2017-08-19 07:41:08 clouds 27o High | Kigali Rwanda

Dukurikire:
 
 

Rubavu:Igare yaguze ibihumbi 80 rimaze kumwungura asaga miliyoni mu mwaka umwe

Yanditswe na IMVAHO NSHYA

Kuya 2017-04-29 16:48:12

 
Share on:
 
Yasuwe:239
 
Yavuzweho:200
 
10
 
10

Dusabimana Pascal, umwe mu rubyiruko rwo mu murenge wa Cyanzarwe mu karere ka Rubavu, avuga ko mu gihe cy’umwaka amaze akora akazi ko kunyonga igare, ubu ibyo amaze kwigezaho bifite agaciro k’amafaranga arenga miliyoni.

Uyu musore w’imyaka 17 ukora akazi ko kunyonga igare atuye mu mudugudu wa Mute, akagari ka Rwangara, umurenge wa Cyanzarwe.Yemeza ko iri gare yaguze amafaranga ibihumbi 80 rimubeshejeho ku buryo atajya gusaba icyo akeneye, ahubwo akunganira abo mu muryango we mu gihe bagize ikibazo gikeneye amafaranga.

Ati “Kuva natangira kunyonga igare byampaye ubushobozi bwo kubaka inzu iciriritse y’amabati mirongo 40, nayaguze ari mashya ndayubakisha, ndangije ngura ikibanza, byose mbibaze nakubwira ko biri mu gaciro karuta miliyoni, nanjye ndi umwe mu batunze miliyoni.”

JPEG - 185.5 kb
Dusabimana amaze kwiteza imbere abikesha igare ritwara abaturage (Foto Iyaremye Y)

Akomeza agira ati “Byari inzozi kuri njye kuko ntabwo iwacu twishoboye, rero narize ngeze mu mwaka wa 2 mva mu ishuri ntangira kunyonga ari nako mbarizwa mu makoperative atanga buri munsi, byamfashije kugera ku byo maze kugeraho byose mbikesha gukura amaboko mu mufuka ngakora.”

Dusabimana yemeza ko hari bamwe mu rubyiruko bamubonaga atwaye igare bagatangira kumuseka bavuga ngo atazi ibyo arimo, ariko ubu ngo bamwe batangiye kwifuza kubaho nk’uko abayeho.

Uyu musore avuga ko afite inzozi zo kuva ku igare akagura moto, kugira ngo amafaranga yinjiza arusheho kwiyongera, ndetse n’iterambere rye muri rusange rirusheho kuzamuka.

Yagize ati “Ndi kwizigamira byibuze ngo ndebe ko nazagura moto mu minsi iri imbere kandi njye ibyo niyemeje mba ngomba kubigeraho kuko nkorera ku ntego, nzi icyo nshaka nkangurira na bagenzi banjye guhagurukira gukora bagakura amaboko mu mufuka kuko imbere ni heza ku bahagurutse bagakora.”

Gakuru Fufuka Benoit, umunyamabanga nshingwabikorwa w’umurenge wa Cyanzarwe, aragira inama urubyiruko, ngo bahaguruke bakore, bakure amaboko mu mufuka mu rwego rwo kwiteza imbere.

Aragira ati “Muri aka karere cyane muri uyu murenge turacyafite urubyiruko rudashaka gukora kandi hari amahirwe menshi muri ayo mahirwe harimo imihanda turimo kubakirwa yatanze akazi kenshi ku batishboye bari mu cyiciro cya mbere, ikindi abasore babonye akazi ko gutwara mu bunyonzi, turasaba urubyiruko guhaguruka rugakora.”

Akomeza avuga ko bagiye gukaza ubukangurambaga bashishikariza abakiri bato gukora ndetse no kubagira inama y’ahakwiye gushyirwa imbaraga mu gushaka icyo gukora.

Mu kiganiro Dusabimana yagiranye n’imvaho Nshya nawe yakanguriye urubyiruko rwo muri aka karere gukura amaboko mu mifuka bagakora, bakirinda kwinemfaguza akazi, kandi amafaranga bakoreye bakirinda kuyapfusha ubusa, ahubwo bakayakoresha mu bikorwa bizamura imibereho yabo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE