Advertisement
 
 
 
 
 
 
 
 

Ubukungu

Rusizi: Bahangayikishijwe n’ikaragiro ridakora ryaratwaye Leta akayabo   

  Yanditswe na BAHUWIYONGERA SYLVESTRE
 4 months ago

 
 

Abaturage bo mu murenge wa Giheke mu karere ka Rusizi, bavuga ko batewe impungenge no kuba ikaragiro ry’amata rya Giheke rimaze umwaka ripfa ubusa, kandi ryaratwaye Leta akayabo k’amafaranga.

Aba baturage bemeza ko bari barijejwe ko bagiye kubona ikaragiro ritunganya amata akanyobwa yuzuje ubuziranenge, ndetse akongererwa agaciro aborozi bakarushaho ‘gukirigita ifaranga’. Nyamara inyubako z’iri karagiro zimaze umwaka wose zuzuye n’imashini kabuhariwe mu gutunganya amata, byose bipfa ubusa.

Iki kibazo cyagejejwe no mu nama njyanama y’aka karere iherutse guterana, aho bamwe mu bajyanama bibazaga ukuntu hari imishinga itwara akayabo k’amafaranga ariko ntikore.

JPEG - 167.6 kb
Izi nyubako zagombaga gukoreramo ikaragiro zimaze umwaka wose nta gikorerwamo (Foto Bahuwiyongera S)

Inama njyanama y’aka karere ka Rusizi yari yatumije umunyamabanga nshingwabikorwa w’aka karere Mushimiyimana Ephrem ngo asobanure impamvu iri karagiro rikomeje kudindira kandi ryaratanzweho amafaranga asaga miliyoni 68.

Mu bisobanuro uyu muyobozi yahaye inama njyanama, na we yemeye ko iri karagiro ryadindiye kandi bikaba byarahombeje cyane akarere, aborozi n’abandi baturage bagombaga kunywa amata atunganye.

Mushimiyimana yavuze ko iri karagiro ryatangiye kubakwa mu mwaka wa 2013 ku bufatanye bw’akarere, Ikigo cy’Igihugu gishinzwe Ubuhinzi n’Ubworozi (RAB) n’umuryango w’abanya Irilande witwa BOTHAR, ryagombaga kuzura mu mwaka wa 2015 ari na ho ryuzuye ritwaye arenga miliyoni 68, ariko ngo ntirirashobora gukora.

Yagize ati “Ni ikibazo gikomeye kandi gikomeje kudutera igihombo gikomeye nk’akarere, aborozi n’abaturage baryijejwe ariko bakaba batabona rikora, babona amazu ahagaze gusa, bikaba byaratewe n’umuterankunga BOTHAR utarakoze ibyo yagombaga gukora ngo imashini yazanye azishyire mu mwanya wazo zitangire gukora.”

Ati “Ziri aho zidateranyije kandi na zo zatwaye akayabo. Icyakora uyihagarariye yatwijeje ko muri uku kwa cumi azagera ino akaziteranya zigatangira gukora kuko natwe bitwicira imihigo bikanabangamira ibindi ryari ryitezweho.”

Avuga ko ubwo izi mashini zahageraga akarere kabanje gukemanga ubuziranenge bwazo, icyakora ngo RBS yavuze ko zabanza guteranywa neza zikaba ari bwo zikorewa ubugenzuzi ngo barebe ko zujuje ubuziranenge, na byo ngo ntibirakorwa.

Iri karagiro ryari ryitezweho inyungu nyinshi, zirimo no guha abaturage akazi, ubushomeri bukagabanuka.

 

Comments

 
 
Ngoma:Yatejwe imbere n’umwuga w’ubucuzi amazemo  imyaka 13
Ngoma:Yatejwe imbere n’umwuga w’ubucuzi amazemo imyaka 13

Habimana Déogratias utuye mu kagari ka Karama, umurenge wa Kazo mu karere ka Ngoma, avuga ko umwuga w’ubucuzi amaze imyaka igera kuri 13 akora umutungiye umuryango, kandi akaba amaze kuwukuramo (...)

Rubavu: Barishimira ko karoti zari zabahombanye zabonye isoko mu mahanga
Rubavu: Barishimira ko karoti zari zabahombanye zabonye isoko mu mahanga

Abahinzi ba karoti bo mu murenge wa Kanzenze mu karere ka Rubavu barishimira ko umusaruro wabo ubu noneho wabonye isoko, nyuma y’uko karoti zabo zari zarabahombanye, aho umufuka waguraga ibihumbi (...)

Ngoma: Umusaruro w’ibishyimbo n’ibigori waragabanutse
Ngoma: Umusaruro w’ibishyimbo n’ibigori waragabanutse

Ubuyobozi bwa Koperative Rebakure Munyamurama_KOREMU, ikorera ubuhinzi bw’ibigori n’ibishyimbo kuri hegitari 400 mu murenge wa Murama buratangaza ko igihembwe cy’ihinga cya 2017A kitababereye kiza, (...)

 RAB irasaba abahinzi gucika ku birayi bya ’Peko’ bagahinga ibiryoshye
RAB irasaba abahinzi gucika ku birayi bya ’Peko’ bagahinga ibiryoshye

Abacuruzi bacuruza ibirayi mu masoko atandukanye yo mu karere ka Rubavu bavuga ko babangamiwe n’ikibazo cy’ibirayi byitwa Peko bikomeje kubatera igihombo, kuko abakiriya babigura nyuma (...)

Kicukiro: Hatangiye kubakwa  umudugudu ufite agaciro kagera kuri Miliyari 5
Kicukiro: Hatangiye kubakwa umudugudu ufite agaciro kagera kuri Miliyari 5

Akarere ka Kicukiro katangije ku mugaragaro igikorwa cyo kubaka umudugudu w’icyitegererezo (IDP Model Village) uzatuzwamo abakuwe mu manegeka ufite agaciro kagera kuri miliyari eshanu z’amafaranga (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.