2017-11-23 18:23:19 clouds 27o High | Kigali Rwanda

Dukurikire:
 
 

Leta yashyiriyeho ikigega abohereza ibicuruzwa mu mahanga

Yanditswe na IMVAHO NSHYA

Kuya 2017-04-27 09:55:13

 
Share on:
 
Yasuwe:92
 
Yavuzweho:200
 
10
 
10

Banki y’u Rwanda Itsura Amajyambere (BRD), iratangaza ko Leta yashyizeho ikigega cy’ingwate kigamije gufasha abacuruzi bohereza ibicuruzwa mu mahanga kubona ubushobozi.

Ibi byatangajwe n’umuyobozi ushinzwe ishoramari muri BRD, Dr. Byamungu Livingstone, mu nama y’umunsi umwe yamuhuje n’abari muri icyo cyiciro cy’ubucuruzi barenga 200 i Kigali.

Ati “Nyuma yo kubona ko uru rwego rw’abikorera b’abacuruzi rufite ikibazo cy’ubushobozi burimo ubwo kubona amafaranga anyuranye abafasha haba mu kugeza umusaruro ku masoko kimwe no kubona inguzanyo ku nyungu nto, Leta yashyizeho ikigega ku ikubitiro ishyiramo miliyari imwe na miliyoni 500 yiyongeraho inkunga yaturutse mu bafatanyabikorwa ingana na miliyoni 800 z’amayero.”

JPEG - 173.1 kb
Dr. Livingstone avugana n’abikorera

Dr. Byamungu kandi ati “Amafaranga arahari, muzane imishinga yanyu muyahabwe bityo mwongere ingano y’ibyoherezwa ku masoko yo hanze, inyungu zirimo murabizi ko mu zindi banki z’ubucuruzi mubona inguzanyo ku nyungu ya 18% kuzamura, mu gihe amafaranga atangwa binyuze muri iki kigega cy’ingwate Leta yatanze inkunga ya 6.5% ku nyungu uyahawe yakwa ku mwaka, ibi bivuze ko inguzanyo ayihabwa ku nyungu iri hagati ya 10% na 12%.”

Yashishikarije abohereza ibintu ku masoko yo hanze bari mu cyiciro cy’abacuruzi bato n’abaciriritse kwitabira iki kigega.

Ati “Abari muri iki cyiciro bafite kuba basaba inguzanyo kugera kuri miliyoni 900 bakayihabwa ku nyungu ya 12%, ibi bivuze ko ari amahirwe kuri bo bagomba kubyaza umusaruro, ibi bikazanagera no ku bacuruzi banini.”

Umwe muri ba rwiyemezamirimo wohereza imiteja ku isoko ryo mu Bwongereza, Marie Chantal Isugi, yavuze ko yishimiye kuba icyo kigega cyaramuteye inkunga.

Agira ati “Twe binyuze muri Garden Fresh Ltd twohereza imiteja ku masoko yo hanze nko mu Bwongereza no mu Bufaransa, mu gihe cy’imyaka 3 tumaze dutangiye ubucuruzi buragenda neza, twanabonye inkunga ingana na miliyoni 84 z’amafaranga y’u Rwanda atanzwe n’ikigega cy’ingwate twashyiriweho kugira ngo turusheho kwinjira cyane no kugeza umusaruro wacu kuri ayo masoko.”

Dr. Byamungu ashishikariza abohereza ibicuruzwa ku masoko yo hanze kwitabira iki kigega kuko abahawe inguzanyo babyungukiramo cyane.

Ati “Inguzanyo dutanga ifite inyungu nto, tukanatanga n’ibihumbi ijana by’amadolari ku wohereza ibyo bicuruzwa hanze, ayo akamufasha kugera ku masoko, iyi ni inkunga itishyurwa, icyo tumusaba ni uruhare rwe rungana na 50% gusa.”

Umuyobozi w’urugaga rw’Abikorera Ruzibiza Stephen, avuga ko intego yabo nk’urugaga ari ugufasha abacuruzi kugera ku masoko yo hanze.

Yagize ati “Intego yacu ya mbere ni ugufasha abacuruzi bohereza ibicuruzwa kugera ku masoko yo hanze, ibi bizongera ingano y’ibihoherezwa haba mu bwinshi kimwe no mu bwiza, bityo bigabanye ingano y’ibihatumizwa, ni yo mpamvu ikigega cyashyizweho.”

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE