2017-07-22 13:49:51 clouds 27o High | Kigali Rwanda

Dukurikire:
 
 

Nyamasheke:Umusaruro w’icyayi ukomeje gupfa ubusa

Yanditswe na IMVAHO NSHYA

Kuya 2016-04-27 05:07:31

 
Share on:
 
Yasuwe:7
 
Yavuzweho:200
 
10
 
10

Abahinzi b’icyayi bibumbiye muri koperative y’abahinzi b’icyayi COTHEGA ikorera mu murenge wa Karamabi, mu karere ka Nyamasheke, bakomeje gutakambira ubuyobozi bw’aka karere ngo bubatabare ku cyayi cyabo gikomeje kubahombera, bakimena kubera kubura umuhanda wanyuramo imodoka ziza kugitwara.

Nk’uko bitangazwa na Perezida w’iyi koperative Pasiteri Ndababonye Damien, ngo uyu muhanda Karambi-Gasenyi- Gisovu watangiye gukorwa mu ntangiriro z’ukwezi kwa mbere, ugomba gutsindagirwa neza kugira ngo babone uko bageza icyayi cyabo mu Gisovu, mu karere ka Karongi.

Abahinzi b’icyayi bari bijejwe ko uyu muhanda w’ibilometero bigera kuri 30, ukorwa mu gihe cy’iminsi 30, none ngo amezi abaye atatu ntaho uragera.

JPEG - 198.3 kb
Abahinzi b’icyayi barifuza gukorerwa uyu muhanda kugira ngo babashe kugurisha umusaruro wabo (Foto Bahuwiyongera S)

Inkomoko y’iki gihombo abaturage baguyemo, ngo ni uko bahinze iki cyayi bijejwe n’ubuyobozi bw’aka karere kubakirwa uruganda rugitunganya hafi, rukaba rwaragombaga kubakwa n’umushoramari Karyabwite Pierre, nyamara ngo bamaze kugihinga arabatenguha ntiyarwubaka, cyeze babura aho bakigurisha.

Uburyo bushoboka aba bahinzi bari basigaranye ni ubwo kujya kugurisha iki cyayi mu Gisovu mu karere ka Karongi, ariko nabwo bakomwa mu nkokora n’umuhanda udakoze.

Ikibazo ngo cyaje gusakuza bigera ku buyobozi bw’akarere na bwo bukigeza ku kigo cy’igihugu gishinzwe imihanda (RTDA), banagirana amasezerano yo gukora uyu muhanda muri Mutarama.

Iki kigo nacyo cyahaye isoko sosiyete y’abashinwa yagombaga kuwutsindagira neza ,bemeranya ko uzaba utsindagiye neza mu minsi 30 abaturage bakaba bajyanye iki cyayi mu Gisovu, none amezi abaye 3 nta kirakorwa, icyayi cyera cyabuze aho kijyanwa, bakomeza kukimena.

Umuyobozi w’aka karere wungirije ushinzwe iterambere ry’ubukungu Ntaganira Josué Michel, yabwiye Imvaho Nshya ko iki kibazo abaturage bafite gikomeye cyane, kuko igihombo kitagarukira ku baturage gusa, ahubwo na Leta ibihomberamo.

Yagize ati:“Ni ikibazo gikomeye cyane kandi si abaturage bahahombera bonyine na Leta irahomba cyane.Njye ubwanjye nigiriyeyo inshuro zirenga 2 zose, mbona akababaro abaturage barimo,kuko hari n’icyayi bareka gusoroma kubera kwanga kukimena kikarengerana, barasarura toni zirenga 20 zigapfa ubusa.

Abakora uyu muhanda batubwiye ko ibyo bawukoresha ngo ukomere muri iki gihe imvura ihita ibisenya, bikaba bisaba kuzawukora mu zuba kugira ngo uzakomere kuko hari igitaka kibi cyane.”

Uyu muyobozi avuga ko nyuma yo kubwirwa gutyo ubuyobozi bwashatse icyaba gikozwe, busanga icyakorwa kihutirwa ari ukuvugana n’uruganda rw’icyayi rwa Gisakura ruri mu murenge wa Bushekeri muri aka karere, rukaba rufashe iki cyayi nubwo naho kugerayo ari kure cyane, rukagitunganya mu gihe uyu muhanda utaraboneka.

Yagize ati:“Ni kure cyane ariko ni igisubizo cyo kwifashisha mu gihe dutegereje umucyo ngo uyu muhanda ukorwe, aho kugira ngo icyayi gikomeze kumenwa, abaturage bacike intege usange banakiranduye, haba hifashishwa ubu buryo.”

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE