2017-06-28 15:02:12 clouds 27o High | Kigali Rwanda

Dukurikire:
 
 

Ingengo y’imari ya 2017/2018 ingana na miliyari 2 094.9

Yanditswe na IMVAHO NSHYA

Kuya 2017-06-09 04:46:17

 
Share on:
 
Yasuwe:180
 
Yavuzweho:200
 
10
 
10

Minisitiri w’Imari n’Igenamigambi, Amb. Claver Gatete, ku wa 8 Kamena 2017 yamurikiye imitwe yombi y’Inteko Ishinga Amategeko Umushinga w’Ingengo y’Imari u Rwanda ruzakoresha mu mwaka wa 2017/ 2018 uzatangirana na Nyakanga.

Ingengo y’imari y’uyu mwaka ingana n’amafaranga y’u Rwanda miliyari 2 094.9.

Minisitiri Claver Gatete yavuze ko ingengo y’imari yiyongereyeho miliyari 140.7 z’amafaranga y’u Rwanda ugereranyije n’ingengo y’imari y’umwaka ushize wa 2016/2017.

Minisitiri Gatete avuga ko muri iyo ngengo y’imari, amafaranga azaturuka imbere mu gihugu ndetse n’ay’inguzanyo angana na miliyari 1,738.2 angana na 83%, mu gihe amafaranga aturuka ku mpano zo hanze y’igihugu ateganyijwe kugera kuri miliyari 362.8 bingana na 17.3% by’ingengo y’imari yose.

JPEG - 77.7 kb
Minisitiri w’Imari n’Igenamigambi Amb. Claver Gatete ubwo yageraga imbere y’Inteko Ishinga Amategeko

Muri iyi ngengo y’imari, imisoro izaba ingana na miliyari 1200.3 z’amafaranga y’u Rwanda.

Asobanurira abagize inteko uburyo amafaranga y’ingengo y’imari azasaranganwa mu nzego zitandukanye ndetse n’ibizitabwaho, Minisitiri Gatete yavuze ko urwego rw’ingufu rwagenewe miliyari 84 akazakoreshwa mu bikorwa byo kwagura no gukwirakwiza imiyoboro y’amashanyarazi hirya no hino mu gihugu, kugeza umuriro mu bigo by’amashuri, amavuriro, ndetse n’inganda.

Urwego rw’uburezi rwagenewe miliyari 248.5 z’amafaranga y’u Rwanda, akazakoreshwa muri gahunda yo kubaka ibyumba by’amashuri, ubwiherero, kongera imfashanyigisho, guhugura abarezi mu rwego rwo gutuma batanga uburezi bufite ireme, kongera amashuri y’imyuga n’ubumenyi ngiro n’ikoranabuhanga, guha ubushobozi za kaminuza ahanini mu birebana n’ubushakashatsi n’ibindi.

Urwego rw’ubuzima rwagenewe miliyari 193.6, akazakoreshwa mu kubaka no gusana ibitaro n’ibigo nderabuzima hirya no hino mu gihugu, no gufasha mu bikorwa byo kwegereza abaturage serivisi z’ubuvuzi n’ibindi.

Naho amazi, isuku n’isukura byagenewe miliyari 30.2 azifashishwa mu kwegereza abaturage amazi meza.

Mu rwego rwo guteza imbere ibikorerwa mu Rwanda, imashini zikoresha ibirebana n’impu zagabanyirijwe imisoro kuko zizasoreshwa 0% aho kuba 25%, mu gihe inkweto za caguwa zizasoreshwa amadorali 5 ku kilo, naho imyambaro isanzwe ya caguwa igasoreshwa amadolari 2 n’igice ku kilo.

Minisitiri Gatete yabwiye abagize Inteko Ishinga Amategeko ko ubukungu bw’u Rwanda, bwazamutse ku gipimo cya 5.9% muri 2016 mu gihe byari biteganyijwe ko buzazamuka ku gipimo cya 6%.

Yavuze ko kuba ubukungu butarazamutse ku rugero rwari rwitezwe ahanini byatewe n’ibibazo byagaragaye mu rwego rw’ubuhinzi aho umusaruro utagenze neza nk’uko byari byitezwe bitewe n’ihindagurika ry’ibihe, akomeza avuga ko muri rusange ubukungu bw’igihugu bwitezweho kuzamuka ku kigero cya 6.2% mu mwaka wa 2017 na 6.8% muri 2018.

Ku birebana n’ibiciro ku masoko, muri uyu mwaka wa 2017, Minisitiri Gatete yasobanuye ko bizakomeza kuzamuka bikagera ku kigero cya 7% ahanini bitewe n’izamuka ry’ibiciro by’ibikomoka kuri peteroli, ibiribwa, n’ibindi.

TWAGIRA WILSON

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE