2017-08-16 13:12:06 clouds 27o High | Kigali Rwanda

Dukurikire:
 
 

Nyabihu:Abakora mu ruganda ruzatunganya amata barishyuza imishahara y’amezi 4

Yanditswe na IMVAHO NSHYA

Kuya 2016-08-09 11:46:10

 
Share on:
 
Yasuwe:3
 
Yavuzweho:200
 
10
 
10

Abaturage bo mu murenge wa Mukamira mu karere ka Nyabihu, bakora imirimo itandukanye mu ruganda ruzatunganya amata, baravuga ko babangamiwe bikomeye no kuba bamaze amezi 4 batabona imishahara yabo ibarirwa mu mafaranga asaga miliyoni 2.

Aba bakozi bose uko bagera kuri 35 bishyuza amafaranga agera kuri miliyoni 2, ibintu bemeza ko byabateye ubukene n’amakimbirane mu ngo.

Ubuyobozi bw’akarere bwo buratangaza ko iki kibazo butakizi, ariko nyuma y’aho bubimenyeye ngo bugiye kugikurikirana.

Aba baturage bavuga ko bambuwe na rwiyemezamirimo bavuga ko aheruka kubahembera ukwezi kwa Werurwe uyu mwaka 2016.

JPEG - 108.6 kb
Nyuma yo kumara amezi 4 badahembwa, muri uru ruganda ngo abakozi bahagaritse akazi hasigayemo umuzamu umwe gusa

Kuva icyo gihe ngo yatangiye kujya yibera i Kigali, bamushaka bakamubura, ngo ahubwo yagarukaga rimwe na rimwe aje kwirukana abakozi.

Aba bakozi bamburiwe imishahara yabo muri uru uruganda ruzajya rutunganya amata, ni abakoragamo isuku n’abandi bubakagamo, ndetse n’abazamu.

Niyonteze Fulgence ni umwe mu bakozi bo muri uru ruganda, yagize ati:“Uru ruganda barutekereza twumvaga tuzatera imbere, ariko ni ko turushaho kugenda dusubira inyuma, na wese wansobanurira ute ukuntu umuntu akora akamara amezi agera kuri ane yizezwa guhembwa ariko ntagire icyo acyura.

Ubu njye banyambuye agera ku bihumbi 124, ibi twabibwiye ubuyobozi bw’umurenge ariko nta gisubizo.”

Mukundufite Immaculee, umwe mu bagore bakoze muri uru ruganda, yagize ati:“Abagore ubu twabaye ibicibwa n’abagabo bacu bavuga ko twirirwaga mu zindi ngeso, twagera mu ngo tugatotezwa tugakubitwa, iyo abana barwaye tubatekera amababi y’intusi kuko kugeza ubu nkanjye ntabwo ndatanga mituweli.

Ikindi kandi n’aho nafataga ifunguro ndetse n’andi madeni mu rwego rwo kwikemurira tumwe mu tubazo twa buri munsi ubu barampiga, rwose ubu nta munsi n’umwe niyumvisha ko ikibazo cya ba rwiyemezamirimo kizakemurirwa ngo bareke kwambura abo bakoresha, ubu ..yaradukoresheje aratwambura arangije ubu yibereye Kigali twe inzara ituzahaza”.

Umuyobozi w’akarere ka Nyabihu, Uwanzwenuwe Theoneste, we yavuze ko iki kibazo atakizi, gusa yizeza ko ubwo akimenye agiye kugikemura mu buryo burambye.

Yagize ati:“Ikibazo twari tuzi kuri ruriya ruganda ni ibura rya zimwe mu mashini zitari zahagera kugira ngo rukore neza, nta kibazo nari nzi na kimwe cyo kuba hari abakozi badahembwa.

Ubu rero tugiye kugikurikirana mu maguru mashya, ku byerekeye ba rwiyemezamirimo rero batishyura abo bakoreshe na bo bamenye ko baba bari k’ubutaka bw’u Rwanda, bityo rero igihe cyose batarahemba abo bakoresheje bazakurikiranwa”.

Imvaho Nshya yagerageje kuvugana kuri telefone igendanwa n’uyu rwiyemezamirimo bivugwa ko yatinze guhemba abaturage ntibyakunda, tukaba tuzakomeza gukurikirana iyi nkuru.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE