2017-06-24 09:49:51 clouds 27o High | Kigali Rwanda

Dukurikire:
 
 

Mukahigiro yubatse inzu ebyiri z’ubucuruzi abikesheje kudoda inkweto

Yanditswe na IMVAHO NSHYA

Kuya 2017-03-24 09:44:43

 
Share on:
 
Yasuwe:475
 
Yavuzweho:200
 
10
 
10

Mukahigiro Pascasie utuye mu kagari ka Gasovu, mu murenge wa Karambi mu karere ka Nyamasheke, avuga ko amaze kugera kuri byinshi abikesheje ubudozi bw’inkweto.

Uyu mugore w’imyaka 45 avuga ko umwuga wo kudoda inkweto yawigishijwe n’umugabo we, arakataza aranawitabira kumurusha.

Mu kiganiro n’Imvaho Nshya , yavuze ko yakuze yumva akunda iterambere ariko akazitirwa n’ubukene bw’umuryango yavukagamo, bwatumye yiga amashuri 6 abanza gusa, ariko aho agejejwe n’ubu budozi ngo abenshi barahifuza.

JPEG - 404.6 kb
Mukahigiro Pascasie amurikira abayobozi umwuga we wo kudoda inkweto ( Foto Bahuwiyongera S)

Avuga ko atari wa mugore urya ari uko umugabo yahashye, ko ahubwo na we akorera urugo umugabo akabishima kubera byinshi amaze kurugezaho.

Yagize ati “Maze imyaka 10 ndoda inkweto kandi nshobora kuba ari nanjye mugore wenyine ubikora muri aka karere kuko batarambwira undi wabishyize ku mugaragaro. Ubu budozi bungejeje aheza kuko ubu maze kubukuramo inzu 2 z’ubucuruzi namaze no gushyiramo amashanyarazi, mu nzu ntuyemo n’umuryango wanjye na yo amashanyarazi arimo, nakoranye na SACCO bimpesha kugura inka ubu iri mu rugo imeze neza, kandi n’abana banjye bariga neza bakanarya indyo yuzuye, bakanivuriza ku gihe iyo barwaye.”

Avuga ko na we yabanje guhisha uyu mwuga kubera isoni zo gusekwa n’abagabo kuko ubusanzwe utamenyerewe ku bagore, ariko mu mwaka wa 2014 amaze imyaka 7 yose awukora ni ho ngo yaje kwigaragaza, ubu aradodera abantu b’ingeri zose kuko ngo nta rukweto amaza umwanya nk’uko yabyeretse abayobozi batandukanye barimo n’abadepite bari basuye ibikorwa by’abagore mu murenge wa Karambi.

Ati “Nshobora gukorera amafaranga arenga 100 000 buri kwezi , mu gihe cy’umwero w’ ikawa ho ndayarenza kuko aba ariho, nkaba nteganya mu minsi iri imbere gutera intambwe nkagura imashini imfasha kuzikora, nkajya nkora inkweto ku buryo abatuye iyi mirenge ya hafi aha batazongera kugura izivuye ahandi bazajya bagura iwanjye, bikazatuma abana banjye 6 babaho neza ndetse nkanabarihira kaminuza uko nzabishobozwa.”

Ashima umugabo we umushyigikira mu byo akora, akanashima imiyoborere myiza akesha byose, akagaya bagenzi be bacungira twose ku bagabo.

Umuyobozi w’Akarere ka Nyamasheke Kamari Aimé Fabien na Depite Kankera Marie Josée bashimye uyu mugore cyane basaba n’abandi bagore kugera ikirenge mu cye, bagahera kuri duke bakigeza ahashimishije.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE