2017-08-22 09:34:31 clouds 27o High | Kigali Rwanda

Dukurikire:
 
 

Nyiranzabonimpa yinjiza ibihumbi 800 abikesha ubuhinzi bw’ingano

Yanditswe na IMVAHO NSHYA

Kuya 2017-05-01 10:30:29

 
Share on:
 
Yasuwe:134
 
Yavuzweho:200
 
10
 
10

Umuhinzi wo mu karere ka Musanze mu murenge wa Gataraga witwa Nyiranzabonimpa, arishimira ko mu myaka itanu ishize akora ubuhinzi bw’umwuga, iterambere rye ryazamutse ku buryo bwihuse, kuko buri gihembwe yinjiza amafaranga asanga ibihumbi 800 mu musaruro w’ingano.

Uyu mugore avuga ko ubu abarirwa mu cyiciro cy’abifite, kuko abasha kwishyurira abana be amashuri meza, ndetse agahemba abakozi basaga 60 akoresha mu buhinzi bwe, kandi akanizigamira.

Avuga ko ubuhinzi bw’ingano bumuha umusaruro ushimishije kandi butamuvunnye cyane nk’uko bigenda ku bindi bihingwa, ari nayo mpamvu yabishyizemo imbaraga zose.

Yagize ati “Nahisemo gukora ubuhinzi bw’ingano ku mwanya wa mbere mu bihingwa byose muri Musanze n’ubwo hera ibirayi, kubera ko ingano zidahingwa na benshi nk’ibyo birayi kandi ntizirushya zinatanga umusaruro, nasanze zera cyane muri kano gace mpitamo kuzegurira umutima wanjye wose.

PNG - 569.1 kb
Nyiranzabonimpa mu murima we w’ingano(Foto Ngaboyabahizi P)

Natangiye kuzihinga by’umwuga mu myaka itanu ishize.Ubu buhinzi ntibumvuna, ntibukenera abazamu nk’uko ku bindi bihingwa bigenda nk’ibirayi n’ibigori, usibye gutera imbuto nkabagara ubundi nkagaruka nsarura no kwakira amafaranga gusa”.

Uyu mugore avuga ko ngo kugira ngo akure umusaruro mu buhinzi bw’ingano ibanga nta rindi uretse kumvira abajyanama b’ubuhinzi no guhinga imbuto y’indobanure.

Yagize ati “Ibanga nta rindi, ni ukwita ku ngano zanjye uko bikwiye, mbere na mbere nta nama n’imwe y’umujyanama mu buhinzi nsuzugura, ntera imbuto nkeya ubundi nkazikorera neza.

Naje gusanga ikintu gitera benshi kubura umusaruro ari uko batera imbuto nyinshi cyane, nka njye ntaratangira kugirwa inama na RAB nk’ahantu ubu ndi gutera ibiro bitanu nahateraga ibiro 50 ubundi nkategereza umusaruro nkaheba, ariko ubu ngira umusaruro mwiza nta kibazo, ni ngombwa rero gushyira umwete ku murimo wawe no kwita ku bihingwa byawe”.

Uyu mugore ngo kuri ubu kuri hegitari asaruraho toni 5, ibintu bimuha ubushobozi bwo guhemba abakozi be bagera kuri 60, nyuma yo kubahemba na we akigenera umushahara.

Yagize ati “Mpinga nibura ingano ahantu hagera kuri hegitari 4, kubera ko ubutaka ntabwo nakubwira ngo bwose ni ubwange kuko ndakodesha, ngira abakozi rero bahoraho nyuma y’uko mbahemba rero nsanga nibura nsagura ibihumbi 800 birenga, urumva ko amafaranga nk’aya k’umugore nawe wapfakaye utunze abana 4 ni menshi.

Ni ho nkura ubwisungane mu kwivuza n’ibindi byinshi byo kwikenura.Ubu rero intego yanjye ni uko nta mwana wanjye utaziga, intego rero ikomeye ni uko nzarihira abana banjye kaminuza mbikuye mu buhinzi bw’ingano kandi ndabyizera mpereye ko nanone ubu mba mfite ubwizigame kuri banki , bufatika mu gihe cy’imyaka 5”.

Uyu mugore asaba bagenzi gushaka icyo buri wese yakora kikamuteza imbere, kandi umurimo berekejeho amaboko bakawukorana umwete kugira ngo ubazanire inyungu ihagije.

Yagize ati “Ubuhinzi ni ipfundo ry’iterambere rikomeye, ubu mfite intama 8 za kizungu, imwe ifite agaciro k’amafaranga ibihumbi 80 kugera ku 100. Mfite inkoko za kijyambere zitari munsi ya 300, ndihira abana banjye amafaranga yishuri, ubu mfite urangije ayisumbuye nishyuriraga ibihumbi 80 ku gihembwe, mfite n’abandi bakiri mu wa gatatu no mu wa mbere, bose kandi ni jye ubishyurira kandi biga mu mashuri meza.

Kubishyurira rero nta handi mbikomora atari mu buhinzi bw’ingano, uyu warangije nawe ngiye kumushyira muri kaminuza kandi amafaranga yo kumurihira arahari.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE