2017-06-25 09:02:18 clouds 27o High | Kigali Rwanda

Dukurikire:
 
 

Muhanga: Yatinyutse kwikorera ahinduka umumiliyoneri akiri umusore

Yanditswe na IMVAHO NSHYA

Kuya 2017-05-10 07:36:46

 
Share on:
 
Yasuwe:403
 
Yavuzweho:200
 
10
 
10

Ku myaka 35 y’amavuko Nkundumukiza Jean Claude, arashimira ubuyobozi bw’u Rwanda burangajwe imbere na Nyakubahwa Perezida wa Repubulika Paul Kagame bwamutinyuye kwikorera none ubu akaba ari muri ba rwiyemezamirimo b’abamiliyoneri.

Nkundumukiza yubatse amacumbi yitwa SIFA Guest House mu mujyi wa Muhanga hafi y’isangano iruhande rwa GT Bank, akaba amaze imyaka itandatu muri ubu bucuruzi yatangiye akiri umusore w’imyaka 29 mu mwaka wa 2011.

Kuri ubu afite icyizere cy’ejo hazaza heza ari na yo mpamvu ashimira Leta y’u Rwanda idahwema korohereza abacuruzi n’abashoramari cyane cyane ab’Abanyarwanda, ndetse n’abanyamahanga bagahabwa rugari ngo bagure amahirwe y’umurimo n’ubukungu bw’u Rwanda.

Yagize ati “Ndashimira Leta yacu ikora ibishoboka kugira ngo mu bucuruzi dutere imbere. Ndayishima cyane kuko mbere yo gukangurira abanyamahanga kuza ni twebwe babanza gufasha. Ndashimira cyane Perezida wa Repubulika ku mbaraga ashyiramo kugira ngo ibyo byose bigende neza, njya mbibona akenshi iyo yahuye n’abacuruzi n’ibyo bitameze neza asiga abikosoye.”

SIFA Guest House ifite amacumbi abereye buri wese waruhukira i Muhanga

Mu kiganiro yagiranyena Imvaho Nshya, Nkundumukiza yashimangiye ko ingamba zashyiriweho korohereza abacuruzi ziri mu byatumye akora neza akaba amaze imyaka itandatu yose ataragwa mu gihombo.

Nubwo yabanje gukorera Leta yaje gusanga kwikorera ari ingenzi cyane kuko yabonye n’amahirwe yo guhugurwa n’inzego zifasha urubyiruko kwitinyuka rugakuba ipataro rugakura amaboko mu mifuka, rukiteza imbere.

Ati “Nabifashijwemo n’ubuyobozi bwacu bwiza, cyane ko habagaho gushishikariza urubyiruko kwikorera. Ntabwo igishoro cya mbere ari amafaranga atubutse, igishoro cya mbere ni ibitekerezo no ugushira ubwoba ku cyo ugiye gukora. Uyu munsi ushobora kubitangira ukabona ntabwo bigenze neza ariko iyo udafite ubwoba birakunda; ni ihame mpuzamahanga ku bantu bagiye bakomeza birinda gucika intege.”

Kubwo gutinyuka no guharanira kugera ku nzozi ze atitaye ku mbogamizi zisanzwe yahuye na zo, kuri ubu Nkundumukiza akoresha hagati y’abantu 10 na 20 kandi bose ni abakozi bahoraho bahembwa buri kwezi.

Urubyiruko ntirugatinye baringa

Nkundumukiza aranyomoza urubyiruko rwibeshya ko rudafite uburyo bwo gutera imbere kuko inzego zose zahagurukiye kurufasha gushyira mu bikorwa ibitekerezo bizima rufite, abakeneye guterwa inkunga bakayihabwa nta yandi mananiza ahabaye.

Ikigo cy’igihugu gishinzwe ibarurishamibare mu Rwanda (NISR) kigaragaza ko urubyiruko ruri hagati y’imyaka 14- 35 rugize hafi kimwe cya kabiri cy’Abanyarwanda, ndetse ururi hagati y’imyaka 16 na 34, rugize 67% by’abashomeri bangana na 3% by’abatuye mu Rwanda muri rusange.

Kuri we ntabwo uru rubyiruko rwakabaye rufite ingorane z’ubushomeri mu gihe rufite Leta yiteguye kuruhugura no kurushyigikira mu bitekerezo bizima.

Nkundumukiza Jean Claude arashimira Leta yamuhaye amahirwe yo kubyaza umusaruro ubushobozi bwe

Yagize ati “Icyizere naha urubyiruko muri iki gihe, icyi nakuye mu mahugurwa nagiyemo ni uko igishoro cya mbere umuntu yumva afite igitekerezo kizima, urubyiruko rwinshi rwibeshya ko gukora ishoramari mu kwikorera ari ukuba ufite igishoro kinini ariko si byo.”

Nkundumukiza akomeza ahamya ko kubera amateka y’igihugu yisanze mu nshingano zamukanguriye kwisuzuma akareba uko yakwikura mu buzima bubi akiri muto, ari na byo byamuteye imbaraga zo gukora cyane, abigeraho kubera inama yungukiye mu nzego za Leta zishishikariza buri wese kudategereza ak’imuhana kaza imvura ihise.

Akomeza agira ati “Nshinga Guest House miliyoni 10 z’amafaranga y’u Rwanda ni zo natangiranye, ariko ubwaho hamaze kugira hagati ya miliyon 30 na 40. Ibivuye mu nyungu, urebye kimwe ku kindi, biri hejuru ya miliyoni 50 z’amafaranga y’u Rwanda.”

Kugira ngo agere ku gishoro gitubutse byamusabye kubanza kwizirika umukanda kandi yubaha inama yahawe, ati “Naje kujya mu mahugurwa ya BDF, abo bafasha ndimo ni aho nashiriye ubwoba. Ikibazo cy’urubyiruko rw’Abashomeri baba bavuga bati Leta ntabwo iduha ubufasha kandi nit we tutabukoresha…”

Inzozi afite ni ukwiyubakira Hoteli ijyanye n’igihe

Nkundumukiza yemeza ko nyuma ya byinshi amaze kugeraho yizeye kwiyubakira Hoteli igezweho mu gihe kizaza, kuko yizeye gukomeza kubona amahirwe akura ku ku buyobozi bwiza bwita ku iterambere ry’umuturage.

Kuba amaze kugura imodoka ebyiri, harimo imwe agenderamo ya Mercedes Benz n’indi ikora ubucuruzi yo mu bwoko bwa RAV 4, ngo ni intambwe ikomeye cyane imuha icyizere cyo kugera kuri byinshi.

Ibindi Nkundumukiza avuga ko yagezeho harimo ubutaka yaguze ku Muyumbu mu karere ka Rwamagana, n’ubwo ku Ruyenzi mu karere ka Kamonyi ari na bwo yatangiye kubakamo inzu igendanye n’igishushanyo mbonera cyahagenewe.

Nubwo izi zose ari inyungu yakuye kuri SIFA Guest House, yishimira cyane ko yabashije gutangiza ubucuruzi atatse inguzanyo muri Banki.

Yagize ati “Amafaranga ibihumbi ijana njye nshobora kubibyaza umusaruro, nshobora kurya nkakodesha inzu nkabaho. Natangiye amacumbi yakira abaza kuryama ariko nta muntu uharya. Nashyizeho akantu ka cantine yo kugira ngo abantu babashe kubona Fanta ngerageza no kuhashyira ibiribwa birakunda.”

Ubucuruzi bwatumye agirirwa icyizere n’ibigo bikomeye

Nyuma yo kubaka icyizere no kwagura ibikorwa by’ubucuruzi bwe, Nkundimana yatangiye kugirirwa icyizere n’ibigo bikomeye byishimira kuba byagirana amasezerano y’imikoranire.

Ati “Ubu ndi umwe mu bantu babiri bakorana neza na Bralirwa. Ndi umwe mu bo banki zigirira icyizere ku buryo ziba zishaka kumpa inguzanyo; urumva ibyo byose biva ku gitekerezo, kwigirira icyizere no kudacika intege.”

Ibi byose abishingira ku buyobozi bwiza buharanira ko buri munyarwanda abasha gukora ibimuteza imbere kandi akagendera mu murongo muzima mu kubaka igihugu, kuko ari byo bimufasha kwiyubakira icyizere ku bamuzengurutse ndetse no ku bigo by’ubucuruzi.

Ibyumba by'amacumbi SIFA biteguranywe isuku

Ahamya ko Leta yamweretse ko byose bishoboka, ati “Leta yacu ni umubyeyi, uvuna umuheha akakongeza undi.” Ikindi kintu kimwereka ko serivisi atanga zinogera abagana SIFA Guest House ni uko yatangiye gukorana n’ibigo agirana na byo amasezerano yo gucumbikira abakozi babyo bari mu butumwa bw’akazi mu karere ka Muhanga.

Nkundumukiza arasaba inzego zitandukanye gukomeza umurava zifite mu guharanira ko abaturage batera imbere, bityo agashimangira ko bifuza ko imbogamizi yo kubura k’umuriro w’amashanyarazi kwa hato na hato yakemurwa burundu kuko ‘iyo utabona umuriro ucumbikira abantu bigusubiza inyuma cyane.’

Akomeza ashimira icyizere bahawe kuko ibyifuzo by’abikorera bidatinda gukemuka iyo binyuze mu rugaga rw’Abikorera (PSF) rubafasha mu kugeza icyo bifuza ko gihinduka mu nzego zibishinzwe zikagikemura vuba na bwangu.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE