2017-08-21 15:16:56 clouds 27o High | Kigali Rwanda

Dukurikire:
 
 

Rubavu:Barifuza isoko ryagutse ry’umusaruro w’ibirayi wabaye mwinshi

Yanditswe na IMVAHO NSHYA

Kuya 2017-01-10 12:03:00

 
Share on:
 
Yasuwe:63
 
Yavuzweho:200
 
10
 
10

Bamwe mu bahinzi b’ibirayi mu murenge wa Bugeshi mu karere ka Rubavu, bavuga ko bahangayikishijwe n’ikibazo cy’isoko ry’umusaruro w’ibirayi ridahagije, kandi bejeje byinshi cyane.

Aba bahinzi bavuga ko kugeza ubu babuze aho bajyana igice kimwe cy’umusaruro kubera ko ibirayi byeze byikubye kabiri, n’igiciro kikazamuka, ariko isoko ry’umujyi wa Kigali bari bafite magingo aya babona ritameze neza.

Hagenimana Epimaque, umwe mu baturage bahinga ibirayi mu murenge wa Bugeshi, avuga ko aho bakuraga toni 2 z’ibirayi ubu byeze hakaha haravuye toni 5.

Aragira ati “Twagize umwero mwinshi ariko abakiliya babaye bake, ubu twagabanyije gusarura kuko uko bijya hanze birahomba ibiro, dufite ikibazo cy’aho twakwerekeza umusaruro wacu, n’ibihari byabuze ababirangura.”

JPEG - 160.6 kb
Aka gasoko abaturage bifuza ko kagurwa (Foto Ngaboyabahizi P).

Aba baturage nubwo bavuga ko umusaruro wabaye mwinshi, ngo ubusanzwe iyo habaga habonetse umusaruro mwinshi igiciro cyaramanukaga kikagera no ku mafaranga mirongo 60, ariko ubu bakaba bashima gahunda yashyizweho y’amakusanyirizo yatumye igiciro kitagabanyuka, kuko magingo aya umuhinzi ari guhabwa amafaranga 145 ku kilo.

Mukeshimana Esperance, nawe ni umuhinzi, aragira ati “Iyi gahunda y’amakusanyirizo yaradufashije cyane kuko dusigaye tugaruza ndetse tukunguka, mbere twari abahinzi pe, wasangaga ku mwero ibirayi byarase biri gucuruzwa mu kajagari ariko ubu amakusanyirizo yarabikemuye, ubu njye iyo nejeje kuri konti haba hariho amafaranga atari munsi ya miliyoni 2 kandi zivuye mu buhinzi.”

Aba bahinzi bemeza ko imvura yari yabateye ubwoba yaguye mu mezi abiri ashize ntacyo yabatwaye, bakaba brejeje nk’uko babiteganyaga kandi biraniyongera, gusa bakaba babangamiwe n’uko biri kwerera rimwe bakabura aho babigurisha.

Nsabimana Mvano Etienne, umunyamabanga nshingwabikorwa w’umurenge wa Bugeshi, avuga ko bari gufata ingamba zigamije gutuma abahinzi badahomba ibirayi biborera mu mirima, aho bizajya bikurira mu butaka bakagenda bategereza ntibasarurire rimwe.

Aragira ati “Mu byumweru bibiri biri imbere turi gushaka uko bazajya bakura banacuruza ibirayi kuri gahunda mu kurwanya ibihombo biterwa no gukurira rimwe ibirayi.

Ubu byabuze abakiliya kuko byeze ari byinshi, ariko turagerageza gukora ubuvugizi ku buryo ikibazo gikemuka.”

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE