2017-06-24 12:54:56 clouds 27o High | Kigali Rwanda

Dukurikire:
 
 

Muri 2017 ibiciro bizazamuka cyane ariko ntibizarenza 7% - BNR

Yanditswe na IMVAHO NSHYA

Kuya 2017-03-30 07:06:50

 
Share on:
 
Yasuwe:270
 
Yavuzweho:200
 
10
 
10

Guverineri wa Banki Nkuru y’u Rwanda (BNR), John Rwangombwa, yatangaje ko kuzamuka kw’ibiciro ku masoko yo mu Rwanda muri uyu mwaka wa 2017 biri ku kigero kiri hejuru, cyane bitewe n’umusaruro utarabaye mwiza.

Ibi Rwangombwa yabitangaje mu kiganiro n’abanyamakuru ku ya 29 Werurwe 2017, ubwo inama ya komite ishinzwe ubutajegajega bw’urwego rw’imari (FSC) na komite ishinzwe politiki y’ifaranga (MPC) zatangazaga uko igihembwe cya kabiri cya 2017 kizaba cyifashe.

Guverineri Rwangombwa yavuze ko urwego rw’imari rutekanye kandi rucunzwe neza, ariko mu bijyanye n’izamuka ry’ibiciro by’ibiribwa ku isoko, nubwo byatangiye bizamuka, ngo ntiritazajya hejuru ya 7% mu mpera za 2017.

JPEG - 223.6 kb
Guverineri wa Banki Nkuru y’u Rwanda, John Rwangombwa

N’ubwo icyo gipimo gisa n’ikidakanganye, izamuka ry’ibiciro by’ibicuruzwa ku masoko muri Gashyantare 2017 ryageze ku 8.1% rivuye kuri 7.3% mu Kuboza 2016, ahanini bitewe n’izamuka ry’ibiciro by’ibiribwa ku isoko ryageze kuri 17.6% muri Gashyantare 2017 rivuye kuri 16.4% mu Kuboza 2016.

Iryo zamuka ryatewe kandi n’ibiciro byo gutwara abantu n’ibintu byazamutseho 8.3% muri Gashyantare 2017 rivuye kuri 7.7% mu 2016 na byo bitewe n’agaciro k’ifaranga ku isoko ry’ivunjisha.

Guverineri Rwangombwa yatangaje ko kugeza tariki ya 24 Werurwe 2017 ifaranga ryataye agaciro kugeza kuri 0,7% ubigereranyije n’umwaka ushize, kuko iyo tariki yageze ifaranga rimaze guta agaciro kugeza kuri 2.7%. BNR ivuga ko impuzandengo yo guta agaciro k’ifaranga mu mwaka wa 2017, bitazarenga 4%.

Raporo y’Ikigega Mpuzamahanga cy’Imari (IMF), igaragaza ko ubukungu ku isi buzazamuka neza ku gipimo cya 3.4% buvuye kuri 3.1% muri 2016. Ibihugu byo munsi y’ubutayu bwa Sahara, u Rwanda ruherereyemo, ubukungu buziyongeraho 2.8% buvuye kuri 1.6% mu mwaka wa 2016 bitewe n’izamuka ry’ibiciro by’ibicuruzwa by’ibanze ku masoko mpuzamahanga.

Mu bihugu by’Umuryango w’Afurika y’Iburasirazuba (EAC), hari ikibazo cy’izamuka ry’ibiciro bitewe n’imvura nke yahagaragaye, ku buryo kugeza muri Gashyantare 2017, muri Kenya ibiciro byazamutse kugera ku 9%, Uganda 6.7%, Tananzania 5.5%, u Burundi kuri 20.7%.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE