2017-08-22 09:34:31 clouds 27o High | Kigali Rwanda

Dukurikire:
 
 

Muhanga: Yibohoye ubukene agenda mu mahanga abikesha kubumba inkono

Yanditswe na IMVAHO NSHYA

Kuya 2016-07-06 12:30:56

 
Share on:
 
Yasuwe:4
 
Yavuzweho:200
 
10
 
10

Ubwo hizihizwaga ku nshuro ya 22 umunsi ngarukamwaka wo kwibohora, Uwimana Marie, umwe mu basigajwe inyuma n’amateka wo mu murenge wa Nyamabuye mu karere ka Muhanga, yagaragaje ko akazi ko kubumba inkono ari ko katumye yivana mu ngoyi y’ubukene, ubu akaba abayeho neza.

Mu buhamya Uwimana Marie yatanze ku munsi wo kwibohora, yagarutse ku buzima bubi abasigajwe inyuma n’amateka babagamo mbere ya Jenoside yakorewe Abatutsi mu 1994, aho hafi ya bose biberaga mu nzu zisakaje nyakatsi kuva hasi kugera ku gisenge.

Uwimana akavuga ko kuva yamenya ubwenge yahisemo gukora bya kinyamwuga akazi ko kubumba inkono, bituma abasha kwiteza imbere ku buryo yagiye ahabwa amahugurwa anyuranye mu Rwanda ndetse agira n’amahirwe yo guserukira u Rwanda no mu bihugu by’umuryango w’Afurika y’Uburasirazuba, ari nako yagiye yegukana ibikombe bitandukanye.

Yagize ati:«Uyu mwuga nkora wo kubumba watumye mbasha kwiyubakira inzu y’ibyumba bitatu n’uruganiriro, ubukene kuri njye bwabaye amateka.»

JPEG - 218.8 kb
Uwinama ahamya ko yibohoye ubukene (Foto Muhizi E)

Uwamariya Béatrice, Umuyobozi w’Akarere ka Muhanga, avuga ko nubwo hari intambwe abaturage benshi bamaze gutera bibohora ingoyi y’ubukene, ariko badakwiriye kwirara ngo bumve ko urugendo rwo kwibohora rwarangiye.

Asaba abaturage ko bakomeza gushishikara bakora umunsi ku munsi, kugira ngo barusheho kwiteza imbere bafatiye urugero rwiza kuri uyu muturage wateye imbere ahereye ku kazi abantu benshi bakunze gusuzugura.

Munyantwali Alphonse, Guverineri w’Intara y’Amajyepfo wari umushyitsi Mukuru, yavuze ko kuba u Rwanda ruyobowe na Perezida Paul Kagame wafashe iya mbere mu kubohora Abanyarwanda, akaba ari nawe “twese dukomoraho ibikorwa by’ubutwari, bigomba kuturemamo icyizere cy’uko n’ibyo tutari twageraho nta shiti bizagerwaho”.

Ati:«Mu myaka 22 ishize u Rwanda rwakoze byinshi,.. reka mbasabe ko dutera ikirenge mu cye niho tuzagera kuri byinshi.»

Muri uyu muhango wo kwizihiza umunsi ngarukamwaka wo kwibohora, Ubuyobozi bw’Akarere ka Muhanga, bwahaye impano Ingabo, nk’ikimenyetso cy’ubwitange zagaragaje zibohora Abanyarwanda.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE