2017-06-28 08:00:46 clouds 27o High | Kigali Rwanda

Dukurikire:
 
 

Leta yafashe ingamba zo kugabanya igiciro cy’inzu

Yanditswe na IMVAHO NSHYA

Kuya 2017-06-02 05:48:17

 
Share on:
 
Yasuwe:48
 
Yavuzweho:200
 
10
 
10

Minisitiri w’Ibikorwa remezo Musoni James, avuga ko Leta yafashe ingamba zo kugabanya igiciro cy’inzu gisanzwe gihanitse, haba ku bayagura ndetse n’abakodesha; bikazakorwa hubakwa inzu nyinshi kandi abazishaka bakazibona kuri make.

Ibi Minisitiri James Musoni yabitangaje ejo hashize ku wa Kane tariki ya 1 Kamena 2017, mu nama yari yatumiwemo, Ikigo cy’Igihugu cy’Imiturire (RHA), Urugaga Nyarwanda rw’Abikorera (PSF), abashoramari n’ibigo by’imari, kugira ngo baganire uko iyi gahunda yashyirwa mu bikorwa.

Minisitiri Musoni avuga ko kubera ikibazo cy’inzu nke zikodeshwa kandi zihenze, Leta yafashe ingamba zo kongera bwazo no kuzigabanyiriza ibiciro, ishyiraho ikigega kigamije gufasha abubaka inzu ziciriritse kugira ngo abantu babone aho batura bitabagoye.

Avuga ko icyatumaga inzu zihenda ari uko abantu bazubakaga ugasanga bishyiriramo n’ibikorwa remezo nk’imihanda, amazi n’amashanyarazi mu kugurisha cyangwa gukodesha, ibyo byose bakabishyira ku muguzi.

JPEG - 2.5 Mb
Ibumoso ni Minisitiri Musoni James w’Ibikorwa remezo na Mugabo Claver, umuyobozi wungirije muri PSF (Foto James. R)

Avuga ko hafashwe ingamba z’uko Leta izajya ibikora, ikishyura wa muntu amafaranga yakoresheje ibikorwa remezo kugira ngo icyo giciro kivanwe mu giciro cy’inzu.

Ikindi gituma inzu zihenda agaragaza, ni amafaranga y’inguzanyo abubaka bafata mu mabanki bahenzwe ku nyungu ya 17%, umuguzi na we yajya gufata inguzanyo kugira ngo agure inzu bikamuhenda.

Mu ngengo y’imari itangira mu kwezi kwa Nyakanga, Leta irateganya gushyiraho ikigega kizashyirwamo amafaranga na Leta n’abafatanyabikorwa mu rwego rwo kuguriza abantu barimo kubaka inzu ziciriritse kandi inyungu kuri ayo mafaranga ikaba nto.

Minisitiri Musoni avuga ko ayo mafaranga Leta izajya iyaha amabanki, amabanki na yo akaguriza abantu ku nyungu iciriritse.

Ikindi agaragaza nk’igituma inzu zihenda, ni ubutaka buhenze, hakaba harafashwe ingamba zo kuba Leta yagura ubutaka ikajya ibugurisha abagiye kubaka inzu ku giciro gito, bityo na bo bakagabanya ibiciro ku muguzi.

Hari kandi ikibazo cy’ibikoresho byifashishwa mu kubaka usanga byavaga hanze bihenze bikaba byaratumye Leta ifata ingamba zo gushishikariza abashoramari gukoresha ibikoresho biboneka mu Rwanda. Avuga ko Leta yagabanyije umusoro ku nyungu ku makampani yubaka inzu ziciriritse, ko byose bishyizwe hamwe bizagabanya ibiciro byasabwaga ku nzu uyu munsi.

Ahereye ku nzu zatashywe muri iyi minsi z’ibyumba 3 n’uruganiriro hiyongereyeho n’ubwiherero 2, imwe igahabwa agaciro ka miliyoni 18, Musoni ahamya ko ibyo biciro bizagabanuka bikagera kuri miliyoni 15, kandi hari imishinga imwe yatangiye ibyerekana.

Musoni asaba ko abantu bakoresha neza ubutaka birinda kubaka inzu zinyanyagiye ku misozi, ahubwo hakubakwa agerekeranye mu mijyi n’ibikorwa remezo bikabegera kandi akaba ahendutse.

Mugabo Claver, umuyobozi wungirije wa PSF, avuga ko hafashwe ingamba zo kugabanya ibiciro by’inzu zizubakwa n’inyungu ku bafata inguzanyo za banki ikamanuka ikagera ku 10%.

Avuga ko PSF igiye gukangurira abantu kwishyira hamwe ngo bakoreshe amafaranga agiye gushyirwa mu kigega kugira ngo hubakwe inzu nyinshi. Avuga ko ari igisubizo ku bantu bubaka inzu ziciriritse no kuzigura kuko inzu zari zisanzwe ahari kuri miliyoni 70 cyangwa 100, ariko zigiye kumanurwa zikagera kuri miliyoni 15.

Muri 2022 inzi ziteganywa kuba zubatswe zigera ku 434 000, nubwo bigiye gutangirira mu mujyi wa Kigali no mu nkengero zawo biteganyijwe ko zizanubakwa mu ntara mu masite yagiye atoranywa.

SEZIBERA ANSELME

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE