2017-06-24 12:54:56 clouds 27o High | Kigali Rwanda

Dukurikire:
 
 

Rusizi:Abanyarwanda barenga 5000 bakorera muri Congo buri munsi

Yanditswe na IMVAHO NSHYA

Kuya 2016-07-05 11:33:59

 
Share on:
 
Yasuwe:0
 
Yavuzweho:200
 
10
 
10

Iyo ugeze ku mupaka wa Rusizi ya mbere buri gitondo uhasanga abantu benshi cyane bambuka bajya i Bukavu muri Kongo mu mirimo inyuranye, yaba iy’amaboko, iy’ubwenge, ubucuruzi, akazi ko mu biro, n’indi.

Nk’uko bivugwa n’ubuyobozi bw’abinjira n’abasohoka ku mupaka wa Rusizi, ngo habarurwa buri munsi abaturage hagati ya 5000 na 6500 bawunyuraho bajya gukora imirimo itandukanye muri iki gihugu gituranye n’u Rwanda.

Ibi ngo bituma abaturage barushaho gutera imbere kuko amafaranga bakorerayo buri munsi abagirira akamaro cyane, bakabasha no kubona imirimo kuko nk’iy’ubwubatsi ari myinshi cyane, bikongera n’ubusabane hagati y’abaturanyi b’ibihugu byombi.

JPEG - 307.2 kb
Mu masaha ya mu gitondo ku mupaka wa Rusizi ya mbere usanga hari abaturage benshi baba bajya gukora imirimo i Bukavu

Ibi ngo byiyongeraho no kuba amasaha yo gufungura umupaka yariyongereye, aho ubu umupaka uba ufunguye kugera saa yine z’ijoro, ngo bigatuma iyi irimo bayikora kugeza mu masaha y’ijoro bagataha nta nkomyi umutekano ari wose.

Bamwe mu bagabo n’abagore bakora iyi mirimo, bavuga ko bibagirira akamaro cyane, cyane cyane ko ngo bitanavunanye kuko amasaha yose umuntu ahagereye mbere ya saa tanu z’amanywa akora, agataha saa kumi z’umugoroba kandi agahembwa amafaranga ye yose, yanageza nijoro agahembwa neza.

Aba baturage bahamya ko ibi byose babikesha imibanire myiza n’abaturanyi, ibonekera muri uru rujya n’uruza.

Mushinzimana Théoneste, ukora ubuyede aho i Bukavu yagize ati:“Bidufitiye akamaro cyane kuko abenshi mu bafundi n’abayede ni ho duhahira kuko hari igihe i Rusizi imirimo iba ari mike kandi turi benshi, tukajya i Bukavu.

Aho umufundi akorera amadolari arenga 6 ku munsi, umuyede agakorera arenga 3 ku munsi, mu gihe i Rusizi umufundi ari amafaranga 3000, umuyede akaba amafaranga 1500 ukabona ko tubona menshi kandi banatugaburira saa sita, n’isaha yose uhagereye mbere ya saa tanu ukora ugahembwa nta kibazo.”

Yunzemo ati:“N’abakobwa n’abagore bakora yo ubuyede ari benshi, mu mutekano, tugataha neza nta kibazo mu nzira, tugashima umubano mwiza w’abaturage b’ibihugu byombi utuma twese twunguka.”

Butera Yves, ushinzwe itumanaho na serivisi zihabwa abaturage mu rwego rw’igihugu rw’abinjira n’abasohoka, avuga ko uretse n’abaturage n’igihugu kihungukira.

Aganira n’Imvaho Nshya yagize ati:“Iyo abaturage babonye aho bakora imirimo nka kuriya batera imbere n’igihugu kigatera imbere.Ni byiza cyane, gusa tubasaba gukurikiza amategeko y’igihugu birirwamo, bagakora ibyabajyanye mu mutuzo, bakagaruka kandi umutekano wabo uba urinzwe neza n’igihugu barimo nta kibazo, kandi natwe tuba dushaka ko bakora bakiteza imbere.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE