2017-11-19 15:07:58 clouds 27o High | Kigali Rwanda

Dukurikire:
 
 

Rulindo: Ijambo Perezida Kagame yavuze mu 2002 ryamuhinduriye ubuzima

Yanditswe na IMVAHO NSHYA

Kuya 2017-07-11 07:51:09

 
Share on:
 
Yasuwe:139
 
Yavuzweho:200
 
10
 
10

Mugiraneza Vénuste ufite uruganda rutunganya kawa y’ibitumbwe mu karere ka Rulindo mu murenge wa Tumba,akagari ka Misezero umudugudu wa Taba,aravuga ko impanuro za Nyakubahwa Perezida Paul Kagame zamufunguye amaso agahindura imyumvire ku micururize y’ikawa.

Mugiraneza yatangiye acuruza ikawa abaturage bitunganirije mu mwaka wa 2000; yungutse igitekerezo cyo gushinga uruganda akimara kumva ko abifitiye uburenganzira.

Mugiraneza ati “Uru ruganda rwanjemo kubera ijambo Nyakubahwa Perezida Paul Kagame yavugiye mu ntara y’Amajyepfo mu mwaka wa 2002, ubwo yari yasuye icyahoze ari Perefegitura ya Gitarama. Icyo gihe yaravuze ngo ‘abacuruzi b’ikawa, bajya i Kigali baremereje amakamyo bagerayo bakabaha ubusa kandi hari uburyo bwo gutegura ikawa ikagira uburyohe bwohejuru, ikabona amafaranga menshi...”

Mugiraneza Venuste Umuyobozi wa Tumba Coffee agenzura ko kawa itoranije neza

Iri jambo ryamukoze ku mutima, mu mwaka wa 2003 ajya gusobanuza mu muryango utegamiye kuri Leta (ADAR/Assistance à la Dynamisation de l’Agribusiness au Rwanda) yumva ibisabwa birakomeye ariko ntiyacika intege.

Mu mwaka wa 2006 yahawe icyangombwa cyo gushinga uruganda n’icyahoze ari OCIR-Café, mu 2008 yifatinije na bagenzi be babiri batangiza isosiyete yitwa Tumba Coffee S.A.R.L.

Abo batangiranye bamugurishije imigabane none Tumba Coffee Ltd imaze kumuhindurira ubuzima ndetse ni umufatanyabikorwa mwiza wa Leta kuko agira uruhare mu iterambere ry’uburezi, ubukungu n’imibereho myiza y’abaturage muri zone akoreramo(utugari 6 kuri 7 tugize umurenge wa Buyoga,n’umurenge wose wa Kisaro).

Dore bimwe mubikorwa Tumba coffee Ltd yakoze mu myaka 2 mu rwego rwo kuba umufatanya bikorwa muri zone akoreramo: Tumba Coffee Ltd ifasha abana 10 biga mu ishuri ribanza rituriye uruganda(Ecole Primaire Tumba L.S.) bakomoka mu miryango itishoboye, buri mwaka bahabwa imyenda y’ishuri ubu bageze mu mwaka wa 2 yaguriye impuzankano n’ikipe y’abakobwa y’umurenge wa Buyoga.

JPEG - 271.3 kb
Kawa isigaye itunganywa kinyamwuga

Yasoje n’imirimo yo gukora umuhanda wa km 6 werekeza ku ruganda wari wakozwe na VUP ntiwarangira neza, yatanze n’isakaro kabantu 2 batishoboye umwe mu kagari ka Karama /Buyoga n’undi wo mu kagari ka Misezero Tumba .

Yakomeje agira ati “Mbere y’uko nza mu by’ikawa nahoze ndi umurezi mu mashuri abanza kuva mu mwaka 1993 kugera 1999. Niba naratanze umwanya mpembwa amafaranga y’u Rwanda 25,000 ubu nkaba nshobora kwigenera 150,000 by’umushahara ku kwezi, birumvikana ko harimo intera.”

Uru ruganda rukoresha abakozi barenga 94 mu gihe cy’isarura, bakaba barimo 10 bahoraho, 4 muri bo akaba ari abakangurambaga b’abahinzi bashyizweho ku bufatanye bwa Tumba Coffee Ltd na R.T.C (Rwanda Trading Campany) . Abahinzi 1453 bibumbiye mu matsinda 40 abarizwa mu murenge wa Buyoga n’uwa Kisaro ni bo bagemura umusaruro wabo bakaba bafite ibiti by’ikawa 248250.

JPEG - 134.2 kb
Tumba Coffee ifasha abana 10 biga kuri Ecole Primaire Tumba (L.S.)

Inyungu aba bahinzi bakura ku ruganda ziyongera kugiciro bagurirwaho buri munsi nuko bagurizwa amafaranga y’ishuri bakishyurira abana babo cyangwa bagatanga mituweli mu gihe batarasarura.

Tumba Coffee Ltd itanga ibihembo birimo amapombo yo gutera imiti, secateurs zifashishwa mu gukorera ikawa, abahinzi b’indashikirwa bagemura umusaruro uri hejuru ya toni imwe bagahembwa by’umwihariko.

Mugiraneza ati “Mu 2016 twagize abahinzi b’indashikirwa 26; muri kamena uyu mwaka bose tuzabishyurira ubwisungane bw’ubuvuzi hamwe n’imiryango yabo yose irimo abantu bagera 157.”

Ubuyobozi bwa Tumba Coffee Ltd burashimira Leta yashyizeho guhunda ya Coffee Zoning’ kuko iyi gahunda ifitiye akamaro abantu bose bari mu ‘secteur’ y’ikawa ( abahinzi, inganda n’amakoperative).Ubungubu ba nyir’inganda bashobora gukora igenamigambi ry’igihe kirekire kuko bafite aho bakorera hazwi neza.

Ni muri urwo rwego ubuyobozi bwa Tumba Coffee Ltd bufite umuhigo w’uko muri zone bakoreramo umusaruro uzikuba 3 mu myaka 7 irimbere ,ibi bisobanuye ko umusaruro kugiti uziyongera ukava ku mpuzandengo ya Kg 0,8 ukagera kuri Kg2,4. Ibi ntabwo ari inzozi kuko ubu umuhinzi uhiga abandi muri zone dukoreramo afite Kg 3,3 kandi ahari umutekano n’ubuyobozi bwiza byose ngo birashoboka.

JPEG - 290.3 kb
Bamwe mu babonye akazimuri Tumba Coffee barayivuga imyato
JPEG - 254.6 kb
Umusaruro w’ikawa ya Tumba wanikwa ku bitanda 70
JPEG - 294.1 kb
Umuturage wari utuye mu manegeka yahawe isakaro na Tumba Coffee
JPEG - 84.9 kb
Ikipe y’abakobwa y’Umurenge wa Buyoga yaguriwe impuzankano
atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE