Advertisement
 
 
 
 
 
 
 
 

Ubukungu

Ngoma:Umugabo ufite ubumuga yigishije abagore 60 kuboha ibiseke   

  Yanditswe na MANISHIMWE NOËL
 October 2016

 
 

Semasaka Jean Marie Vianney wo mu murenge wa Remera, akarere ka Ngoma, amaze imyaka 18 aboha ibiseke n’imitako bita ‘sous-plat’, avuga ko yishimira ko uyu mwuga wamuteje imbere kandi ugatuma benshi bamugana akabigisha, kuri ubu akaba amaze kwigisha abagore 60 n’abagabo 4.

Semasaka Jean Marie Vianney ni umugabo uri mu kigero cy’imyaka 50, afite umugore umwe n’abana 4.Afite ubumuga bw’amaguru amaranye imyaka 22, ku buryo uretse akazi yakora yicaye hamwe, nta kandi ashobora gukora.

Mu kiganiro n’Imvaho Nshya, Semasaka asobanura ko yatangiye kwiga kuboha ibiseke mu 1998, nyuma yo kubona ko ubumuga bwe butamwemerera kujya mu murima ngo ahinge nk’abandi, kandi akabona bidakwiye ko ahora arya yicaye, atakoze.

JPEG - 364.1 kb
Semasaka Jean Marie Vianney ni umuhanga mu kuboha ibiseke n’imitako itandukanye (Foto Manishimwe N)

Ahagana mu mwaka wa 2005 ni bwo yatangiye kuboha ibiseke nk’umwuga ndetse akanabonamo amafaranga kuko ibyo yabohaga yabicuruzaga, gusa agaragaza ko ikibazo yagiraga ari uko yaba abagabo n’abagore bamubonaga aboha bamukwenaga, bavuga ko akora umwuga w’abagore.

Yagize ati “Baravuze bati n’umugabo aboha ibiseke! bakanseka, ariko kubera ko ari wo mwuga nari ngiye gukora kandi mfite ubumuga, nabimye amatwi; barankwennye ariko nyuma babonye ntangiye kubona amafaranga, baravuga ngo twaramusekaga none yatangiye kubona amafaranga, abagore batangira kujya banyegera nkabigisha.”

Nyuma yo kubona ibyo Semasaka Jean Marie Vianney akora, Ubuyobozi bw’umurenge wa Remera bwaramwegereye bumusaba kwigisha abagore bafite ubumuga bibumbiye muri Koperative ‘Nawe arashoboye’ ikora imitako, kuboha ibiseke, imipira y’ubudoko n’ibindi, na we arabyemera.

Uyu mugabo uretse kuboha ibiseke agaragaza ko ashoboye no kuboha ibyo bita ‘amasupura’, imitako itandukanye, n’amaherena y’abagore.

Avuga ko ashobora kuhoba nibura ibiseke 4 mu kwezi, igiseke kimwe akakigurisha hagati y’amafaranga y’u Rwanda 2500 na 5000 bitewe n’ingano n’ibikoresho yakoresheje akiboha, ibi bituma yibarira amafaranga atari munsi y’ibihumbi 20 yinjiza buri kwezi, akesha kuboha ibiseke.

Semasaka atangaza ko ubu amaze kwigisha abasaga 60 kuboha ibiseke, agira ati “Ubu maze kwigisha abagore 60, gusa ubu hari abagore 30 muri koperative y’abafite ubumuga n’abagabo 4 nabo bari kwiga kuboha ibiseke, ndabigisha, tugafatanya.”

Musabyimana Valentine, umwe bagore bigishijwe kuboha ibiseke na Semasaka Jean Marie Vianney avuga ko yishimira iterambere agezeho.

Yagize ati “Ni we watwigishije, byaradutangaje ariko byaduhaye isomo kuko kuboha uduseke ni umurimo bamwe basuzugura ariko ubu aho mbimenyeye biri kudufasha, abana ku ishuri bariga neza, ubu nta bukene, kuko mbona amafaranga.”

Mujawimana Valentine, Umuyobozi wa Koperative ‘Nawe arashoboye’ y’abafite ubumuga igizwe n’umubare munini w’abagore bigishijwe kuboha ibiseke na Semasaka, avuga ko ibyo uyu mugabo akora ari umusaruro wa Politiki ya Leta y’u Rwanda y’ubwuzuzanye bw’abagore n’abagabo.

Yagize ati “Kuba umugabo yaboha ibiseke twabonaga bidasanzwe, ariko aho Leta y’Ubumwe yadukanguriye ubwuzuzanye, nabonye ari ikintu kiza kuko hari abagabo bahise basobanukirwa.

Nishimiye ko umugabo yaje tugafatanya kuboha ibiseke, bituma n’abandi bagabo batinyuka kandi ubona na we ku giti cye bimufasha kwiteza imbere mu muryango we.”

Semasaka Jean Marie Vianney avuga ko ashimira Leta y’u Rwanda yatumye abantu bafite ubumuga bajya ahagaragara.

Agaragaza ko kuboha ibiseke byamushoboje kwiyubakira inzu nziza, ku buryo ngo mu ntumbero ze harimo ko ibyo akora yaba we bwite na koperative bibonye isoko ryagutse, yatera imbere akabasha no kwigurira moto.

 

Comments

 
 
Musanze:Ibigori bari bitezeho umusaruro ushimishije byibasiwe na Nkongwa
Musanze:Ibigori bari bitezeho umusaruro ushimishije byibasiwe na Nkongwa

Abaturage bakora umwuga w’ubuhinzi bo mu mirenge imwe n’imwe yo mu karere ka Musanze, baravuga ko bahangayikishijwe n’uko batazabona umusaruro uhagije w’ibigori muri iki gihembwe cy’ihinga A 2017, (...)

Mukahigiro yubatse inzu ebyiri z’ubucuruzi abikesheje kudoda inkweto
Mukahigiro yubatse inzu ebyiri z’ubucuruzi abikesheje kudoda inkweto

Mukahigiro Pascasie utuye mu kagari ka Gasovu, mu murenge wa Karambi mu karere ka Nyamasheke, avuga ko amaze kugera kuri byinshi abikesheje ubudozi bw’inkweto. Uyu mugore w’imyaka 45 avuga ko (...)

 Akarere ka Musanze  kazakoresha miliyoni 18 ku muyoboro w’amazi wa Rukore
Akarere ka Musanze kazakoresha miliyoni 18 ku muyoboro w’amazi wa Rukore

Ubuyobozi bw’Akarere ka Musanze buravuga ko bwateganyije amafaranga miliyoni 18, azifashishwa mu mushinga wo gusana umuyoboro w’amazi wa Rukore uri mu murenge wa Muko na Nkotsi, umaze imyaka 2 (...)

Abanyenganda b’i Huye baracyafite imbogamizi mu kwimukira muri zone yagenewe inganda
Abanyenganda b’i Huye baracyafite imbogamizi mu kwimukira muri zone yagenewe inganda

Mu gace kagenewe inganda mu kagari ka Sovu mu murenge wa Huye mu karere ka Huye, usanga hataritabirwa cyane ngo hakorerwe ibyo hagenewe, kuba nta bikorwaremezo birahagezwa n’ibibanza bihenze (...)

Kirehe: Umukobwa agiye gushinga uruganda ruzohereza inyama z’ingurube mu mahanga
Kirehe: Umukobwa agiye gushinga uruganda ruzohereza inyama z’ingurube mu mahanga

Umukobwa witwa Umubyeyi Aimée Laetitia, utuye mu karere ka Kirehe, umurenge wa Kigina, avuga ko ateganya gukora uruganda rutunganya inyama z’ingurube, ahereye ku bworozi bw’ingurube akora, (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.