga hataritabirwa cyane ngo hakorerwe ibyo hagenewe, kuba nta bikorwaremezo birahagezwa n’ibibanza bihenze (...)

Kirehe: Umukobwa agiye gushinga uruganda ruzohereza inyama z’ingurube mu mahanga
Kirehe: Umukobwa agiye gushinga uruganda ruzohereza inyama z’ingurube mu mahanga

Umukobwa witwa Umubyeyi Aimée Laetitia, utuye mu karere ka Kirehe, umurenge wa Kigina, avuga ko ateganya gukora uruganda rutunganya inyama z’ingurube, ahereye ku bworozi bw’ingurube akora, (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.