2017-12-11 14:03:29 clouds 27o High | Kigali Rwanda

Dukurikire:
 
 

Imishinga 600 y’abaturiye pariki imaze guhabwa miliyari 2,8

Yanditswe na IMVAHO NSHYA

Kuya 2017-05-17 05:43:06

 
Share on:
 
Yasuwe:173
 
Yavuzweho:200
 
10
 
10

Ikigo cy’Igihugu cy’Iterambere, RDB, gitangaza ko muri gahunda yacyo yo gusangiza abatuye mu nkengero za pariki umusaruro uva mu bukerarugendo, kimaze gutanga inkunga y’akayabo k’amafaranga y’u Rwanda miliyari 2.8 izazamura imishinga yabo 600 mu myaka isaga icumi ishize.

Umuyobozi Mukuru wa RDB, Clare Akamanzi, avuga ko abaturage bamaze kugezwaho aya mafaranga, ari abatuye mu mirenge 45 y’uturere 12 dukora kuri za pariki.

Yasobanuye ko iyo mishinga igizwe ahanini n’ibikorwa remezo nko kubaka amashuri, ibigo nderabuzima, kubaka inzu, kugeza amashanyarazi ku baturage no kubaka imihanda. Mu rwego rw’ubuhinzi harimo nko kubona imbuto zitanga umusaruro, ubworozi bw’inzuki, no guteza imbere amashyamba.

JPEG - 62.8 kb
Leta y’u Rwanda ikomeje kuzamura ubuzima bw’abaturiye za parike

Ikindi kandi ni uko hagiye hanubakwa amakusanyirizo y’amata kandi abaturiye za pariki begerejwe serivise zinyuranye z’ubuzima ndetse n’iz’ubucuruzi.

Abaturiye parike bagenerwaga 5% by’ava mu bukerarugendo ariko agiye kugirwa 10%

Clare Akamanzi avuga ko kimwe mu byo gahunda yo kongera ibiciro kuri ba mukerarugendo basura ingagi muri Pariki y’Igihugu y’Ibirung igamije ari ukuzamura amafaranga ava mu bukerarugendo asangizwa abaturiye za pariki, hagamijwe kubateza imbere.

Ubusanzwe, bajyaga bagenerwa 5% by’amafaranga yavuye mu bukerarugendo, ariko ubu aya mafaranga azaba 10%. Ibi ngo bizagira impinduka nziza kuko bizakomeza kugabanya amakimbirane hagati y’abaturiye pariki n’inyamaswa.

Indi mpamvu nyamukuru yatumye igiciro cyo gusura ingagi cyongerwa, ni uburyo bwo kurinda mu buryo burambye inyamaswa zishobora kuzimira mu buryo bworoshye, mu gihe isi ya none irimo guhura n’imbogamizi mu kurinda urusobe rw’ibinyabuzima n’umutungo kamere.

RDB itangaza ko ibi bije mu gihe cya ngombwa, nyuma yo kuganira n’abafatanyabikorwa b’ibanze mu bukerarugendo ndetse no mu kubungabunga ibidukikije, bemeranywa ko byakorwa.

Akamanzi kandi yongeyeho ko ubushakashatsi bwakozwe mu myaka yashize mu Rwanda, bwerekanye ko ari igihugu gifite ingagi zisurwa cyane ku Isi. Ubu bushakashatsi ngo bwerekanye ko hakenewe ingamba zikomeye mu kuzirinda gukomeza guhura n’abantu bishobora kuziviramo icyazitera indwara cyangwa urupfu.

Ubu kandi harimo gutegurwa uburyo bwo gushyiraho ahantu ntarengwa ho kuzirinda. Ibi bikaba bizasaba ishoramari rinini. Amafaranga ava muri Pariki y’Ibirunga akazanakoreshwa mu kubungabunga izindi pariki z’igihugu.

U Rwanda rwiyemeje kuba ahantu h’agaciro herekezwa na ba mukerarugendo ku isi, kandi bagahabwa serivise nziza. Kuri ubu, ibiciro ku basura ingagi byavanywe ku madolari y’Amerika 750 bishyirwa ku madolari 1 500. Ariko kandi abashaka kuzisura mu buryo bwihariye, bishyura amadolari 15 000.

Gusa hari uburyo bwihariye ku banyarwanda bashaka gusura ingagi, hanagamijwe kubashishikariza kuzisura, aho bagabanyirizwa ibiciro mu bihe by’iminsi mikuru, mu gihe cy’ingendo z’abanyeshuri zo kubungabunga ibidukikije, abashakashatsi, n’abantu bibumbiye hamwe mu itsinda. Hiyongeraho kandi gahunda ya “Tembera u Rwanda” nayo izatuma basura za pariki ari benshi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE