Advertisement
 
 
 
 
 
 
 
 

Ubukungu

Mu myaka itatu iri imbere nta caguwa izaba irangwa mu Rwanda   

  Yanditswe na NIYONSENGA SCHADRACK
 April 2016

 
 

Gahunda ya Leta y’u Rwanda yo guca imyenda n’inkweto bya caguwa ku masoko yo mu Rwanda igiye gushyirwamo imbaraga ku buryo mu gihe cy’imyaka itatu Abanyarwanda bazaba bambara imyenda n’inkweto byakozwe n’inganda zo mu Rwanda.

Nyuma yo gusanga ibikoresho bya caguwa bifite ingaruka ku bukungu bw’igihugu ndetse no ku buzima bw’abaturage, umugambi u Rwanda ruhuriyeho n’ibindi bihugu by’Afurika y’Uburasirazuba ni ukongerera ubushobozi inganda ziri imbere muri ibyo bihugu ku buryo zishobora gukora imyenda ndetse n’inkweto bikomeye kandi bidahenze abaturage ntibongere kurarikira caguwa inengwa ubuziranenge na benshi.

Ubwo yasobanuriraga Inteko ishinga amategeko imitwe yombi ibijyanye na gahunda ya Leta yo guteza imbere inganda hibandwa kuzikora imyenda, Minisitiri w’Intebe Murekezi Anastase yerekanye ibiteye impungenge bya caguwa anagaragaza uko gahunda ya Leta yo kuyica iteye.

JPEG - 195.1 kb
Minisitiri w’Intebe Anastase Murekezi ubanza ibumoso yasobanuriye Inteko gahunda ya Leta yo guteza imbere inganda (Foto NIYONSENGA S)

Minisiti Murekezi avuga ko biteye impungenge kubona Abanyarwanda bakunda ibituruka iyo batazi mu gihe hari iby’iwabo bishobora kongererwa imbaraga bikaba byiza nabo bakaba babyohereza hanze.

Yagize ati “Hatangiwe gahunda yo kwigisha imyuga n’ubumenyingiro ku bantu bose harimo n’abikorera mu rwego rwo kongerera ubumenyi abantu bose. Ziriya caguwa zituruka mu mahanga ntizizewe ku buziranenge bwazo, biba byarambawe babihaga bakabyohereza. ikindi kandi kubera igiciro cyabyo kiba kiri hasi cyane bituma abantu babikunda bityo ibikorwa n’inganda zacu ntibigurwe”.

Ikibazo cyo kuba ibikorerwa mu Rwanda biri ku giciro gihanitse kigaruka nk’inzitizi ku icibwa rya caguwa nk’uko abadepite babigarutseho, gusa Minisitiri Murekezi amara izi mpungenge avuga ko guhenda byaterwaga n’ubushobozi buke ariko ko ibiciro bizamanuka nyuma yo kongerera ubushobozi inganda.

Ati, “Tuzazamura amahoro ya za gasutamo ku myenda itumizwa hanze ariko tunamanure cyane imisoro ku bikoresho by’ibanze bikenerwa mu gukora umwenda n’inkweto bitumizwa hanze, harateganywa gufashwa ba rwiyiyemezamirimo bari mu mwuga w’ubudozi mu Rwanda. Leta izashyiraho ikigo cy’icyitegererezo mu mujyi wa Kigali kigisha kudoda no mu nkengero z’umujyi, twizera ko ibi bizagabanya ibiciro bihanitse kandi byaranatangiye, nk’ubu ubushize mu imurikagurisha rishize rya “made in Rwanda” twabonye ishati y’amafaranga 2000 yakorewe muri Utexrwa kandi ahandi igura 5000”

Icyakora n’ubwo iyi gahunda ya Leta yashyigikiwe n’abadepite mu Nteko, ngo haracyari inzitizi kugira ngo ishyirwe mu bikorwa. Minisitiri Murekezi avuga ko hakiri ibibazo birebena n’amafaranga akiri make ngo igihugu nk’u Rwanda kiyubakire uruganda rw’imyenda, amashanyarazi adahagije, ubumenyi buke mu ikoranabuhanga ndetse n’abaturage batari bahindura imyumvire ngo bumve ko ibyo mu Rwanda byakomera no kurenza caguwa.

Abadepite basabye ko iyi gahunda yakwihutishwa cyane ko guca caguwa byari biri no muri gahunda ya Leta y’imyaka irindwi ubu iri kugera ku musozo, Minisitiri Murekezi yemeje ko mu myaka itatu iri imbere nta caguwa izaba ibarizwa mu Rwanda.

 

Comments

 
 
Abanyamahanga bashoye imari mu Rwanda  baravuga imyato Perezida Kagame
Abanyamahanga bashoye imari mu Rwanda baravuga imyato Perezida Kagame

Bamwe mu bashoramari b’Abanyamahanga bakorera ubucuruzi mu Rwanda kuri bo Perezida Kagame arenze kuba Perezida ahubwo ni n’umuhanga mu guhanga u Rwanda rugezweho. Atma Prakash ni umwe mu bayobozi (...)

Musanze:Ibigori bari bitezeho umusaruro ushimishije byibasiwe na Nkongwa
Musanze:Ibigori bari bitezeho umusaruro ushimishije byibasiwe na Nkongwa

Abaturage bakora umwuga w’ubuhinzi bo mu mirenge imwe n’imwe yo mu karere ka Musanze, baravuga ko bahangayikishijwe n’uko batazabona umusaruro uhagije w’ibigori muri iki gihembwe cy’ihinga A 2017, (...)

Mukahigiro yubatse inzu ebyiri z’ubucuruzi abikesheje kudoda inkweto
Mukahigiro yubatse inzu ebyiri z’ubucuruzi abikesheje kudoda inkweto

Mukahigiro Pascasie utuye mu kagari ka Gasovu, mu murenge wa Karambi mu karere ka Nyamasheke, avuga ko amaze kugera kuri byinshi abikesheje ubudozi bw’inkweto. Uyu mugore w’imyaka 45 avuga ko (...)

 Akarere ka Musanze  kazakoresha miliyoni 18 ku muyoboro w’amazi wa Rukore
Akarere ka Musanze kazakoresha miliyoni 18 ku muyoboro w’amazi wa Rukore

Ubuyobozi bw’Akarere ka Musanze buravuga ko bwateganyije amafaranga miliyoni 18, azifashishwa mu mushinga wo gusana umuyoboro w’amazi wa Rukore uri mu murenge wa Muko na Nkotsi, umaze imyaka 2 (...)

Abanyenganda b’i Huye baracyafite imbogamizi mu kwimukira muri zone yagenewe inganda
Abanyenganda b’i Huye baracyafite imbogamizi mu kwimukira muri zone yagenewe inganda

Mu gace kagenewe inganda mu kagari ka Sovu mu murenge wa Huye mu karere ka Huye, usanga hataritabirwa cyane ngo hakorerwe ibyo hagenewe, kuba nta bikorwaremezo birahagezwa n’ibibanza bihenze (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.