Advertisement
 
 
 
 
 
 
 
 

Ubukungu

Guverineri Rwangombwa yanenze abakigendana amafaranga mu ntoki   

  Yanditswe na MUKAGAHIZI ROSE
 1 month ago

 
 

Guverineri wa Banki Nkuru y’u Rwanda, John Rwangombwa, asanga Abanyarwanda bakigendana amafaranga mu ntoki baracikanwe n’iterambere akabagira inama yo gukoresha uburyo bwo kwishyura hakoreshejwe ikoranabuhanga.

Ibi Guverineri John Rwangombwa yabivuze ubwo GT Bank yamurikaga ku mugaragaro ikarita ya “Master Card” yifashishwa mu kubikuza no kwishyura serivisi aho ari hose n’igihe icyo ari cyo cyose.

Ni ikarita y’ikoranabuhanga ifasha abakiliya kutagendana amafaranga ndetse bakabasha gufata amafaranga ku byuma bya ATM bisaga miliyoni ebyiri ku isi yose.

Guverineri Rwangombwa yagize ati “ Haracyari ikibazo cya bamwe mu bacuruzi bibeshya ngo gukoresha cash bituma bihesha amafaranga Ikigo cy’Igihugu cy’Imisoro n’Amahoro ntibishyure imisoro myinshi, ariko ni ukwibeshya kuko iyo urebye hari ubwo umuntu agenda agafata umwenda muri banki agatangira agacuruza amafaranga agashyira muri coffre fort iwe mu kazi, wa mwenda yafashe muri banki inyungu zirimo zirazamuka kuko arimo arashaka guhisha n’amafaranga yibeshya ngo arahisha Ikigo cy’Imisoro n’Amahoro…”

JPEG - 294.4 kb
GT Bank yamuritse ikarita y’Ikoranabuhanga Master Card yifashishwa mu kubikuza no kwishyura Serivisi

Akomeza agira ati “ariko nyuma ya byose kandi acuruje akayashyira muri banki, ayo bashyizemo inyungu nta bwo bayibara uwo munsi, umuntu agategereza ukwezi akabona kujyana muri banki, icyo gihe inyungu zikaba zirazamutse, ariko iyo ucuruje ujyana amafaranga muri banki wakoresha amafaranga ya banki kenshi kandi akaguteza imbere vuba cyane”.

Guverineri Rwangombwa ashima GT Bank, aho asanga iyi Banki iri mu nzira u Rwanda rwihaye yo gukoresha ikoranabuhanga rihanitse muri Serivisi zose z’amafaranga.

Uretse ibi, asanga gukoresha ubu buryo ari igisubizo cy’ibibazo bikunze kubaho by’umutekano muke w’amafaranga, kuko hari ubwo iyo habayeho impanuka y’inkongi z’umuriro ahira mu nzu z’ubucuruzi.

Ibi bishimangirwa n’umuyobozi mukuru wa GT Bank Rwanda Bayo Veracruz uvuga ko ufite izi karita ashobora kujya mu kindi gihugu akajya ku cyuma babikurizaho kiriho ikirango cya “Master card” akaba yabikuza nk’aho ari kubikuza bisanzwe hano mu Rwanda.

JPEG - 239.2 kb
Bayo Veracruz, Umuyobozi Mukuru wa GT Bank Rwanda

Bayo Veracruz akomeza avuga ko abakoresha aya makarita hari igabanyirizwa bagirirwa ku mahoteli amwe n’amwe, hari nk’urubuga bita “master card moment”, ni urubuga rwa internet aho usangaho ahantu bashobora kugenda kuri hoteli runaka bakagabanyirizwa, kugura amatike y’indege bakagabanyirizwa, n’ibindi bakoresha muri bizinesi zabo, bagenda ahantu henshi bagira igabanyirizwa.

Bayo yagize ati “ Ejo hazaza h’ubucuruzi nta si aho gukoresha amafaranga afatika mu ntoki, ahubwo ni ugukoresha amafaranga mu buryo bw’ikoranabuhanga, ibyo rero akaba ari byo GT Bank Rwanda ishyize imbere, mu kuborohereza gukora bizinesi mu buzima busanzwe bwa buri munsi umuntu atiriwe akenera kugendana amafaranga mu mufuka, aho twahera ku bacuruzi, aho bashobora kwishyura ibintu kuri internet, kubikuza nk’igihe bari hanze amafaranga abashiranye, abanyeshuri nabo twabageneye ikarita kugira ngo tubakangurire kwizigamira no gucunga amafaranga make baba bafite bagatangira kwiga kuyacunga hakiri kare”.

Ikarita ya Mastercard yamuritswe ku mugaragaro iri mu byiciro bitatu. Hari “Mastercard Debit Classic Card” ikoreshwa amasaha 24/24 ku Isi yose muri sevisi zose za banki, “Platinum Debit masterCard” ikoreshwa cyane cyane n’abacuruzi bakenera amafaranga menshi, ikoreshwa kandi mu ngendo, igafasha n’abantu bakenera kubikuza amafaranga menshi, “na GTCrea8 card” yashyiriweho by’umwihariko abanyeshuri bifuza kwakira amafaranga bari ku mashuri, n’ibindi bikorwa by’ishuri bikenera amafaranga.

GT Bank ifite inkomoko muri Nigeria, ariko ifite amashami mu bihugu byinshi cyane cyane muri Afurika no hanze y’Afurika, nko mu Bwongereza, ikaba igamije gushyira imbere ikoranabuhanga mu korohereza abaturage b’igihugu igiye gukoreramo ubucuruzi no kuba amafaranga yabo afite umutekano.

U Rwanda rufite intego yo gukomeza gutera intambwe mu ikoranabuhanga, aho rwifuza kuba ihuriro ry’ikoranabuhanga mu karere. Ibi bigenda bishyirwa mu bikorwa, aho kuri ubu nko mu rwego rwa internet u Rwanda ari rwo rufite iyihuta mu karere ruherereyemo.

 

Comments

pre-moderation

This forum is moderated before publication: your contribution will only appear after being validated by an administrator.

Who are you?
Your post
  • To create paragraphs, just leave blank lines.

 
 
Rubavu:Abavunjayi barataka igihombo baterwa n’abamamyi
Rubavu:Abavunjayi barataka igihombo baterwa n’abamamyi

Amashyirahamwe y’abakora akazi ko kuvunja amafaranga y’amanyarwanda n’amanyamahanga mu karere ka Rubavu, barataka ko baterwa igihombo n’abakora uyu murimo mu buryo butemewe n’amategeko, bita (...)

U Rwanda mu nzira zo kuvumburwamo amabuye ya Nickel n’Amabengeza
U Rwanda mu nzira zo kuvumburwamo amabuye ya Nickel n’Amabengeza

Ihuriro nyarwanda ry’Abacukuzi b’Amabuye y’Agaciro ryatangaje ko mu Rwanda hagaragaye ibimenyetso by’amabuye y’agaciro yitwa Nickel n’amabengeza. Mu muhango wo kwizihiza umunsi mpuzamahanga (...)

Abacukuzi  b’amabuye y’agaciro bafite imbogamizi zo kubona inguzanyo
Abacukuzi b’amabuye y’agaciro bafite imbogamizi zo kubona inguzanyo

Abacukuzi b’amabuye y’agaciro mu Rwanda bavuga ko bafite imbogamizi zo kubona inguzanyo z’amabanki muri uwo murimo ngo babashe kuwukora neza. Ibi babitangarije mu muhango wo kwizihiza umunsi (...)

Hafashwe toni 7 za caguwa zinjizwaga mu Rwanda ari magendu
Hafashwe toni 7 za caguwa zinjizwaga mu Rwanda ari magendu

Ishami rya Polisi y’u Rwanda rishinzwe kurwanya magendu n’inyerezwa ry’imisoro (RPU), rifatanyije n’ikigo cy’igihugu cy’imisoro n’amahooro (RRA), bataye muri yombi abantu 3 bakekwaho kwinjiza ibiro (...)

Abavuzi gakondo bagiye gushinga uruganda rw’imiti na banki
Abavuzi gakondo bagiye gushinga uruganda rw’imiti na banki

Abavuzi bo mu Rwanda no mu bindi bihugu bya Afurika y’Uburasirazuba, bibumbiye mu Muryango Mugari w’Abavuzi Gakondo, UMUAGA, batangiye kwiga ku mishinga ikomeye y’igihe kirekire irimo ibitaro (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.