2017-08-20 07:43:19 clouds 27o High | Kigali Rwanda

Dukurikire:
 
 

Impuguke z’u Rwanda na Congo zirareba uko ikiyaga cya Kivu cyarushaho gutanga umusaruro

Yanditswe na IMVAHO NSHYA

Kuya 2017-05-30 06:49:54

 
Share on:
 
Yasuwe:156
 
Yavuzweho:200
 
10
 
10

Abashakashatsi batandukanye ku rwego mpuzamahanga bateraniye gushaka uko umutungo kamere uboneka mu kiyaga cya Kivu gihuriweho n’u Rwanda na Kongo wabyazwa umusaruro mu buryo bw’ikoranabuhanga riteye imbere ugatanga umusaruro ku mpande zombi.

Abashakashatsi barimo n’abayobozi mu nzego zita ku mikoreshereze y’imitungo kamere iboneka mu kiyaga cya Kivu ku mpande zombi, u Rwanda na Kongo, bateraniye mu karere ka Bugesera mu nama mpuzamahanga ya gatatu y’iminsi itatu, ku nsanganyamatsiko yo kwiga ku bukungu bwihishe muri icyo kiyaga.

Augusta Umutoni ukuriye umushinga wo gukurikirana ubudahungabana bw’ikiyaga cya Kivu (LKMP) ukorera mu kigo cy’igihugu gishinzwe ingufu, REG, mu ishami ry’iterambere ry’ingufu (EDCL), avuga ko uko iterambere ryo kubyaza umusaruro umutungo kamere uri muri icyo kiyaga ryagiye ritera imbere ritanga umusaruro.

JPEG - 164.3 kb
Abashakashatsi, abayobozi n’abahanga mu by’ubumenyi bw’imitungo kamere yo mu mazi no mu miterere y’isi bahuriye mu nama igamije kwiga uko ikiyaga cya Kivu cyarushaho gutanga umusaruro mwinshi (Foto Samuel M)

Asobanura ko uko abashakashatsi bahuye bareba uburyo bushya bwo kunoza no gukoresha neza umutungo kamere birimo kunoza imicukurire ya gaze iri mu kiyaga, kumenya imiterere yacyo n’ibindi hifashishijwe iterambere rigezweho riturutse mu bushakashatsi kandi ritanga umusaruro mwinshi.

Ati “Nk’ubu turashaka kureba ngo ese ya gaze metane iri mu kiyaga ko noneho twabashije kuyicukura ku rwego rushimishije tuyibyaze umusaruro wuhe? Ibindi kamere byakoreshwa biri mu kiyaga nka gaze ya CO2, n’izindi zose dushobora gukoramo iki? Harimo amahirwe menshi yo gukoramo amavuta yo gutwarisha imodoka, hari ugukoresha gaze mu guteka, n’ibindi bishobora kuva mu kiyaga cya Kivu.”

Ku ruhande rw’igihugu cya Kongo, Popaul Ndomba, umwe mu bagize akanama gahuza ibihugu byombi mu kurebera hamwe icukurwa rya gaze metane mu Kivu, yavuze ko kugeza ubu bafatanyije n’u Rwanda mu mushinga wo gucukura gaze iri mu Kivu ariko Kongo irimo gushaka abaterankunga bo kugira ngo ikomeze gucukurwa ku bwinshi mu rwego rwo kugabanya ingaruka zo kudacukura iyo gaze mu Kivu.

Umwe mu mitungo iri muri iki kiyaga, uwa gaze metane ubushakashatsi bwagaragaje ko yageza ku ngufu z’amashanyarazi za megawati 700 mu myaka 50, impande zombi zikaba ziyicukura mu buryo ziyigabanamo kabiri.

U Rwanda rumaze kubaka imishinga irimo uwa Kivuwatt ucukura megawati 26.4, Kivuwatt ya kabiri, umushinga wa megawati 50, undi wa KP1 ukiri mu igerageza ya megawati 3.6.

Iyi nama yitezweho guha umwanya abashakashatsi batandukanye bafite ibyo bamaze kugeraho bishya mu kubyaza umusaruro imitungo kamere iba mu mazi, cyane ayo mu kiyaga cya Kivu n’uburyo bugezweho bwo kunoza imicukurire n’imikoreshereze y’ubukungu bubitsemo.

MUTUNGIREHE SAMUEL

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE