2017-08-16 13:12:06 clouds 27o High | Kigali Rwanda

Dukurikire:
 
 

EU yahaye u Rwanda miliyari 157, iboneraho kurwihanganisha

Yanditswe na IMVAHO NSHYA

Kuya 2016-05-10 13:24:13

 
Share on:
 
Yasuwe:3
 
Yavuzweho:200
 
10
 
10

Umuryango w’Ubumwe bw’u Burayi, EU, wateye u Rwanda inkunga ya miliyari 157 z’amafaranga y’u Rwanda (amayero miliyoni 177) yo gufasha guverinoma muri gahunda yihaye yo kugeza amashanyarazi kuri 70% by’abaturage mu 2018.

Amasezerano y’iyo nkunga yashyizweho umukono na Minisitiri w’Imari n’Igenamigambi, Amb. Claver Gatete na Amb. Michael Ryan uhagarariye EU mu Rwanda kuri uyu wa 10 Gicurasi 2016.

Iyi nkunga ni igice cy’amasezerano EU n’u Rwanda byagiranye agena miliyoni 460 z’amayero yo gusakaza no gusaranganya umuriro hirya no hino gihugu mu gihe cy’imyaka itanu.

JPEG - 159.7 kb
Minisitiri Gatete na Amb Ryan bamaze gusinya amasezerano

Eu yihanganishije Abanyarwanda bahuye n’ibiza

Amb. Ryan yavuze ko umuryango ahagarariye wifatanyije n’Abanyarwanda muri ibi bihe rwugarijwe n’ikibazo cy’ibiza by’imvura idasanzwe yaguye mu ijoro ryo ku ya 8 Gicurasi, igahitana bamwe mu baturage, imitungo n’ibikorwaremezo.

Mu kiganiro n’abanyamakuru Amb. Ryan yashimye inzego zose ndetse n’imiryango nterankunga yafashe iya mbere mu kwihutira kugoboka abibasiwe n’ibiza, asezeranya ko EU nayo iteganya kubagezaho inkunga.

Ati” Natwe tuzareba mu mikoro yacu make tube twagira icyo dukora.”

Imvura idasanzwe yaguye mu turere tw’Amajyaruguru n’u Burengerazuba mu ijoro rishyira ku cyumweru tariki ya 8 Gicurasi 2016 yateje inkangu zigwira amazu y’abaturage, abasaga 50 bahasiga ubuzima hanangirika imitungo myinshi.

Itangazo ryashyizwe ahagaragara n’ibiro by’umuvugizi wa Leta riragira riti “Igenzura ryakozwe hifashishijwe indege ryagaragaje ko akarere ka Gakenke ariko gafite imiryango myinshi yugarijwe n’inkangu kakaba gashobora gukomeza kwibasirwa kubera ubutaka bworoshye, kubera iyo mpamvu abo bigaragara ko bugarijwe cyane bakaba bashobora kuba bimuwe by’agateganyo’’.

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE