2017-06-28 08:00:46 clouds 27o High | Kigali Rwanda

Dukurikire:
 
 

Ikigega ‘Agaciro’ kimaze kugeramo miliyari 43

Yanditswe na IMVAHO NSHYA

Kuya 2017-03-28 05:55:29

 
Share on:
 
Yasuwe:275
 
Yavuzweho:200
 
10
 
10

Ikigega “Agaciro Development Fund”, Abanyarwanda bashyiramo amafaranga hagamijwe kunganira ubukungu no kwigira, kuri ubu kimaze kugeramo amafaranga y’u Rwanda miliyari 43 ndetse hakomeje gutangwa n’andi.

Ikigo cy’Igihugu gishinzwe Gukwirakwiza Amazi, Isuku n’Isukura (WASAC), ejo hashize ku wa 27 Werurwe 2017 cyatanze amafaranga y’u Rwanda miliyoni 50 mu kigega Agaciro, mu rwego rwo gukomeza kugishyigikira kugira ngo kizafashe u Rwanda mu gihe ubukungu bw’igihugu bwahungabanye no kwihesha agaciro kw’Abanyarwanda.

Kayonga Jack, Umuyobozi w’Ikigega “Agaciro Development Fund”, yavuze ko iki kigega kimaze kugeramo amafaranga y’u Rwanda miliyari 43, ashimira WASSAC byimazeyo kuba baratekereje iki gikorwa cyo gutanga umusanzu wo gukomeza gushyigikira iki kigega kizajya gifasha Abanyarwanda.

Kayonga yakomeje avuga ko ubwitabire mu gutanga umusanzu mu Gaciro bugenda bwiyongera, ibi bikaba bigaragaza neza ko Abanyarwanda bamaze kumva akamaro k’iki kigega cyashyiriweho kujya gifasha Leta.

JPEG - 132.3 kb
Abakozi ba WASAC mu ifoto y’urwibutso bamaze gutanga umusanzu mu Kigega Agaciro

Yagaragaje ko amafaranga amaze gutangwa bayabitse neza kandi ko afite umutekano, kuko amwe abitse mu bigo by’imari bitandukanye kugira ngo akomeze abyare inyungu.

Mu rwego rwo gukomeza kongera amafaranga yo mu kigega Agaciro, Kayonga yavuze ko ibigo bya Leta bizajya bitanga nibura amafaranga 5% ku nyungu bibona.

Ati “Kugeza uyu munsi ikigega Agaciro kimaze kwakira amafaranga akabakaba muri miliyari 43, ubwitange ni bwiza, Abanyarwanda bamaze kubyumva”.

Sano James, umuyobozi mukuru wa WASAC, yavuze ko banejejwe no gutanga ayo mafaranga kuko nabo bagaragaje ko ikigo cyabo cyihesha agaciro.

Sano yashimiye abakozi b’ikigo ayobora kuko aya mafaranga yabonetse ku bufatanye bwabo, maze anavuga ko bazakomeza gutanga umusanzu mu kigega Agaciro bakomeza kwiyubakira u Rwanda.

Igitekerezo cyo gushinga ikigega “Agaciro Development Fund” cyazanywe na Perezida Paul Kagame mu 2011, ubwo abayobozi bakuru b’igihugu bari mu nama y’Igihugu y’Umushyikirano ya 9, maze gitangira gushyirwamo amafaranga mu 2013, intego nyamukuru yacyo ikaba ari iyo gufasha Leta mu gihe ubukungu bw’igihugu bwahungabanye.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE