2017-08-16 13:12:06 clouds 27o High | Kigali Rwanda

Dukurikire:
 
 

Musanze:Abanyamahoteli babangamiwe n’abacumbikira abantu mu buryo bwa magendu

Yanditswe na IMVAHO NSHYA

Kuya 2016-05-02 06:51:36

 
Share on:
 
Yasuwe:36
 
Yavuzweho:200
 
10
 
10

Abafite amahoteli n’amaresitora mu mujyi wa Musanze bavuga ko baterwa igihombo n’abatanga serivise z’amacumbi mu buryo budasobanutse, kuko ngo bituma batabona umusaruro kandi bo batanga imisoro, mu gihe aba bo babikora mu buryo bwa magendu kandi bakabatwarira abakiriya.

Akarere ka Musanze ni kamwe mu dufite amahoteli n’amaresitora menshi kandi agezweho, kubera ko haboneka ba mukerarugendo baba baje gusura ingagi mu birunga ndetse n’ibirunga ubwabyo.

Kuri ubu rero abafite ibyumba bakodesha mu buryo bwa magendu kandi bidasora, ngo bari mu bituma abakodesha amacumbi by’umwuga batinjiza amafaranga uko bikwiye.

JPEG - 119.5 kb
Mu mujyi wa Musanze hari abakodesha amacumbi mu buryo bwa magendu

Nshima, ni umwe mu banyamahoteli akaba afite iyitwa Virunga Hotel.Avuga ko kuba umwuga wabo warinjiwemo n’abawukora mu buryo bwa magendu bituma abakiriya bagabanyuka, bigatuma bamwe bisanga mu bihombo.

Yagize ati:“Amahoteri kuri ubu abura abakiriya kubera abantu bamwe bagenda bagashyira utwumba hirya y’umujyi, bakajya bacumbikiramo abagenzi.Ibi rero biraduhombya cyane, ikindi kandi abo babajyana n’aho umutekano wabo utizewe, ibi bikaba bigaragaza isura mbi ku gihugu.

Niba ujyanye umunyamahanga iwawe kandi hatagira isuku, ubwo nyine azagenda asebya u Rwanda, hiyongeraho kandi no kuba banyereza imisoro ya Leta.Turifuza ko udafite ibyangombwa bihagije mu kwakira abagenzi yajya areka ababifitiye ubushobozi bagakora”.

Umwe mu bakozi ba Leta utarashatse ko amazina ye atangazwa, yagaragaje ko imwe mu mpamvu zituma bacumbika mu macumbi ya magendu, ari uko baba bahawe za misiyo nto kandi bifuza gusagura kuyo bahawe yo gucumbikamo.

Yagize ati:“Burya abakozi mu nzego baratandukanye, hari abahabwa za misiyo ndende bakanishyurirwa amacumbi, none se urambwira ngo ibihumbi 20 bampa nzabyishyuramo icyumba cya 15, mvanemo ifunguro n’ay’urugendo?.

Mpitamo rero kujya ah’ibihumbi 3, nkasagura kuko no mu rugo haba hari utubazo wenda nshobora gusaguraho agafuka k’umuceri k’ibiro 10, rwose abafite za hoteli ntibakaturenganye na twe ntituba tworohewe”.

Umuyobozi w’akarere ka Musanze Musabyimana Jean Claude, yagize ati:“Ntabwo akarere kari kazi ko hari abantu bafite utuzu hirya no hino bacumbikiramo abagenzi, uretse kandi no kuba badatanga imisoro, bajyana abantu hirya iyo hatazwi, nta n’ikitwizeza ko umutekano w’abagenzi uba urinzwe.

Ibi tugiye kubihagurukira dufatanije n’inzego z’ibanze, kandi ibi tuzabihashya kuko uzabifatirwamo azigishwa uburyo bwo gukorera ahantu hazwi”.

Uyu muyobozi kandi yongeye kwihanangiriza bamwe mu baturage bo muri Musanze biha kujyana abanyamahanga gusura ubuvumo banyuze murihumye RDB, ko nabo bakwiye kubicikaho, ngo kuko nabyo ari ubujura mu gihe bakora ibitari mu nshingano zabo.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE