2017-05-24 10:43:15 clouds 27o High | Kigali Rwanda

Dukurikire:
 
 

Harabura imirimo 54 000 ngo u Rwanda ruhange imirimo 200 000

Yanditswe na Claude Ntawitonda

Kuya 2016-11-15 17:24:31

 
Share on:
 
Yasuwe:9
 
Yavuzweho:200
 
10
 
10

Guverinoma y’u Rwanda ikomeje guhangana no kugera ku ntego yo guhanga imirimo ibihumbi 200 buri mwaka mu gihe kuri ubu imirimo ihangwa igera ku bihumbi 146, hakaba hakiri icyuho cy’imirimo ibihumbi 54.

Leta ishingiye kuri iyi mibare yagaragajwe n’ubushakashatsi ku mibereho y’ingo mu Rwanda n’ishusho y’impinduka mu mibereho y’Umunyarwanda (EICV) bwa 2015, bukorwa n’Ikigo cy’Igihugu cy’Ibarurishamibare (NISR), yatangiye kongera ingamba ziharanira kunoza imirimo yamaze guhangwwa no kongera umuvuduko w’imishya ihangwa umunsi ku wundi.

JPEG - 281.9 kb
Uru ni urubyiruko rwibumbiye muri Koperative rukaba ruterwa inkunga muri gahunda ya Kora Wigire

Umuyobozi ushinzwe gukurikirana ishyirwa mu bikorwa rya gahunda ya NEP Kora Wigire ishamikiye kuri Minisiteri y’Abakozi ba Leta n’umurimo Ngaboka Francois, asobanura ko hari icyizere cy’uko Leta izagera ku ntego y’icyiciro cya kabiri cya gahunda y’imbaturabukungu nibura ko mu mwaka hajya hahangwa imirimo mishya ibihumbi 200.

Yemera ko koko ikibazo cy’ibura ry’akazi gihari ariko ko hari icyizere cyo kongera imirimo n’iyari isanzweho ikongererwa agaciro, bityo nayo ikabyazwamo indi.

Ati “Turimo gufasha urubyiruko kugirirwa icyizere rugakorana n’ibigo by’imari kugira ngo bashobore kubona inguzanyo biboroheye, ubu buri wese uzaba arangije kwiga imyuga akagira ikibazo cy’inguzanyo yo kubona ibikoresho azajya ajya muri Sacco yake inguzanyo itarenze ibihumbi 500 yishyure kimwe cya kabiri cyayo. Ibi ni mu rwego rwo gufasha abize imyuga barangizaga bagahura n’ikibazo cyo kubona igishoro.”

Yakomeje avuga ko hari n’uburyo batangiye binyuze muri gahunda ya NEP/Kora Wigire yo kongerera agaciro imirimo yari isanzwe ihari, ati “Nka hariya mu Gakinjiro ka Gisozi tugiye kubafasha tubahe Miliyoni 100 babone imashini yumisha imbaho bityo bihe agaciro ibyo bakora. Ibyo bizanatuma bigurwa cyane, kuko nk’ubu ujya kureba ugasanga umuntu yicaye ku ntebe yavuye Dubai n’ahandi nyamara yakabaye yicaye kuyakozwe n’Umunyarwanda, n’ayo mafaranga akaguma mu gihugu bityo bikanakomeza guha amahirwe abadafite akazi kukabona.”

JPEG - 252.3 kb
Leta yatangiye gahunda yo gufasha abahanze imirimo kuyinoza ari na ko hakomeza guhangwa imishya

Yakomeje ashimangira ko gahunda ya NEP Kora Wigire ireba ku mpande zose kugeza no ku bakarani, atanga urugero rw’abakorera mu isoko rya Kimironko mu mujyi wa Kigali bamaze kwigurira moto esheshatu.

Hari kandi n’abahoze ari inzererezi bagera kuri 220 bibumbiye muri koperative Koperative Imbaraga z’Igihugu bakaba bamaze kugera kuri byinshi babikwsha gutwara abagenzi kuri moto.

EICV yerekana ko mu mwaka wa 2006 kugeza mu 2010 imirimo mishya yahanzwe ingana n’ibihumbi 660 mu gihe kuva mu mwaka wa 2011 ukageza mu 2014 yageraga ku bihumbi 530.

Ubushakashatsi bwavuye muri iri barura bwagaragaje ko mu bize Kaminuza 14% badafite akazi, naho mu cyaro abadafite akazi bakaba bangana na 8.7%, mu gihe muri rusange mu gihugu hose igipimo cy’ubushomeri kiri kuri 2%.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE